ރައީސް އިބްރާހީމް މުހައްމަދު ސޯލިހް، ވަޒީފާއާބެހޭ ޓްރައިބިއުނަލްގެ ރައީސްކަމަށް ގއ. މާމެންދޫ އަލިވާގެ، އަމްޖަދު މުސްތަފާ އަދި ޓްރައިބިއުނަލުގެ މެންބަރުކަމަށް މ. ހާދޫ، ހަސަން އިބްރާހީމް މިއަދު އައްޔަން ކުރައްވައިފި އެވެ.
ވަޒީފާ އާ ބެހޭ ޓްރައިބިއުނަލްއަށް އެ ދެ ބޭފުޅުން އައްޔަން ކުރެއްވީ މިއަދު މެންދުރުފަހު ރައީސް އޮފީހުގައި އެކަމަށްޓަކައި ބޭއްވި ރަސްމިއްޔާތެއްގަ އެވެ. މި ރަސްމިއްޔާތުގައި ވަޒީފާއާ ބެހޭ ޓްރައިބިއުނަލްއަށް އައްޔަން ކުރެއްވި ކަމުގެ ލިޔުން، ރައީސް ވަނީ އެ ދެ ބޭފުޅުންނަށް ހަވާލު ކުރައްވާފަ އެވެ.
ޓްރައިބިއުނަލްގެ ރައީސް ކަމަށް އައްޔަންކުރި އަމްޖަދު މީގެ ކުރިން ހުންނެވީ އިލެކްޝަންސް ކޮމިޝަން (އީސީ) ގެ ނައިބު ރައީސް ކަމުގަ އެވެ. އޭނާގެ ދައުރު ހަމަވުމުން ދެވަނަ ދައުރަކަށް ވެސް އެ ކޮމިޝަންގެ މެންބަރު ކަމަށް ކުރިމަތިލެއްވި އެވެ. އެކަމަކު ރައްޔިތުންގެ މަޖިލީހުން ރުހުން ދިނީ އެ ކޮމިޝަންގެ ކުރީގެ ރައީސް ފުއާދު ތައުފީގަށެވެ.
އަމްޖަދު ވަނީ މީގެ ކުރިން އެމްޓީޑީސީގެ ބޯޑު ޑިރެކްޓަރުކަން ވެސް ކުރައްވާފައެވެ. އަދި ލަންކާގައި ހުންނަ އެންގްލިއާ ރަސްކިން ޔުނިވަރސިޓީން މާސްޓާ އޮފް ބިޒްނަސް އެޑްމިނިސްޓްރޭޝަން އާއި، އިސްލާމިކް ޔުނިވަރސިޓީ އޮފް މޯލްޑިވްސް އިން ބެޗްލާ އޮފް ޝަރީއާ އެންޑް ލޯ ވެސް އޭނާ ހާސިލު ކުރެއްވި އެވެ.
ޓްރައިބިއުނަލްގެ މެންބަރުކަމަށް އައްޔަނު ކުރެއްވި، ހަސަން އިބްރާހީމް ކުރިން ވަނީ ގައުމީ ޔުނިވާސިޓީގެ ބިޒްނަސް ސްކޫލުގެ ހެޑް އޮފް ޑިޕާޓްމަންޓް ކަމާއި އެމްބީއޭ ކޯސް ކޯޑިނޭޓަރު ކަމާއި ލެކްޗަރާ ކަން ކުރައްވާފަ އެވެ. އަދި ވިޒިޓިން ލެކްޗަރާއެއްގެ ގޮތުގައި އިސްލާމިކް ޔުނިވާސިޓީއާއި ވިލާ ކޮލެޖުގައި އޭނާ ހަރަކާތްތެރިވެވަޑައިގެންނެވި އެވެ.
ހަސަން އިބްރާހީމް ވަނީ އޮސްޓްރޭލިއަން ނެޝަނަލް ޔުނިވާސީޓީން މާސްޓާ އޮފް ބިޒްނަސް ހާސިލުކުރައްވާފައެވެ. އޭގެ އިތުރުން އެނާ ވަނީ އިސްލާމިކް ޔުނިވަރސީޓީން ބެޗްލާ އޮފް ޝަރީއާ އެންޑް ލޯ ހާސިލް ކުރައްވާފައެވެ.