ޑައިރެކްޓަރު ވިކްރަމް ބަޓް އަކީ ތުރިލާ އާއި ބިރުވެރި ފިލްމުތައް އުފެއްދުމަށް މަޝްހޫރު މީހެކެވެ. ނަމަވެސް މިފަހަރު އޭނާ އުފައްދާފައިވާ ފިލްމު ވަރަށް ތަފާތެވެ. އޭނާގެ އާ ފިލްމު "ހެކްޑް" އަކީ ބިރުވެރި ފިލްމެއް ނޫނެވެ. އަދި ތުރިލާ އެއް ވެސް ނޫނެވެ. "ހެކްޑް" އަކީ މޮޑާން ޓެކްނޮލޮޖީގެ ސަބަބުން އިންސާނުންގެ ދިރިއުޅުމަށް ކުރާ އަސަރުތައް ދައްކުވައިދޭ ފިލްމެކެވެ. މި ފިލްމުން ޓީވީގެ މަޝްހޫރު ތަރި ހީނާ ޚާން ބޮލީވުޑަށް ނުކުތުމަށް ވަނީ ހަމަޖެހިފަ އެވެ.
"ހެކްޑް" ގައި ދައްކަނީ ޒަމާނީ ޓެކްނޮލޮޖީގެ ބޭނުން ކޮށްގެން މީހަކު ހީނާގެ ފަހަތުން އަޅުވާލައިގެން އޭނާއަށް ފާރަލާ އުނދަގޫ ކުރާ ތަނެވެ. ރޯހަން ޝާހް އަކީ މި ފިލްމުގެ ބަތަލު ނަމަވެސް އޭނާ ކުޅެނީ ނެގެޓިވް ކެރެކްޓާ އެކެވެ.
ސޯޝަލް މީޑިއާގެ މި ޒަމާނުގައި މީހުންނަށް އޭގެ ސަބަބުން ކުރިމަތިވާ ނާޒުކު ބައެއް ހާލަތްތައް ވެސް މި ފިލްމުން ފެންނާނެ އެވެ.
ހީނާ ބުނެފައިވާ ގޮތުގައި އޭނާ މި ފިލްމު ގަބޫލު ކުރީ ތަފާތު މީޑިއަމް ތަކުގައި މަސައްކަތް ކުރަން ބޭނުންވާތީ އެވެ. އެގޮތުން ވެބް ސީރީޒް "ޑެމޭޖްޑް"ގައި ވެސް ހީނާ ވަނީ މަސައްކަތް ކޮށްފަ އެވެ. މިއީ ސައިކޮލޮޖިކަލް ކްރައިމް ޑްރާމާ އެކެވެ. މީގެ ފުރަތަމަ ސީޒަންގައި ލީޑް ރޯލު ކުޅުނީ އަމްރޫތާ ކަންވިލްކަރް އެވެ.
ޒީ ސްޓޫޑިއޯ އިން ޕްރޮޑިއުސްކޮށްފައިވާ މި ފިލްމު އަންނަ ފެބްރުއަރީ 7 ގައި ރިލީޒްކުރުމަށް ވަނީ ހަމަޖެހިފަ އެވެ.