ހުރަވީ ދުވަސް ފާހަގަ ކުރަން މިރޭ ބޭއްވި ރަސްމީ ޖަލްސާގައި ރައީސް އިބްރާހިމް މުހައްމަދު ސޯލިހާއި ސަރުކާރުގެ ގިނަ އިސް ބޭފުޅުން ބައިވެރިވެވަޑައެއް ނުގަންނަވަ އެވެ.
އިންޑިއާގެ މަލާބާރީން ނުވަތަ އަތްދަށުން ރާއްޖެ މިނިވަން ކުރަން ދޮންބަންޑާރައިން ކުރެއްވި މަސައްކަތްޕުޅުގެ ޒިކުރާ އާ ކުރުމުގެ ގޮތުން ކޮންމެ އަހަރަކު ފާހަގަ ކުރާ ހުރަވީ ދުވަހުގެ މުނާސަބަތުގައި ތާޖުއްދީން ސްކޫލްގައި މިރޭ ބޭއްވި ރަސްމީ ޖަލްސާއަށް ސަރުކާރުގެ އިސް ބޭފުޅުންގެ ތެރެއިން ވަޑައިގެންނެވީ ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަނާއި ހޯމް މިނިސްޓްރީގެ ސްޓޭޓް މިނިސްޓަރު މުހައްމަދު މާހިރެވެ.
ޖަލްސާގައި ވާހަކަފުޅު ދައްކަވަމުން ހަޔާ އެޑިއުކޭޝަން މިނިސްޓަރު ވިދާޅުވީ ޖަލްސާއަށް ހޯމް މިނިސްޓަރު އިމްރާން އަބްދުﷲ ވަޑައިގަންނަވާ ގޮތަށް ހަމަޖެހިފައި އޮތް ކަމަށެވެ. ނަމަވެސް މިނިސްޓަރު އިމްރާން މިރޭ އަލާސްކަންފުޅާ އުޅުއްވާތީ ޖަލްސާއަށް ވަޑައި ނުގެންނެވުނީ ކަމަށެވެ.
ސަރުކާރުގެ އެހެން ބައެއް މިނިސްޓަރުންނާއި އިސް ބޭފުޅުން އަދި ރައީސް އިބްރާހިމް މުހައްމަދު ސޯލިހް ވަޑައިނުގެންނެވި ސަބަބެއް އޭނާ ވިދާޅެއް ނުވެ އެވެ.
ހޯމް މިނިސްޓްރީގެ އޮފިޝަލަކު ވިދާޅުވީ ޖަލްސާއަށް ރައީސް އަދި އެހެން މިނިސްޓަރުންނަށް ދައުވަތު ނާރުވާ ކަމަށެވެ. ޖަލްސާގައި ބޮޑަށް އިސްކަން ދިނީ ސްކޫލް ދަރިވަރުންނަށް ކަމަށާއި ސިޔާސީ ބޭފުޅުންނަށްވުރެ ކުރީ ސަފުގައި ބޭއްތިބީ ސްކޫލް ކުދިންކަން އޭނާ ފާހަގަ ކުރެއްވި އެވެ.
ހުރަވީ ދުވަހުގެ ރަސްމީ ޖަލްސާ ކުރިއަށް ދިޔަ ވަގުތުގައި ޗައިނާގެ ވުހާން ސިޓީން ފެނުނު ކޮރޯނާ ވައިރަސް އެ ގައުމާއި އިތުރު 11 ގައުމެއްގައި ފެތުރުމާ ގުޅިގެން ރާއްޖެއިން އަޅަން ޖެހޭ ރައްކާތެރި ފިޔަވަޅުތަކާ ގުޅޭ މައުލޫމާތުތައް ދިނުމުގެ ގޮތުން ހެލްތު މިނިސްޓަރު އަބްދުﷲ އަމީން އާއި ޓޫރިޒަމް މިނިސްޓަރު އިންނެވީ ނޫސްވެރިންގެ ބައްދަލުވުމެއްގަ އެވެ.
ހުރަވީ ދުވަސް ފާހަގަ ކުރުމުގެ ގޮތުން މިރޭ ބޭއްވި ޖަލްސާގައި ތާޖުއްދީން ސްކޫލްގެ ދަރިވަރުން ވަނީ ދޮންބަންޑާރައިން ކުރެއްވި މަސައްކަތްޕުޅާއި ހަނގުރާމައިގެ މައްޗަށް ބިނާކޮށް ތަމްސީލެއް ކުޅުއްވައިފަ އެވެ. އަދި ދޮންބަންޑާރައިން ކުރެއްވި ހަނގުރާމައިގެ ތާރީހާ ގުޅޭ ގޮތުން ހަޔާ އެޑިއުކޭޝަން މިނިސްޓަރު ވާހަކަފުޅު ދެއްކެވި އެވެ.