ރާއްޖޭގެ ގައުމީ ޓީމުތަކަށް ކުޅެ ރިޓަޔާ ކުރާ ކުޅުންތެރިންނަށް ލޯނު ސްކީމެއްގެ އިތުރުން، ފަރުވާ ހޯދޭނެ އިންޝުއަރެންސް ސްކީމެއް ތައާރަފު ކުރަން ނިންމައިފި އެވެ.
ރައްޔިތުން މަޖިލީހުގައި މިއަދު ރިޔާސީ ބަޔާން އިއްވަމުން ރައީސް ސޯލިހު ވިދާޅުވީ ގައުމީ ޓީމަކަށް މަދުވެގެން ފަސް އަހަރު ކުޅެފައިވާ ކުޅުންތެރިން ރިޓަޔާ ކުރުމުން، ދިރިއުޅުމަށްޓަކައި އެހެން މަސައްކަތެއް ފެށުމަށް އެހީތެރިވެދިނުމުގެ ގޮތުން، މި އަހަރުގެ ތެރޭގައި ލޯން ސްކީމެއް ތައާރަފު ކުރަން މަސައްކަތް ކުރައްވަމުންދާ ކަމަށެވެ.
"ގައުމީ ޓީމުތަކުގެ ކުޅުންތެރިންނަށް ދިމާވާ ކުޅިވަރުގެ އަނިޔާތަކަށް ފަރުވާދެވޭނެ އިންޝުއަރެންސް ސްކީމެއް ތައާރަފްކޮށް އިރާދަކުރެއްވިއްޔާ މި އަހަރުގެ ތެރޭގައި ހިދުމަތް ލިބެން ފަށާނެ،" ރައީސް ވިދާޅުވި އެވެ.
ކުޅުންތެރިންނަށް ބޭރުން ކިޔެވުމުގެ ފުރުސަތު
ރައީސް އިތުރަށް ވިދާޅުވީ ބައިނަލްއަޤްވާމީ ފެންވަރަށް ކުޅުންތެރިން ބިނާކުރުމުގެ ސިޔާސަތުގެ ދަށުން ކުޅިވަރުގެ ހުނަރު ހޯދޭނެ ގޮތަށް ރާއްޖޭން ބޭރުން ކިޔެވުމުގެ ފުރުސަތު ހޯދައިދިނުމަށް ސަރުކާރުން ނިންމާފައިވާ ކަމަށެވެ.
މިދިޔަ އަހަރަކީ ރާއްޖޭގެ ކުޅިވަރުގެ ތާރީހުގައި ކާމިޔާބު އަހަރެކެވެ. ދިވެހި އެތުލީޓުން މިދިޔަ އަހަރު ވާދަކުރި ބައިނަލްއަގްވާމީ މުބާރާތްތަކުން، 13 ރަން މެޑެއްޔާއެކު، ޖުމްލަ 46 މެޑަލް ރާއްޖެ އަށް ހޯދައިދީފައިވެ އެވެ. މީގެތެރޭގައި ސައުތު އޭޝިއަން ގޭމްސްގެ 100 މީޓަރު ދުވުމުން، މިދިޔަ އަހަރު ރާއްޖެއަށް ލިބުނު ރަން މެޑެއްޔާއި އެ ކުޅިވަރު މުބާރާތުގެ ތާރީހުގައި ވެސް ރާއްޖެ އަށް ލިބުން ހިމެނެ އެވެ.