ޕްލާސްޓިކް ބޭނުން ކުރުން މަދު ކުރުމުގެ ގޮތުން، ހޮރައިޒަން ފިޝަރީޒް އާއި ބްލޫޔޫ ކޮންސަލްޓިން ގުޅިގެން ލ. އަތޮޅުގެ މަސް ދޯނިތަކުގައި ވޯޓާ ޕިއުރިފަޔާ ބަހައްޓަން ފަށައިފި އެވެ.
މި ޕްރޮޖެކްޓާ ބެހޭ ގޮތުން، ބްލޫޔޫ ކޮންސަލްޓިންގެ ފަރާތުން ރާއްޖޭގެ ޕްރޮޖެކްޓް މެނޭޖަރު އަބްދުﷲ ޝާކިރު މުހައްމަދު ވިދާޅުވީ ލ. އަތޮޅުގައި އެކަނި ވެސް ކޮންމެ ދަތުރަކު މަސްދޯނިތަކުން އެވްރެޖްކޮށް 45 ކޭސް ފެން ބޭނުން ކުރާ ކަމަށެވެ. މި މަޝްރޫއުގެ ސަބަބުން ޕްލާސްޓިކް ފުޅި ބޭނުން ކުރުން މަދު ކުރެވޭނެ ކަމަށް އޭނާ ވިދާޅުވި އެވެ.
މި ޕްރޮގްރާމުގެ ދަށުން ވޯޓާ ޕިއުރިފަޔާ ބަހައްޓާނީ ހޮރައިޒަން އާއި ބުލޫޔޫ ގުޅިގެން އުފައްދާފައިވާ "ފެއާ ޓްރޭޑް" ޕްރޮގްރާމުގައި ބައިވެރިވާ އޮޑި ފަހަރަށެވެ. މިހާރު ވެސް ޕައިލެޓް ޕްރޮޖެކްޓެއްގެ ދަށުން ލ. ހިތަދޫގެ ދެ ދޯންޏެއްގައި ހޮރައިޒަނުން ވަނީ ވޯޓާ ޕިއުރިފަޔާ ބަހައްޓައިފަ އެވެ.