ސާކްގެ އެހެން ގައުމުތަކަށް އެތެރެ ކުރާ ފުށާއި ހަކުރަށްވުރެ އެސްޓީއޯއިން އެތެރެ ކުރާ ފުށާއި ހަކުރުގެ ފެންވަރު ރަނގަޅުވާނެ ކަމަށް އެސްޓީއޯއިން ބުނެފި އެވެ.
މެނޭޖިން ޑިރެކްޓަރު އަހުމަދު ޝަހީރު ވިދާޅުވީ އެ ކުންފުނިން ގެންނަ ފުށުގައި ނުރައްކާތެރި ކެމިކަލެއް ހުރި ކަމަށް ބުނެ މިދުވަސްވަރު ސޯޝަލް މީޑިއާގައި ފެތުރެމުންދާ ވާހަކަތަކަކީ އެކަމުގައި އެއްވެސް ހަގީގަތެއް އޮތް ވާހަަކަަތަކެއް ނޫން ކަމަށެވެ. އަދި ވިދާޅުވީ އެކުންފުނިން ރާއްޖެ އެތެރެ ކުރާ ފުށާއި ހަކުރުގެ ސްޓޮކްގައި މައްސަލައެއް އުޅޭނަމަ އެ ޝިޕްމަންޓްއެއް އަންބުރާ ފޮނުވާލާނެ ކަމަށެވެ.
"އެސްޓީއޯއިން އެތެރެކުރާ ފުށާއި ހަކުރުގެ ފެންވަރު ސާކު [އެހެން] ގައުމު ތަކަށް މިހާރު އެތެރެ ކުރާ ފުށާއި ހަކުރަށް ވުރެ ފެންވަރު ރަނގަޅުވާނެ،" އޭނާ ވިދާޅުވި އެވެ.
އެސްޓީއޯ އަށް ހަކުރާއި ފުށް އެތެރެ ކުރާ ގައުމުތަކެއް ނުބުނެ އެވެ. އެކަމަކު ހަނޑޫ އެތެރެ ކުރަނީ އިންޑިޔާއިންނެވެ.
އެސްޓީއޯއިން ގެނނަ ފުށުގައި ކެމިކަލްއެއް އެކުލެވިފައިވާ ކަމަށްބުނެ ވަނީ ވާހަކަތައް ފެތުރިފައެވެ. އަދި ގޮދަން ފުށުގައި ކެމިކަލްއެއް އެކުލެވޭ ކަމަށް ބުނެ އެސްޓީއޯ ނަމުގައި މެސެޖެއް ވެސް ވަނީ ދައުރުކޮށްފައެވެ.