އަކްޝޭ ކުމާރާއި ކެޓުރީނާ ކައިފް އަދި އަޖޭ ދޭވްގަން އާއި ރަންވީރު ސިންގްގެ "ސޫރިޔަވަންޝީ" ރިލީޒް ކުރުން ވަކި މުއްދަތެއް ނެތް ގޮތަށް ފަސްކޮށްފި އެވެ. ފިލްމުގެ ޑައިރެކްޓަރު ރޯހިތު ޝެޓީ އިންސްޓަގްރާމްގައި ޕޯސްޓްކުރި މެސެޖެއްގައި ބުނެފައިވާ ގޮތުން އެ މީހުން ބޭނުންވީ އާއިލާގެ އެންމެންނަށް ބަލާ ލެވޭ ގޮތަށް "ސޫރިޔަވަންޝީ" ރިލީޒް ކުރާށެވެ. ނަމަވެސް ކޮރޯނާވައިރަސް ވަރަށް ހަލުވިކޮށް މުޅި ދުނިޔޭގައި ފެތުރެމުންދާތީ އެ ފިލްމު ރިލީޒްކުރަން ފަސްކުރަން ފިލްމު އުފެއްދި ފަރާތުން ނިންމީ އެވެ.
އެއީ ބެލުންތެރިންގެ ސިއްހަތާއި ރައްކާތެރިކަމަށް ވިސްނާފައި އެޅި ފިޔަވަޅެއް ކަމަށް ވެސް ރޯހިތު ބުނެފައި ވެއެވެ. އޭނާ އިތުރަށް ބުނެފައިވާ ގޮތުގައި ކޮރޯނާވައިރަސްގެ މައްސަލަ ހައްލުވެ ގައުމު ހަމަޔަށް އެޅުމުން "ސޫރިޔަވަންޝީ" ރިލީޒްކުރާނެ އާ ދުވަހެއް ކަނޑައަޅާނެ އެވެ.
ރޯހިތުމެން މި ފިޔަވަޅު އެޅުމުގެ ކުރިން ފޭނުން ވަނީ ސޯޝަލް މީޑިއާގައި މި ފިލްމު ރިލީޒްކުރުން އެޕްރީލް 10 އަށް ލަސްކޮށްލުމަށް ގޮވާލާފަ އެވެ. ކުރިން މި ފިލްމު ރިލީޒްކުރަން ހަމަޖެހިފައި އޮތީ މާޗް 24 ވަނަ ދުވަހު އެވެ. އަދި ވަރަށް ގިނަ ތަރިންތަކެއް ބައިވެރިވެގެން މާޗް 2 ވަނަ ދުވަހު ވަނީ ފިލްމުގެ ޓްރެއިލާ ލޯންޗުކުރަން ވަރަށް ކުލަގަދަ ރަސްމިއްޔާތެއް ބާއްވާފަ އެވެ.
ފިލްމު ރިލީޒްކުރުން ލަސްކުރިކަން އިއުލާންކުރުމުގެ ކުރިން ފިލްމުގެ ޕްރޮޑިއުސަރު ކަރަން ޖޯހަރް އާއި ޓީމުން ވަރަށް ގިނަ ބައްދަލުވުންތައް ބާއްވައި މިކަމާ މެދު މަޝްވަރާ ކޮށްފައި ވެއެވެ.
މިވަގުތު އަދި ފިލްމު ރިލިޒްކުރާނެ ތާރީޚެއް އިއުލާން ނުކުރި ނަމަވެސް އިންޑީޔާގައި ކޮރޯނާވައިރަސް ފެތުރޭ މިންވަރު ދަށްވެއްޖެނަމަ އޭޕްރީލް 10 ގައި ފިލްމު ރިލީޒްކުރުމަކީ އެކަށީގެންވާ ކަމެކެވެ. އެހެން ވެއްޖެނަމަ މި ފިލްމާ ބޮކްސް އޮފީހުގައި ކުރިމަތިލާންޖެހޭނީ ރަންވީރު ސިންގްގެ "83" އާއެވެ. މިއީ އިންޑިޔާގެ ކުރީގެ މަޝްހޫޜު ކްރިކެޓް ކުޅުންތެރިޔާ ކަޕިލް ދޭވްގެ ހަޔާތުގެ މައްޗަށް ކުޅެފައިވާ ފިލްމެކެވެ. މި ފިލްމުގައި ކަޕިލްގެ އަންހެނުންގެ ރޯލު ކުޅެނީ ދީޕިކާ ޕަދުކޯން އެވެ.
