ރާއްޖޭގައި ބާއްވާ އެންމެ ބޮޑު ދުވުން ކަމަށްވާ، ދިރާގު ރޯޑްރޭހުގެ 10 ކިލޯ މީޓަރުގެ ބައި، ދިވެހި ސިފައިންގެ ސްޕެޝަލް ފޯސަސްގައި މަސައްކަތްކުރާ އަހުމަދު ރިޒާ ކާމިޔާބުކޮށްފި އެވެ.
ކުޑަކުދިންނަށް ކުރާ އަނިޔާތަކާ ދެކޮޅަށް ދިރާގުން މާލޭގައި މިއަދު ބޭއްވި މި ދުވުމުގެ 10 ކިލޯ މީޓަރުގެ ބައި (މާލެވަށައި ދެ ބުރު) ކާމިޔާބުކުރީ ދިވެހި ސިފައިންގެ ސްޕެޝަލް ފޯސަސްގައި މަސައްކަތްކުރާ އަހުމަދު ރިޒާ އެވެ. އަދި މިބައިގެ ދެވަނަ ހޯދީ އަހުމަދު ހަސަން އެވެ. މީގެ އިތުރުން ތިންވަނަ ހޯދާފައިވަނީ މުހައްމަދު ރަޝީދެވެ.
ތިރީސް ހާހަށްވުރެ ގިނަ ދުވުންތެރިން ބައިވެރި ދުވުމުގެ 10 ކިލޯ މީޓަރުގެ ބައިގެ އަންހެން ދުވުންތެރިންގެ ކެޓަގަރީގެ އެއްވަނަ ހޯދާފައިވަނީ ސްރީލަންކާގެ ޕެޓްރިޝިޔާ ޑޮރީޒް އެވެ. މިބައިގެ ދެވަނަ ހޯދާފައިވަނީ މަރިޔަމް އަބްދުލް ކަރީމް އެވެ. އަދި ތިންވަނަ ހޯދާފައިވަނީ މިދިޔަ އަހަރުގެ ރޭހުގެ ތިންވަނަ ހޯދި މަޝްހޫރު ޓީޓީ ކުޅުންތެރިޔާ މުއީމާ މުހައްމަދު އެވެ.
ހިލޭ ސާބަހަށް މަސައްކަތްކުރާ އަމިއްލަ ޖަމާއަތްތަކަށް ފަންޑުރައިޒް ކުރެވޭ ގޮތަށް ދިރާގުން ބޭއްވި މި ދުވުމުގައި 45 އަހަރުން މަތީގެ ބައެއް ވެސް ހިމަނާފައވެ އެވެ. މިބައިގެ ފިރިހެނުންގެ ކެޓަގަރީ ކާމިޔާބުކުރީ އަބްދުﷲ މަހުރިން އެވެ. އަދި އަންހެނުންގެ ކެޓަގަރީ ކާމިޔާބުކުރީ އައިޝަތު ނައިޝާން އެވެ. އަދި 13 އަހަރުން ދަށުގެ ފިރިހެން ކުދިންގެ ބައި ކާމިޔާބުކުރީ އައިކް އަބްދުﷲ ރިފާއު އެވެ. އަދި މިބައިގެ އަންހެން ކުދިންގެ ބައި ކާމިޔާބު ކުރީ އައިޝަތު ނައިޝާން އެވެ.
ދިރާގު ރޯޑްރޭހަކީ ބައިނަލް އަގުވާމީ ދިގުވުމުގެ ޖަމިއްޔާ "އެއިމްސް" ގަބޫލުކުރާ ދުވުމެކެވެ. މި އަހަރުގެ ދުވުމުގައި 43 ގައުމަކަށް ނިސްބަތްވާ މީހުން ދުވެފައިވެ އެވެ.