ކޮވިޑް-19 އާ ގުޅިގެން މިހާރު އަމަލުކުރަމުންދާ އުސޫލު ބަދަލުކޮށް، ރާއްޖޭގައި ކަރަންޓީނުކުރާ ހުރިހާ އެންމެން ޓެސްޓުކުރަން ނިންމާފައިވާ ކަމަށް ސަރުކާރުން މިއަދު ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަލީ ލަތީފު ވިދާޅުވި ގޮތުގައި ބޭރުގެ އެކި ގައުމުތަކުން އަންނަ ދިވެހިން ވެސް 14 ދުވަހަށް ކަރަންޓީނު ކުރުމަށް ނިންމާފައިވާއިރު، އެ މީހުންވެސް ކަރަންޓީނުން ދޫކުރާނީ ކޮވިޑް-19 އަށް ޓެސްޓުކުރުމަށްފަހުގައި ކަމަށެވެ.
ކޮވިޑް-19 އާ ގުޅިގެން ކަރަންޓީނުކުރުމާއި ޓެސްޓު ކުރުމަށް ސަރުކާރުން އަމަލު ކުރަމުންދާ އުސޫލަށް ބަދަލު ގެންނަން ނިންމާފައިވަނީ، ރާއްޖޭގައި 14 ދުވަހުގެ ކަރަންޓީންގައި ތިބުމަށް ފަހު ފުރި އިޓަލީގެ ދެ މީހަކު ކޮވިޑް-19 އަށް ޕޮޒިޓިވްވެފައިވާކަން ހާމަވުމާ ގުޅިގެންނެވެ.
ސަރުކާރުން މީގެ ކުރިން ބުނެފައިވަނީ، ކޮވިޑް-19 އަށް ޕޮޒިޓިވްވި މީހަކާ ކޮންޓެކްޓްވެފައިވާ އެ ދެ އިޓަލީ ފަތުރުވެރިން 14 ދުވަހުގެ މުއްދަތަކަށް ކަރަންޓީން ފެސިލިޓީއަކަށް ބަދަލު ކުރި ކަމަށާއި އެ މުއްދަތަށް ފަހު އެ މީހުން ރާއްޖެއިން ފުރުމުގެ ކުރިން ވައިރަހަށް ޓެސްޓު ކުރި ކަމަށެވެ. އަދި އެ ދެ މީހުން ފުރި ފަހުން ޓެސްޓުތަކުގެ ނަތީޖާ އައިސް، އެ ދެ މީހުން ކޮވިޑް-19 އަށް ޕޮޒިޓިވްވެފައިވާ ކަމަށް ސަރުކާރުން ބުނެފައިވެ އެވެ.
އެކަމާ ގުޅިގެން ސަރުކާރަށް ފާޑުކިޔުންތައް އަމާޒުވެފައިވާއިރު، ޑރ. އަލީ ލަތީފު ވިދާޅުވި ގޮތުގައި، އެކަމުގައި އަމަލުކުރި ގޮތް ތަފާތުވެފައިވަނީ ސަފާރީއަކުން ޕޮޒިޓިވްވި މީހަކާ ކޮންޓެކްޓުވި ބަޔަކުގެ ކަރަންޓީނުކުރުމުގެ މުއްދަތު ގުނުމުގައި ކަމަށެވެ.
"އާންމު ގޮތެއްގައި އަޅުގަނޑުމެން ކަރަންޓީނު މި ކުރަނީ ވަކިވަކި ކޮޓަރިތަކުގައި. ކަރަންޓީނު މި ކުރަނީ 14 ދުވަހަށް. ސަފާރީ ބޯޓެއް ކަރަންޓީނު ކުރުމުގައި، އޭގައި ހުރި ޓޫރިސްޓަކު ޕޮޒިޓިވް ވުމާ އެކު ކަރަންޓީނު ކުރަން އެންގީ މި މަހުގެ 13 ގައި. ތާރީހު ގުނަން ފެށީ 13 ވަނަ ދުވަހުން ފެށިގެން. އެ އުސޫލުން 14 ދުވަސްކޮށްފައި އެ ޓޫރިސްޓުން ދޫކޮށްލީ،" އޭނާ ވިދާޅުވި އެވެ.
ޑރ. އަލީ ލަތީފު ވިދާޅުވީ މިހާރު އަމަލު ކުރަމުންދާ އުސޫލު ބަދަލުކޮށް، މާދަމާގެ ވަގުތެއްގައި އާ އުސޫލު އާއްމު ކުރާނެ ކަމަށެވެ. އަދި އެ އުސޫލުގެ ދަށުން، އެއްވެސް މީހަކު ކަރަންޓީނުން ދޫކުރާނީ، ޓެސްޓު ހެދުމަށްފަހު ކަމަށް އޭނާ ވިދާޅުވި އެވެ.
"ކަރަންޓީން ކުރުމަށް ފަހު 14 ދުވަސް ހަމަވީމަ އަޅުގަނޑުމެން މީގެ ކުރިން ޓެސްޓެއް ހަދާކަށް އެއްވެސް ޕްރޮޓޮކޯލެއް ނަހަދަން. އެކަމަކު ފާއިތުވެދިޔަ ތަނުގައި ލިބިފައިވާ ތަޖުރިބާގެ އަލީގައި ކަރަންޓީނު ކުރާތާ 14 ދުވަސް ހަމަވުމަށް ފަހު ވެސް ދޫކޮށްލާނީ ޓެސްޓް ހެދުމަށްފަހު،" އޭނާ ތަފްސީލުކޮށްދެއްވި އެވެ.
ރާއްޖެއަށް 19،000 އަށް ވުރެ ގިނަ ޓެސްޓު ކިޓުތަކެއް ކުރިއަށް އޮތް ދުވަސްތަކުގައި ލިބޭނެކަން ސަރުކާރުން މިއަދު ހާމަކޮށްފައިވާއިރު، މިހާރު 860 މީހުން ކަރަންޓީނުކޮށްފައި ތިބި ކަމަށް، ވައިރަހާ ގުޅޭ ސަރުކާރުގެ ތަރުޖަމާނު މަބުރޫކު އަޒީޒް ވަނީ ވިދާޅުވެފަ އެވެ.
މިހާތަނަށް ރާއްޖޭގައި ދެ ދިވެއްސަކު ވަނީ ކޮވިޑް-19 އަށް ޕޮޒިޓިވްވެފަ އެވެ. އެ ދެ މީހުންނަކީ ވެސް އިނގިރޭސިވިލާތަކުން އައި ދެ މީހުންނެވެ. އެމީހުން ރާއްޖެއަށް އައި ގޮތަށް ވެސް ތިބީ އެކަހެރިކޮށް ކަރަންޓީނު ފެސިލިޓީތަކުގަ އެވެ.
ރާއްޖޭގައި މިހާރު ކޮވިޑް-19 އަށް ފަރުވާދެމުންދަނީ ހަތަރު މީހަކަށެވެ. އެހެން މީހުން ވަނީ ބަލިން ރަނގަޅުވެފަ އެވެ.