ބޮލީވުޑް ބަތަލާ ޝިލްޕާ ޝެޓީ އަށް އަންހެން ދަރިއަކު ލިބިއްޖެ އެވެ.
މިފަހަރު ލިބުނު ދަރިއަކީ ޝިލްޕާ އާއި އޭނާގެ ފިރިމީހާ ރާޖް ކުންދުރާގެ ދަރިއެއް ނަމަވެސް މި ކުއްޖާ ވިހާފައިވަނީ ސަރަގަސީ ކޮށެވެ. މާނައަކީ އެހެން އަންހެނެއްގެ ރަހިމުގައި ބޮޑުކޮށްގެންނެވެ.
ޝިލްޕާއަށް އަލަށް މި ލިބުނު ދަރިފުޅުގެ ނަމަކީ ސަމީޝާ ޝެޓީ ކުންދްރާ އެވެ. ދަރިއަކު ލިބުނުކަން ޝިލްޕާ އިއުލާންކޮށްފައިވަނީ އިންސްޓަގްރާމް މެދުވެރިކޮށެވެ. އޭނާގެ ޕޯސްޓްގައި ދަރިފުޅުގެ އަތް ފެންނަ ފޮޓޮއެއް ވެސް ޝެއާ ކޮށްފައި ވެއެވެ.
ޝިލްޕާ ބުނެފައިވާ ގޮތުގައި އޭނާގެ އަންހެންދަރިފުޅު އުފަންވީ ފެބްރުއަރީ 15 ވަނަ ދުވަހު އެވެ. ދަރިފުޅަށް ކިޔާފައިވާ ނަން ކަމަށްވާ ސަމީޝާގެ ސާ އަކީ ސަންސްކްރިތު ބަހެއް ކަމަށާއި މީޝާ އަކީ ރަޝިޔާ ބަހެއް ކަމަށް ވެސް ޝިލްޕާ ބުނެފައި ވެއެވެ.
ޝިލްޕާ އާއި ރާޖް ކުންދުރާ ކައިވެނިކޮށްފައިވަނީ 2009 ގެ ނޮވެމްބަރު މަހު އެވެ. މޭ 2012 ގައި ޝިލްޕާ ފިރިހެން ކުއްޖަކު ވިހާފައި ވެއެވެ. ވިއާން ރާޖް ކުންދުރާ އަށް މިހާރު ހަތް އަހަރެވެ.
