ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ ތަކެތި ރާއްޖެ އެތެރެކުރާނަމަ އެ ތަކެތި ހިފަހައްޓަން ހެލްތު މިނިސްޓްރީ އިން މޯލްޑިވްސް ކަސްޓަމްސް ސާވިސްއަށް އަންގައިފި އެވެ.
ހެލްތު މިނިސްޓްރީ އިން ކޮމިޝަނާ ޖެނަރަލް އޮފް ކަސްޓަމްސް ފާތިމަތު ދިޔާނާއަށް މި އެންގުން އަންގާ ނިމިގެންދިޔަ ޑިސެމްބަރު 24 ވަނަ ދުވަހު ފޮނުވި ސިޓީއެއް ސޯޝަލްމީޑިއާގައި މިހާރު ވަނީ އާންމުވެފަ އެވެ.
ރަސްމީ އިދާރާތަކުން މިއީ ސައްހަ ލިޔުމެއް ކަމަށް ޔަގީންކޮށްދީފައި ނުވި ނަމަވެސް މި ލިޔުމަކީ ސައްހަ ލިޔުމެއް ކަމަށް އިތުބާރު ކުރެވޭ ބައެއް ފަރާތްތަކުން އަވަސްއަށް ޔަގީންކޮށްދީފައިވެ އެވެ.
މިސިޓީ އާންމުވުމާއެކު ދުންފަތް އޮޅާ ކަރުދާހާއި ފިލްޓަރު ފަދަ ތަކެތި ވިއްކާ ފިހާރަތަކުގެ ކުރިމަތީގައި ވަނީ ދިގު ކިއުތަކެއް ހަދާފަ އެވެ.
ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ރާއްޖޭގައި ދުންފަތް އުފެއްދުމަކީ މިހާރުވެސް މަނާކޮށްފައި އޮންނަ އެކަމަކު ހަރުދަނާ ގޮތަކަށް ތަންފީޒު ކުރެވެމުން ނުދާ ކަމެކެވެ.
ރާއްޖެއަށް ވޭޕް އެތެރެކޮށް ބޭނުން ކުރުންވެސް މިދިޔަ ނޮވެމްބަރު 15 ވަނަ ދުވަހުން ފެށިގެން ވަނީ މަނާކޮށްފަ އެވެ.
ކަސްޓަމްސްގެ ކޮމިޝަނާ ޖެނަރަލް އަށް މިނިސްޓްރީ އިން ފޮނުވި ސިޓީގައި ބުނެފައިވަނީ ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އެއްވަނަ އިސްލާހުގައި، އެ ގާނޫނުގެ 10 ވަނަ މާއްދާގެ ދަށުން ރާއްޖޭގައި އެއްވެސް މިންވަރަކަށް ދުންފަތް އަދި ދުންފަތުގެ ބާވަތްތައް އުފެއްދުމަކީ މަނާކަމެއް ކަމަށް ކަނޑައަޅާފައިވާ ކަމަށެވެ.
ދުންފަތް ކޮންޓްރޯލް ކުރުމާ ބެހޭ ގާނޫނުގެ 42 ވަނަ މާއްދާގެ (ދ) ގައި "ދުންފަތުގެ ބާވަތްތައް" މާނަކޮށްދީފައިވާ ގޮތްވެސް ސިޓީގައި މައުލޫމާތަށްޓަކައި ހިއްސާކޮށްފައިވެ އެވެ. އެގޮތުން ދުންފަތާއި ދުންފަތުގެ ތަނޑި އާއި ނިކޮޓިން އާއި އެ ތަކެތި ހިމަނައިގެން ތައްޔާރުކޮށްފައި ހުންނަ ތަކެތި ދުންފަތުގެ ބާވަތުގެ ތެރޭގައި ހިމެނޭކަން ފާހަގަކޮށްފައިވެ އެވެ.
އެފަދަ އެއްވެސް ބާވަތެއް، އެއްވެސް މިންވަރަކަށް ހިމެނޭ އެއްޗެއް ހަފައިގެން، ބޮއެގެން، ވަސްދަމައިގެން، ހަށިގަނޑުގެ ތަނެއްގައި ތަތްކޮށްގެން، ޖައްސައިގެން ނުވަތަ އުނގުޅައިގެން ވިޔަސް، ހަށިގަނޑަށް ވާސިލުވާ ގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާވަތެއް ކަމަށްވެސް ފާހަގަކޮށްފައިވެ އެވެެ.
"ވީމާ ދުންފަތުގެ ބާވަތެއް އުފެއްދުމަކީ މަނާކަމެއް ކަމުގައިވާތީ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އާލާތެއް އެއްވެސް ފަރާތަކުން އެތެރެކޮށްފިނަމަ، އެ ތަކެތި ހިފަހައްޓައި ނައްތާލުމަށް ދަންނަވަމެވެ،" ސިޓީގައި ބުންޏެވެ.
ސަރުކާރުން މިދިޔަ ނޮވެމްބަރު މަހުގެ ތެރޭގައި ވަނީ ސިނގިރޭޓާއި ބިޑީގެ ޑިއުޓީ ވެސް 50 ޕަސެންޓް ބޮޑުކޮށްފަ އެވެ.
ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ ތަކެތި ރާއްޖެ އެތެރެކުރުން ހުއްޓުވަން އެންގި ނަމަވެސް ދުންފަތުން ދުރުހެލިވުމަށް "ސެޒޭޝަން" ފަރުވާގެ ތެރެއިން ދެވޭ އަދި ގުޅޭ ފަންނީ އިދާރާތަކުން ކަނޑައަޅައި ހުއްދަކޮށްފައިވާ ނިކޮޓިން ރިޕްލޭސްމަންޓް ތެރަޕީ ނުވަތަ ފަރުވާގެ ގޮތުގައި ބޭނުންކުރާ ތަކެތި ދުންފަތުގެ ބާވަތްތައް ކަމަށް ނުބެލެވޭނެ ކަމަށް ގާނޫނާ ހަވާލާދީ ހެލްތު މިނިސްޓްރީ އިން ބުނެ އެވެ.