ޗައިނާ އިން ފެނިގެން އުޅޭ ނުރައްކާތެރި އާ ކޮރޯނާ ވައިރަސް ޖެހިފައިވާ މީހެއް އަވަށްޓެރި ސްރީލަންކާއިން ފެނިފައިވާ ކަމަށް އެ ގައުމުގެ ސިއްހަތާ ބެހޭ އިދާރާއިން ހާމަކޮށްފި އެވެ.
ލަންކާގެ ހެލްތް ޕްރޮޓެކްޝަން ބިއުރޯއިން ބުނީ ވައިރަސް ޖެހިފައިވާ މީހެއް އެ ގައުމުން ފެނިފައިވީ ނަމަވެސް އެ ވައިރަސް ސްރީލަންކާގައި ފެތުރުމުގެ ފުރުސަތެއް ނެތް ކަމަށެވެ. އެހެންވެ ރައްޔިތުން ކަންބޮޑުނުވުމަށް އިރުޝާދު ދިނެވެ. އަދި ވައިރަސް ފެތުރުނަ ނުދޭން ފިޔަވަޅުތައް އަޅާނެ ކަމަށް ވެސް އެ ބިއުރޯއިން ބުނެފައިވެ އެވެ.
ސްރީލަންކާގެ ބައެއް ނޫސްތަކުން ރިޕޯޓް ކުރާ ގޮތުގައި ކޮރޯނާ ވައިރަހަށް ޕޮޒިޓިވްވެފައިވަނީ އެ ގައުމަށް އެތެރެވި ޗައިނާ އަންހެނެކެވެ. އެއީ ޗައިނާގެ ހޫބޭ ޕްރޮވިންސްއިން އައި މީހެއް ކަމަށްވެ އެވެ. ވައިރަސް ފުރަތަމަ ފެނިފައިވަނީ ވެސް އެ ޕްރޮވިންސް ނިސްބަތްވާ ވުހާން ސިޓީއިންނެވެ.
ވައިރަސް އެންމެ ފުރަތަމަ ފެނުނު ވޫހާން ސިޓީ ވަނީ ބަންދުކޮށް، ދަތުރުފަތުރުގެ ނިޒާމް އެއްކޮށް ހުއްޓާލައިފަ އެވެ.
ޗައިނާގެ އިތުރުން ނޮވެލް ކޮރޯނާވައިރަސް ގައުމުތަކުން ވަނީ ފެނިފައެވެ. އެ ގޮތުން، ތައިލަންޑް، ހޮންކޮން، މަކާއޯ، ސައުތުކޮރެއާ، ޓައިވާން، ޖަޕާން، ނޭޕާލް، ސިންގަޕޫރު އަދި އެމެރިކާއިންވެސް ވަނީ މި ވައިރަސް ފެނިފަ އެވެ. އަދި އޮސްޓްރޭލިއާގެ އިތުރުން ފްރާންސް އިން ވެސް އެ ވައިރަސް މިހާރު ވަނީ ފެންނަން ފަށައިފަ އެވެ.
ދުނިޔޭގެ ސިއްހަތާބެހޭ ޖަމިއްޔާ ޑަބްލިޔުއެޗްއޯ އިން ބުނާ ގޮތުންނަމަ، ކޮރޯނާވައިރަސްތަކަކީ އާދައިގެ ރޯގާ އިން ފެށިގެން މިޑްލް އީސްޓް ރެސްޕިރޭޓަރީ ސިންޑްރޯމް (މާސް) އާއި ސިވިއާ އެކިއުޓް ރެސްޕިރޭޓަރީ ސިންޑްރޯމް (ސާސް) ފަދަ ނޭވާލާ ނިޒާމަށް ވަރަށް ބޮޑަށް އަސަރުކުރާ ބައްޔެކެވެ.
