އިންޑޮނީޝިޔާގެ ކަމާބެހޭ އިދާރާތަކުން މިހާރު ދަނީ އެ ގައުމުގައި އޮތް ބޮޑު ކިނބުލެއްގެ ކަރަށް މެހިފައިވާ ސައިކަލު ޓަޔަރެއް ނައްޓާލަދޭނެ ބަޔަކު ހޯދަން މަސައްކަތް ކުރަމުންނެވެ. މި ކިނބޫ އޮތީ އެ ގައުމުގެ ސެންޓްރަލް ސުލަވޭސީގެ ވެރިރަށް ޕަލޫގަ އެވެ.
ކިނބުލަށް އަނިޔާއެއް ނުދީ އެ ސޮރުގެ ކަރުން މި ޓަޔަރު ނައްތާލަދޭ މީހަކަށް ވަރަށް ގިނަ އަދަދެއްގެ ފައިސާ ހިމެނޭ އިނާމެއް ދޭނެ ކަމަށް ވެސް އިންޑޮނީޝިޔާގެ އޮތޯރިޓީން މިހާރު ވަނީ އިއުލާން ކޮށްފައެވެ. ނަމަވެސް މި އިނާމު ހޯދަން މަސައްކަތް ކުރާ މީހާއަށް ފުރަތަމަ ކުރިމަތިލާން ޖެހެނީ 13 ފޫޓު ދިގުމިނުގެ ކިނބުލާ އެވެ.
އެ ގައުމުގެ ކަމާ ބެހޭ ފަރާތްތަކުން ކިނބުލުގެ ކަރުން ޓަޔަރު ނައްޓާލަން މަސައްކަތް ކުރާތާ އެތައް އަހަރެއް ވެއްޖެ އެވެ. ނަމަވެސް އެމީހުން މިހާތަނަށް ކުރި ހުރިހާ މަސައްކަތެއް ވަނީ ނާކާމިޔާބު ވެފަ އެވެ. ޓަޔަރު ކަރުގައި އެޅުވިފައި އިނުމުގެ ސަބަބުން ނޭވާ ލާން އުނދަގޫވެގެން ކިނބޫ އުޅޭ މަންޒަރެއް ފެންނަ ވީޑިއޯއެއް އާއްމު ވުމާ ގުޅިގެން ނޭވާ ހާސްވެގެން ކިނބޫ މަރުވެދާނެކަމުގެ ބިރު މިހާރު ވަނީ އުފެދިފަ އެވެ.
އިނާމު ބޭނުމަސް މި ޓަޔަރު ނައްޓަން އުޅެންޖެހޭނީ ކަމާ ގުޅޭ ތަޖުރިބާ ހުރި މީހުން ކަމަށް ވެސް އިންޑޮނީޝިޔާގެ އޮތޯރިޓީއިން ވަނީ ބުނެފަ އެވެ. ކޮންމެ ކޮންމެ މީހަކު އެ ނައްޓަން މަސައްކަތް ކުރަން ހަދައިގެން ކިނބުލަށް އަނިޔާވުން ނުވަތަ އެ މީހާއަށް އަނިޔާ ވުން އޮންނާނީ ވަރަށް ގާތުގައި ކަމަށް ވާތީ އެވެ.
އަދި އެ ގައުމުގެ އާއްމު ރައްޔިތުންނަށް އޮތޯރިޓީތަކުން އިލްތިމާސް ކުރަނީ ކިނބުލާ ކައިރިއަށް ނުދިއުމަށެވެ. ވައިލްޑްލައިފް ތަޖުރިބާހުރި އެކަމަށް ކުޅަދާނަ ގާބިލް މީހުން ނޫނީ އެކަން ކުރަން ނޫޅުމަށެވެ.