ހައުސިން ޑިވްލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އިން ލޯނު ނަގާ ފަރާތަކަށް ގުދުރަސީ ހާދިސާއެއް ދިމާވެ، ލޯނު ދެއްކުމަށް ދަތިވާ ދަނޑިވަޅުތަކުގައި އިންޝުއަކޮށްދޭ ސްކީމެއް އެލައިޑުން މިއަދު ތައާރަފުކޮށްފި އެވެ.
އެލައިޑް އޮފީހުގައި މިއަދު ބޭއްވި ރަސްމިއްޔާތެއްގައި އެ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު އަމީލް އެވެ. އަދި އެޗްޑީއެފްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޑރ. އޭޑީޕީ ބައްދަވިތާނާ އެވެ.
އެލައިޑްގެ މެނޭޖިން ޑިރެކްޓަރު އަހުމަދު އަމީލް ވިދާޅުވީ މި އިންޝުއަރެންސްގެ ސަބަބުން ލޯނު ނަގާ ފަރާތްތައް ދިމާވާ ދަތިތަކަށް ލުއިކަމެއް ލިބިގެން ދާނެ ކަމަށެވެ.
"ލޯނު ނަގާ ފަރާތްތައް ދިމާވާ ގުދުރަތީ ހާދިސާތަކުގައި މަރުވުން ނޫނީ އެކްސިޑެންޓެއްގެ ސަބަބުން ލޯނު ދެއްކުމަށް ދަތިވާ ދަނޑުވަޅުތަކުގައި މި ސްކީމްގެ ބޭނުން ބޮޑުވާނެ،" އަމީލް ވިދާޅުވި އެވެ.
"މޯގޭޖް" އިންސުއަރެންސް ސްކީމެއްގެ ގޮތުގައި ތައާރަފުކުރި މި ސްކީމުގައި ބައިވެރިވުމަށް ލޯނު ނަގާ ފަރާތްތަކަށް މަޖުބޫރެއް ނޫނެވެ.
"މި ސްކީމްގައި ބައިވެރިވުމަކީ އޮޕްޝަނަލް ކަމެއް،" ޑރ. ބައްދަވިތާނާ ވިދާޅުވި އެވެ.
ނަމަވެސް، މި ސްކީމުގައި ބައިވެރިވުމަށް ޕްރިމިއަމް، ދައްކަން ޖެހޭނެ ކަމަށް އެލައިޑް އިންޝުއަރެންސުން ބުނެ އެވެ.
"މި ސްކީމުގައި ބައިވެރިވުމަށް ދައްކަން ޖެހޭ ޕްރިމިއަމް ބޮޑެއް ނުވާނެ،" އަމީލް ވިދާޅުވި އެވެ.
އެޗްޑީއެފްސީގެ ސީނިޔަ މެނޭޖަރު ބިޒްނަސް ޑިވްލޮޕްމަންޓް އަހުމަދު ޝަފީގު ވިދާޅުވީ އެ ކުންފުނީގެ ލޯނު ނަގަނީ އާއްމު ގޮތެއްގައި 8-6 މީހުންގެ ބައިވެރިވެގެން ކަމަށާއި، އެހެންކަމުން މި ސްކީމްގެ ބޭނުން ބޮޑު ކަމަށެވެ.
"ލޯނު ނަގާ ފަރާތައް ލޯނު ދެއްކުމުގައި އެއްވެސް މައްސަލައެއް ދިމާވެއްޖެނަމަ މިކަމުގެ އެހީތެރިކަން ފޯރުކޮށްދޭނެ،" ޝަރީގު ވިދާޅުވި އެވެ.