ޑައިރެކްޓަރު އަނުބަވް ސިންހާގެ "ތައްޕަޅު" މީގެ ހަފުތާއެއް ކުރިން ރިލީޒް ކުރުމުން ކްރިޓިކްސް އާއި ބެލުންތެރިން އެ ފިލްމަށް ވަރަށް ތައުރީފުކުރި އެވެ. ނަމަވެސް ބޮކްސް އޮފީހުގައި އެ ފިލްމު މާ ރަނގަޅަށް ޕާފޯމް ކުރަމަކުން ނުދެ އެވެ. އެހެންވެ މި ފިލްމު އުންމީދުކުރި ވަރަށް ނުހިނގާ ކަމަށް އިންޑިއާގެ މީޑީއާ އަކުން ރިޕޯޓްކުރުމާ ގުޅިގެން ޑައިރެކްޓަރު ވަނީ ވަރަށް ރުޅިގަދަވެފަ އެވެ. އެ މީޑިއާ ރިޕޯޓުގައި ފިލްމާ ބެހޭ ގޮތުން ތަންކޮޅެއް ހަރުކަށި ބަސްތަކެއް ބޭނުންކޮށްފައި ހުރުމުން އަނުބަވް ސިންހާ ވެސް ރުޅިގަދަ ބޭނުންކުރީ ހަމަ އެހާމެ ހަރުކަށި ބަސް ތަކެކެވެ.
"ތައްޕަޅު" އަށް ފުރަތަމަ ހަފުތާގައި ލިބިފައިވަނީ 22.79 ކްރޯޑެވެ. އެހެންވެ އިންޑިއާގެ އޮންލައިން ނޫހަކުން ލިޔެފައިވާ ޚަބަރެއްގައި "ތައްޕަޅު"ގައި ވަރުގަދަ އެތިފަހަރެއް ބެލުންތެރިން އަޅައިފިކަމަށް ބުނެފައި ވެއެވެ. މި ޖުމްލައަކީ ޑައިރެކްޓަރުގެ އިތުރުން ފިލްމު އިންޑަސްޓްރީގެ އެހެން ބައެއް މީހުން ވެސް ރުޅިއައިސް ޝޮކް ލިބުނު ޖުމްލައަކަށް ވީއިރު ޑައިރެކްޓަރު އަނުބަވްގެ ރުޅި އިންތިހާއަށް ދިޔުމަކީ ހަމަ އެކަށީގެންވާ ކަމެއް ކަމަށް ގިނަ ބަޔަކު ދެކެ އެވެ.
އަނުބަވް ސިންހާގެ ޓުވީޓްގައި ބުނެފައިވާ ގޮތުގައި އެ ފިލްމަށް ޚަރަދުކުރީ އޭނާގެ ފައިސާ އެވެ. އެއީ އޭނާގެ ފިލްމެކެވެ. އަދި އެ ފިލްމުގެ ގެއްލުމާއި ފައިދާ ވެސް އޮތީ އޭނާއަށެވެ. އެއީ އާއްމުންނަށް ޝެއާ ވިއްކައިގެން އުފެއްދި ފިލްމެއްތޯ އާއި އެފިލްމުގެ ޝެއާ އެއްވެސް މީހަކު ގަނެފައިވޭތޯ އޭނާގެ ޓުވީޓްގައި ސުވާލުކޮށްފައި ވެއެވެ.
"ގޮސް ފިލްމު ބަލާބަލަ. ފިލްމު ކަމުދިޔަސް ނުދިޔަސް އެއީ ކަލޭމެންގެ އަމިއްލަ ކަމެއް،" އަނުބަވްގެ ޓުވީޓްގައި ވެއެވެ.
އޭނާ އިތުރަށް ބުނި ގޮތުގައި އޭނާއަށް ވުރެ ކުރިން އޭނާގެ ފިލްމަށް ލިބުނު ވަރު އެހެން މީހުންނަށް އެނގެ އެވެ. އޭނާއަށް އެ އަދަދުތައް ލިބުނީ ފިލްމު ރިލީޒްކުރާތާ 2-3 ދުވަސް ފަހުންނެވެ. ވަރަށް ހުތުރު ބަހުން ވެސް އަނުބަވްގެ އެހެން ޓުވީޓެއްގައި އެ ރިޕޯޓު ލިޔުނު މީޑިއާ އާ މުޚާތަބުކޮށްފައި ވެއެވެ. ނަމަވެސް އޭގެ އިރުކޮޅެއް ފަހުން އޭނާ ވަނީ ހުތުރު ބަސްތައް ބޭނުން ކުރެވުނީތީ މައާފަށް އެދިފަ އެވެ.
ތާޕްސީ ޕަންނޫ ބަތަލާގެ ބައި ކުޅެފައިވާ "ތައްޕަޅު" އަކީ ދެމަފިރިއެއްގެ ދިރިއުޅުމުގެ ވާހަކަ އެކެވެ. ފިރިހެންމީހާ ރުޅިއައިސްގެން އަންހެންމީހާގެ މޫނުގައި ޖަހާ އެންމެ އެތިފަހަރަކުން އެ ކައިވެނީގެ އިތުރަށް ދެމި ނުހުންނަން އަންހެންމީހާ ނިންމަ އެވެ. މިއީ ވަރަށް ނާޒުކު މައުލޫއަކަށް ވެފައި މި މައުލޫއަށް ފިލްމުގައި އަނުބަވް އިންސާފްކޮށްފައިވާލެއް ފުރިހަމަކަމުން ފިލްމު ބެލި އެންމެން ކަހަލަ ގޮތަކަށް އޭނާޔަށް ވަރަށް ބޮޑަށް ތައުރީފުކޮށްފައި ވެއެވެ. ފިލްމު އިންޑަސްޓްރީގެ ވަރަށް ގިނަ ބަޔަކު ވެސް މިއީ މަދުން ނޫނީ ނުފެންނަ ވަރުގެ މޮޅު ފިލްމެއް ކަމަށް ބުނެ ސޯޝަލް މީޑިއާގައި ފިލްމަށް ތައުރީފުކޮށްފައި ވެއެވެ.
ފިލްމު އެކްޓަރު އަޔުޝްމާން ކުރާނާ ބުނެފައިވާ ގޮތުގައި "ތައްޕަޅު"އަކީ މި ޖެނެރޭޝަނަށް ވަރަށް މުހިއްމު ފިލްމެއް ކަމަށެވެ.
ތާޕްސީގެ އިތުރުން "ތައްޕަޅު"ގައި ދިޔާ މިރްޒާ، ތަންވީ އަޒްމީ، ރަތުނާ ޕާތަކް ޝާހް ފަދަ ތަރިން ބައިވެރި ވެފައި ވެއެވެ.
"ތައްޕަޅު"އަކީ ކުޑަ ބަޖެޓަކުން އުފައްދާފައިވާ ފިލްމަކަށް ވެފައި ދެ ވަނަ ހަފުތާގައި ފިލްމުގެ ވިޔަފާރި ފުރަތަމަ ހަފުތާއަށް ވުރެ ވެސް ރަނގަޅުވެފައިވުމާއެކު ފިލްމަށް ހިޓް ފިލްމެއްގެ ދަރަޖަ ލިބުމަކީ ވަރަށް ގާތް ކަމެއް ކަމަށް ޓްރޭޑް އެނަލިސްޓުން މިހާރު ބުނެ އެވެ.