އަހަރީ ދުވަސް ފާހަގަ ކުރުމުގެ ގޮތުން ލޭ ހަދިޔާ ކުރުމަށް ހާއްސަ ޕްރަގްރާމެއް ހިންގުމަށް ލޯފަން ކުދިން އުފައްދާފައިވާ ބްލައިންޑް އެސޯސިއޭޝަނުން ނިންމައިފި އެވެ.
މިމަހުގެ 26 ވަނަ ދުވަހަކީ އެ ޖަމިއްޔާގެ 10 ވަނަ އަހަރީ ދުވަހެވެ.
އަވަސްއާއި ވާހަކަދައްކަމުން ޖަމިއްޔާގެ މީޑިއާ އޮފިސަރު އަބްދުﷲ ޒިޔާއު ވިދާޅުވީ 10 ވަނަ އަހަރީ ދުވަހާއި ގުޅިގެން ލޭ ހަދިޔާ ކުރުމަށް ނިންމީ މުޖްތަމައަށް ފައިދާ ހުރި ކަމެއް ކުރުމުގެ ބޭނުމުގައެވެ.
އެގޮތުން މިމަހުުގެ 25 ވަނަ ދުވަހު މި ޕްރަގްރާމް ހިންގާނީ ތެލެސީމިއާ ސެންޓަރާއި ގުޅިގެން ކަމަށް ޒިޔާއު ވިދާޅުވިއެވެ.
އެ ދުވަހުގެ ހެނދުނު 9:00 ފެށިގެން 17:00 ނިޔަލަށް ލޭ ހަދިޔާ ކުރުމުގެ އިންތިޒާމް ހަމަޖެހިފައިވާނެ ކަމަށް އޭނާ ވިދާޅުވިއެވެ. އެ ޕްރަގްރާމްގެ ދަށުން ލޯފަން ކުދިންގެ ޖަމިއްޔާގެ މެންބަރުންވެސް ލޭ ހަދިޔާ ކުރާނެއެވެ. އަދި އެ ޕްރަގްރާމްގައި ބައިވެރިވުމަށް އެދި މުއްސަސާތަކަށް ދައުވަތު ދެމުންދާ ކަމަށްވެސް އޭނާ ވިދާޅުވިއެވެ.
ލޯފަން ކުދިން ބައިވެރިވެގެން އުފައްދާފައިވާ ޖަމިއްޔާއިން ވަނީ އެކުދިންގެ ހައްގުގައި މިދިޔަ 10 އަހަރު ތެރޭގައި ގިނަ މަސައްކަތްތަކެއް ކޮށްފައެވެ. މީގެ އިތުރުން ޓީވީ އަދި ރޭޑިއޯ ޕްރަގްރާމްތައް އުފައްދައިގެންވެސް އެ ޖަމިއްޔާއިން ގެނެސްދީފައިވެއެވެ.