ސައުދިއަރަބިއްޔާގައި ތައުލީމްދޭ ހުރިހާ އިދާރާތައް ބަންދުކޮށްފި އެވެ.
ސައުދީ ސަރުކާރުން މި ފިޔަވަޅު އަޅާފައިވާކަން ހާމަކޮށްފައިވަނީ ތައުލީމާ ބެހޭ ވަޒީރު މިރޭ ބޭއްވެވި ކުއްލި ނިއުސް ކޮންފަރެންސް އެއްގައެވެ.
މީގެ އިތުރުން ސުކޫލްތައް މުއްދަތެއް ނެތް ގޮތަށް ބަންދުކޮށްފައިވާކަން ބަޔާންކޮށް ވުޒާރަތުއް ތައުލީމުން ވަނީ ހާއްސަ ގަރާރެއްވެސް ނެރެފައެވެ. އެ ގަރާރުގައި ބުނެފައިވަނީ މާދަމާއިން ފެށިގެން މުއްދަތެއް ނެތް ގޮތަށް ތައުލީމުދޭ ހުރިހާ އިދާރާއެއްގެ ކިޔެވުން މެދުކަނޑާލާފައިވާ ކަމަށެވެ.
އެ ގަރާރުގައި ބުނެފައިވަނީ ސަރުކާރުގެ އަދި އަމިއްލަ ހުރިހާ ސުކޫލްތަކެއްވެސް މާދަމާއިން ފެށިގެން ބަންދުވާނެ ކަމަށެވެ.
މިފަދަ ގަރާރެއް ނެެރެފައިމިވަނީ ސުކޫލްތަކުގައި ހިންގާ ހުރިހާ ހަރަކާތްތަކެއް މުޅިން ހުއްޓާލުމަށްވެސް އަންގާފައިވަނިކޮށެވެ. ވުޒާރަތުއް ތައުލީމުން ބުނީ ދެން ކިޔަވަައިދިނުން ކުރިއަށްދާނީ އޮންލައިން ކޮށް ކަމަށެވެ.
ކޮރޯނާ ވައިރަހާއި ގުޅިގެން ސައުދީން ވަނީ ވަރުގަދަ ފިޔަވަޅުތަކެއް އަޅާފައެވެ. އެ ގައުމުގެ ހެލްތް މިނިސްޓްރީން ބުނީ މިއަދުވެސް އެ ގައުމުން ކޮރޯނާގެ ހަތަރު ކޭސް އެއް ފެނިފައިވާ ކަމަށެވެ. އޭގެ ތެރެއިން ތިން މީހަކީ ކޮރޯނާ ޖެހިފައިވާ މީހެއްގެ ކިބައިން އެ ވަައިރަހުގެ އަސަރު ކޮށްފައިވާ ތިން މީހުންނެވެ. ދެން ހުރި މީހަކީ އީރާނުން އައި މީހެކެވެ. އެހެން ކަމުން ސައުދީން މިހާރު ވަނީ އެގާރަ މީހަކަށް ކޮރޯނާ ޖެހިފައެވެ.
ހެލްތް މިނިސްޓްރީން ބުނީ މިއަދު ހަތަރު ކޭސް ފެނިފައިވަނީ ޤަޠީފް ސިޓީން ކަމަށެވެ. އެހެން ކަމުން ސަރުކާރުން ވަނީ މިހާރު އެ ސިޓީގެ ރައްޔިތުންގެ ރައްކާތެރި ކަމަށްޓަކައި ފިޔަވަޅުތަކެއް އަޅާފައެވެ.
އެގޮތުން އެ ސިޓީގެ ހުރިހާ ސުކޫލް، ޔުނިވާސިޓީތައް ވަނީ ދެ ހަފްތާގެ މުއްދަތަށް ބަންދުކޮށްފައެވެ.
ހެލްތް މިނިސްޓްރީން މިހާރު ވަނީ މުޅި ސައުދީއަށް ހާއްސަ ގަރާރެއްވެސް ނެެރެފައެވެ. އެގޮތުން ވޭތިވެދިޔަ ދެ ހަފްތާގައި މިސްރު، ލުބުނާން، އިޓަލީ އަދި ސައުތުކޮރެޔާއަށް ދަތުރުކޮށްފައިވާ އެ ގައުމުގެ ރައްޔިތުން ހޯމް އައިސޮލޭޝަންގައި ތިބުމަށް އަމުރުކޮށްފައެވެ. އެ އަމުރުގައިވާ ގޮތުން ދެ ހަފްތާގެ މުއްދަތަށް އައިސޮލޭޝަންގައި ތިބެން ޖެހޭނެއެވެ.
އަދި ސައުދީގެ އެެއްވެސް ރައްޔިތަކު އިރާނަށް ދަތުރުކުރުންވެސް ވަގުތީ ގޮތުން ވަނީ މަނާކޮށްފައެވެ.
ކޮރޯނާއާ ގުޅިގެން ސައުދީން ވަނީ އުމްރާގެ އަަޅުކަމަށް އެ ގައުމަށް އައުން ވަގުތީ ގޮތުން މަނާކޮށްފައެވެ.