ރައްޔިިތުންގެ މަޖިލީހުގައި ރައީސް އިބްރާހިމް މުހައްމަދު ސޯލިހު ރިޔާސީ ބަޔާން އިއްވަމުން ދަނިކޮށް އިދިކޮޅު ޕާޓީތަކުގެ މެންބަރުން މަޖިލީހުގެ ތަޅުމުގައި ހިމޭން އިހުތިޖާޖެއް ކޮށްފި އެވެ.
މި އަހަރުގެ ރައްޔިތުން މަޖިލީހުގެ މަސައްކަތްތައް ފެށުމުގެ ގޮތުން ވަޒީރުންނާއި ދައުލަތުގެ އިސް ފަރާތްތަކާއި ބައެއް ސްކޫލުތަކުގެ ދަރިވަރުންނާއެކު ބާއްވާ މި ޖަލްސާއަށް އިދިކޮޅު މެންބަރުން ވަޑައިގަތީ ރައީސް އަބްދުﷲ ޔާމީން މިނިވަން ކުރުމަށް ގޮވާލައި ކަރުދާސްތަކާއެކުގަ އެވެ. އަދި ރައީސް ސޯލިހު ރިޔާސީ ބަޔާން އިއްވަން ފެއްޓެވުމުން އެމަނިކުފާނު ކުރިފުޅުމަތީގައި އިދިކޮޅު ފަސް މެންބަރަކު ހިމޭން އިހުތިޖާޖެއް ކުރި އެވެ.
މި ޖަލްސާގައި ބައިވެރިވެވަޑައިގަތް ނަމަވެސް ގުރައިދޫ ދާއިރާގެ މެންބަރު އަދި ރައީސް މައުމޫން އަބްދުލް ގައްޔޫމްގެ ދަރިކަލުން ޣައްސާން މައުމޫން އިދިކޮޅު ފަރާތްތަކުން ކުރާ އިހުތިޖާޖުގައި ބައިވެރިވެވަޑައި ނުގަންނަވަ އެވެ.
މަޖިލީހުގެ ޖަލްސާތައް މިދިޔަ އަހަރު ނިންމާލިއިރު ވެސް ޖަލްސާގެ ތެރެއިން އިދިކޮޅު ފަރާތްތައް މަޖިލީހުގެ ތަޅުމުގައި އަޑުގަދަކޮށް އިހުތިޖާޖު ކުރި އެވެ.