ކުރިއަށް އޮތް ލޯކަލް ކައުންސިލް އިންތިހާބުގައި ވޯޓް ދިނުމުގެ ހައްގު ލިބިފައިވާ މީހުންގެ ވޯޓާސް ލިސްޓް މިމަހުގެ 20 ވަނަ ދުވަހު އާންމު ކުރާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަންގެ ނާއިބް ރައީސް އަދި އެކޮމިޝަންގެ އިސް ތަރްޖަމާން އަހުމަދު އަކްރަމް މިއަދު ވިދާޅުވީ ކައުންސިލް އިންތިހާބު 2020 ގެ ވޯޓާސްލިސްޓް އާންމު ކުރުމަށް ތައްޔާރުވަމުންދާ ކަމަށެވެ. އިލެކްޝަންސް ކޮމިޝަނުން މަސައްކަތް ކުރަމުންދަނީ ވީހާވެސް ފުރިހަމަ ލިސްޓެއް ތައްޔާރު ކުރުމަށް ކަމަށާ އެ ލިސްޓް މިމަހުގެ ވިހިވަނަ ދުވަހު އާންމު ކުރާނެ ކަމަށެވެ.
ވޯޓާސް ލިސްޓަށް ޝަކުވާ ހުށައެޅުމަށް ގާނޫނުގައި ބުނާ މުއްދަތު ކަމަށްވާ 10 ދުވަސް ލިބޭނެ ކަމަށްވެސް އަކްރަމް ވިދާޅުވިއެވެ. އަކްރަމް ވަނީ އެ ކޮމިޝަނުން އާންމުކުރާ ވޯޓާސް ލިސްޓްގައި ނަން އޮތްތޯ ބަލާ، އެއްވެސް މައްސަލައެއް އުޅޭނަމަ އެ މުއްދަތުގެ ތެރޭގައި ހުށައެޅުމަށް އެދިފައެވެ.
މީގެ ކުރިން އިންތިހާބުތަކާ ދިމާކޮށް އާންމުކުރާ ވޯޓާސް ލިސްޓްތަކުގައި މަރުވެފައިވާ މީހުންގެ މައުލޫމާތު ގިނަ އަދަދަކަށް ހިމެނިފައި ހުންނަ ކަމަށް ބުނެ އާންމުން ޝަކުވާކުރިއެވެ. ނަމަވެސް މިފަހަރުގެ ވޯޓާސް ލިސްޓް އާންމު ކުރުމުގެ ކުރިން ބަލަންޖެހޭ ހުރިހާ ކަންކަން ވަރަށް ރަނގަޅަށް ބަލަމުންދާ ކަމަށް އަކްރަމް ވިދާޅުވިއެވެ.
2020 ވަނަ އަހަރުގެ ކައުންސިލް އިންތިޚާބު
- ރަށު ކައުންސިލްތަކުން އިންތިޚާބުކުރާ އަންހެން ކައުންސިލަރުންގެ އަދަދު 372
- ރަށު ކައުންސިލްތަކުން އިންތިޚާބުކުރާ ކައުންސިލަރުންގެ އަދަދު 372 (އަންހެން، ފިރިހެން)
- ރަށު ކައުންސިލްތަކުން ރައީސުންގެ އަދަދު 179
- ރަށު ކައުންސިލްތަކުގެ ޖުމްލަ އަދަދު 923
- ސިޓީތަކުން އިންތިޚާބުކުރާ އަންހެން ކައުންސިލަރުންގެ އަދަދު 14
- ސިޓީ ކައުންސިލަރުންގެ އަދަދު 28 (އަންހެން، ފިރިހެން)
- ސިޓީ ކައުންސިލްގެ މޭޔަރުންގެ އަދަދު 4
- ސިޓީތަކުގައި ޖުމްލަ ތިބޭނެ އަދަދު 46
އަންނަ އޭޕްރީލް މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ ކައުންސިލް އިންތިޚާބުގައި 980 މީހަކު އިންތިޚާބުކުރުމަށް ވަނީ ހަމަޖެހިފައެވެ.