ޔޫރަޕުގެ މަޝްހޫރު އެތައް ކްލަބެއް ބައިވެރިވާ 13 އަހަރުން ދަށުގެ އިންޓަކޮންޓިނެންޓަލް ފުޓްބޯޅަ މުބާރާތް ރާއްޖޭގެ ޖޫނިޔަ ޓީމާއެކު މި މަހު ފަށާނެ އެވެ.
ރާއްޖޭގެ "ވިޒިޓް މޯލްޑިވްސް" އިން ސްޕޮންސަރުކަން ނަގާފައިވާ މި މުބާރާތުގައި ސްޕެއިނުގެ ރެއާލް މެޑްރިޑާއި ބާސެލޯނާގެ އިތުރުން އިނގިރޭސިވިލާތުގެ ޗެލްސީ އާއި މެންޗެސްޓާ ޔުނައިޓެޑް އަދި އިޓަލީގެ ޔުވެންޓަސްގެ އިތުރުން ދުނިޔޭގެ އެންމެ ބޮޑެތި ފުޓުބޯޅަ އެކަޑެމީ ތަކުން ބައިވެރިވެ އެވެ.
އިންޓަ ކޮންޓިނެންޓަލް މުބާރާތް އޮންނާނީ މި މަހުގެ 13-15 އަށް ދުބާއީގަ އެވެ. މި މުބާރާތުގެ ޑައިރެކްޓަރަކީ ސްޕޭންގެ ގައުމީ ޓީމާއި ރިއަލް މެޑްރިޑްގެ ކުރީގެ ކުޅުންތެރިޔާ މިޝޭލް ސަލްގާޑޯ އެވެ.
މި މުބާރާތުގެ ޕްރޮމޯޝަނަލް ވީޑިއޯ ނެރިފައިވާއިރު، މުބާރާތާ ބެހޭ ގޮތުން ދުނިޔޭގެ މަޝްހޫރު ފުޓުބޯޅަ ކުޅުންތެރިން ވަނީ ވާހަކަ ދައްކާފަ އެވެ. އެމީހުންގެ ތެރޭގައި ސަލްގާޑޯގެ އިތުރުން ރޮބާޓޯ ކާލޯސް އާއި އިންޓަ މިލާން އަދި އިޓަލީގެ ގައުމީ ޓީމުގެ ކުޅުންތެރިޔާ މާކޯ މަޓަރާޒީ އާއި ބްރެޒިލްގެ ކުރީގެ ކުޅުންތެރިޔާ ރިވާލްޑޯ ހިމެނެ އެވެ. ފްރާންސުގެ ކުރީގެ ކުޅުންތެރިޔާ ޑޭވިޑް ޓްރެޒެގޭ ފަދަ ކުޅުންތެރިން ހިމެނެ އެވެ.
ޓޫރިޒަމް މިނިސްޓްރީން ބުނެފައިވާ ގޮތުގައި ރާއްޖެ އިން މި މުބާރާތް ސްޕޮންސާ ކޮށްފައިވަނީ ރާއްޖޭގެ ޓޫރިޒަމް ޑައިވާސިފައި ކުރުމުގެ ތެރެއިން، ރާއްޖޭގެ ފުޅުބޯޅަ ތަރައްގީ ކުރުން ކަމަށް ޒުވާން ޓީމުތަކަށް ފުރުސަތު ދިނުމަށް ކަމަށެވެ. މި މުބާރާތުގައި ކުޅޭ ޓީމުތަކުގެ ޖޯޒީގައި ރާއްޖޭގެ އިޝްތިހާރު ޖެހުމުގެ އިތުރުން ބިލް ބޯޑުތަކުގެ ސްޕޮންސާ ވެސް ނަގާފައިވަނީ ރާއްޖެއިންނެވެ.