ޒީ ސިނެ އެވޯޑްސް 2020 ދިނުމުގެ ހަފުލާ ބާއްވައިފި އެވެ. ކޮރޯނާވައިރަހަށް ބިރުން މިފަހަރު މިހަފުލާ ބާއްވާފައިވަނީ އޯޑިއަންސް އާ ނުލަ އެވެ.
ބޮލީވުޑް ތަރިންގެ ތެރެއިން ރިތިކް ރޯޝަން، ރަންވީރު ސިންގް، ސާރާ އަލީ ޚާން، ތާޕްސީ ޕަންނޫ، ރާޖްކުމާރު ރާއޯ، އަނަންޔާ ޕާންޑޭ، ކާރްތިކް އާރްޔަން، އަޕަރްޝަކްތީ ކުރާނާ އަދި ގޯވިންދާ މި ހަފުލާގައި ބައިވެރިވެ ޓީވީން ދައްކަން ހަމަޖެހިފައިވާ މި އެވޯޑު ޝޯއަށް ޚާއްސަކޮށް ޑާންސް ޕާފޯމަންސްތައް ޝޫޓްކުރި އެވެ.
މިފަހަރުގެ ޒީ ސިނެ އެވޯޑުގައި އެންމެ މޮޅު ބަތަލުގެ އެވޯޑު ލިބުނީ "ގަލީ ބޯއީ" އިން ރަންވީރު ސިންގް އަށެވެ. ބެސްޓް އޮންސްކްރީން ޕެއާ ވެސް ލިބުނީ ޒޯޔާ އަޚްތަރު ޑައިރެކްޓްކޮށްފައިވާ "ގަލީ ބޯއީ" ގެ ދެ އެކްޓަރުން ކަމަށްވާ ރަންވީރު އާއި ސިދާންތު ޗަތުރަވޭދީ އަށެވެ.
އެވޯޑުތަކާއެކު ނަގާފައިވާ ފޮޓޯތައް ޝެއާ ކުރަމުން ރަންވީރު ވަނީ މިފަހަރު އޭނާއަށް އެންމެ މޮޅު އެކްޓަރު އެވޯޑާއި އަހަރުގެ އެންމެ މޮޅު ލަވައިގެ އެވޯޑު އަދި "ބެސްޓް އޮންސްކްރީން ޕެއާ" ގެ އެވޯޑު ލިބިފައިވާ ކަމަށް ބުނެފަ އެވެ.
ބެސްޓް ޑެބިއު އެވޯޑު (ފިރިހެން) ވެސް ލިބިފައިވަނީ "ގަލީ ބޯއީ" ކުޅެގެން ސިދާންތު އަށެވެ. ބެސްޓް އެކްޓަރު (ކޮމިކް ރޯލު) ލިބުނީ "ޕަތީ ޕަތުނީ އައުރު ވޯ" ކުޅެގެން ކާރްތިކް އާރްޔަން އަށެވެ.
އެންމެ މޮޅު އަންހެން އެކްޓަރުގެ އެވޯޑު ލިބުނީ "ބަދްލާ" އިން ތާޕްސީ ޕަންނޫ އަށެވެ. ތާޕްސީ ވެސް އޭނާގެ އެވޯޑާއެކު ނަގާފައިވާ ފޮޓޮއެއް އިންސްޓަގްރާމްގައި ޝެއާ ކޮށްފައި ވެއެވެ.
"އެންޓަޓައިނާ އޮފް ދަ އިޔާ" އެވޯޑު ގެންދިޔައީ އަޔުޝްމާން ކުރާނާ އެވެ. މި އެވޯޑު ސެރެމަނީގެ ވަރަށް ގިނަ މަންޒަރުތައް ހިމެނޭ ވީޑިއޯތައް މިހާރު ސޯޝަލް މީޑިއާގައި ދައުރުވަމުން އެބަދެ އެވެ.
މި އިވެންޓުގައި ރިތިކް ރޯޝަން ވަނީ އޭނާގެ 2019 ގެ ބްލޮކްބަސްޓާ ފިލްމު "ވޯ"ގެ 'ގުންގުރޫ" ލަވަޔަށް ނަށާފަ އެވެ. ސާރާ އަލީ ޚާން ވަނީ ގޯވިންދާ އާއެކު "މައި ތޮ ރަސްތޭސެ ޖާ ރަހަ ތާ" ލަވަޔަށް ނަށާފަ އެވެ. އަދި ރަންވީރު ވެސް ވަރަށް އެނާޖީ ލެވެލް މަތީ ޕާފޯމަންސެއް ދިނެވެ.
މި ޝޯ ހޯސްޓްކުރީ ރާޖްކުމާރު ރާއޯ އާއި އަޕާރްޝަކްތީ އަދި ކާރްތިކް އާރްޔަން އެވެ. މި އިވެންޓް ޒީ-ޓީވީ އާއި ޒީ-ސިނެމާއިން މާޗް 28، 2020 ގެ ރޭގަނޑު 7.30 ގައި ދައްކަން ވަނީ ހަމަޖެހިފަ އެވެ.