ސްޓާ ޕްލަސްގެ މަޝްހޫރު ޝޯއެއް ކަމަށްވާ "ދިލް ތޯ ހެޕީ ހޭ ޖީ" ގައި ސިމީ ކޯސްލާގެ ރޯލު އަދާކުރި ސޭޖަލް މަރުވެއްޖެ އެވެ. ބޮލީވުޑް ޚަބަރުތައް ބުނާ ގޮތުގައި މިދިޔަ ހުކުރު ދުވަހު އޭނާ މަރުވީ އަމިއްލައަށެވެ. ސޭޖަލް އާއި އެހެން އަންހެންކުއްޖެއް އުޅެނީ ރޫމެއް ޝެއާ ކޮށްގެނެވެ. ހުކުރު ދުވަހުގެ ރޭ އޭނާ ކޮޓަރީގެ ދޮރު ނުހުޅުވައިގެން އޭނާގެ ރޫމް މޭޓް ގަދަކަމުން ދޮރު ހަލާކު ކޮށްލައިގެން ވަން އިރު އޭނާ ހުރީ ދަންޖެހިގެން މަރުވެފަ އެވެ.
ފުލުހުން ވަނީ ސޭޖަލްގެ ކޮޓަރިން އޭނާ މަރުވުމުގެ ކުރިން ލިޔެފައިވާ ނޯޓެއް ހޯދާފަ އެވެ. އޭގައި ބުނެފައި ވަނީ އޭނާ މަރުވަނީ ޒާތީ މައްސަލަތަކަކާ ހުރެ ކަމަށެވެ.
ސޭޖަލްގެ އެކުވެރިން ބުނި ގޮތުގައި ފަހަކަށް އައިސް ސޭޖަލްއަށް ވަރަށް ބޮޑަށް ޑިޕްރެޝަންގެ މައްސަލަތައް ވަނީ ދިމާވެފަ އެވެ. އެއީ އޭނާގެ ބައްޕައަށް ކެންސަރު ޖެހި ބަލި ހާލު ގޯސް ވެގެން އެކަމާ ހިތްދަތި ވެގެން ދިމާވި ކަމެއް ކަމަށް ސޭޖަލްގެ އެކުވެރިން ބުނެ އެވެ.
"ދިލް ތޯ ހެޕީ ހޭ ޖީ"ގެ އިތުރުން އެންޑްޓީވީގެ "ލާލް އިޝްގް" އަދި ޒިންގް ޓީވީގެ "ޒިންދަގީ ޔޫ" ގައި ވެސް ސޭޖަލް ވަނީ ބައިވެރިވެފަ އެވެ. އަދި "އާޒާދް ޕަރިންދޭ" ކިޔާ ވެބް ސީރީޒް އެއްގައި ވެސް ސޭޖަލް ވަނީ މަސައްކަތް ކޮށްފަ އެވެ.
ސޭޖަލް މަރުވެފައި ވަނީ އެހެން ޓީވީ އެކްޓަރެއް ކަމަށްވާ ކުޝަލް ޕަންޖާބީ ހަމަ މިފަދަ ގޮތަކަށް މަރުވިތާ މަހެއްހާ ދުވަސް ވީތަނާ އެވެ.
ޓީވީ ތަރިންގެ ޑިޕްރެޝަނާއި އެންގްޒައިޓީގެ މައްސަލަތައް ބޮޑުކަމަށް އެ އިންޑަސްޓްރީގައި މަސައްކަތްކުރާ ގިނަ ބަޔަކު އަބަދުވެސް ބުނެ އެވެ. ދުވާލެއްގެ 18 ވަރަކަށް ގަޑިއިރު ޝޫޓިންގް ގައި އުޅެން ޖެހޭތީ އަރާމުކުރަން ވަގުތު ނުލިބި ބައެއް މީހުން ބުއްދި ފަސްވާ ހިސާބަކަށް ވެސް ދާ ކަމުގެ ޝަކުވާތައް ޓީވީ ތަރިން އަބަދުވެސް ކުރެ އެވެ.
ސޭޖަލް: އޭނާ މަރުވެފައި ވަނީ ދަންޖެހިގެން