ދުނިޔެއަށް ކުރިމަތިވެފައިވާ، އުނދަގޫ މިހާލަތުގައި ކުޅުންތެރިންގެ އާއިލާތަކާއި ވަކިން ޓީމުގެ ކުޅުންތެރިން އުފުލަމުން ދަނީ އުނދަގޫ ތަކުލީފެއް ކަމަށް ޓީސީ ސްޕޯޓްސް ކުލަބުން ބުނެފި އެވެ.
މިދިޔަ މަހުގެ އަށް ވަނަ ދުވަހު، ޓީސީ ސްޕޯޓްސް ކުލަބު މާލެއިން ފުރައިގެން ހަތަރު ދުވަހުގެ ދަތުރަކަށް ތައްޔާރުވެގެން ދިޔަތާ މިއަދަށް 30 ދުވަސްވީ އެވެ. ލަންކާގައި ކަރަންޓީންގައި 24 ދުވަސް ހޭދަ ކުރުމަށް ފަހު، މިދިޔަ އާދިއްތަ ދުވަހުގެ ރޭ ޓީސީގެ ޓީމު މާލެ ގެނެސް އަނެއްކާވެސް ވަނީ ފުރަވެރި ރިސޯޓްގައި ކަރަންޓިން ކޮށްފަ އެވެ.
މިހާލަތާ ގުޅޭގޮތުން ޓީސީން ނެރުނު ބަޔާނެއްގައި ބުނެފައި ވަނީ، ދެ ވަނަ ފަހަރަށްވެސް ކަރަންޓީނަށް ޓީސީގެ ޓީމު ދިޔައީވެސް، ދިވެހި ރައްޔިތުންގެ ސަލަމާތާއި ރައްކާތެރިކަމަށްޓަކައި ކަމަށެވެ.
ލަންކާ އަދި ރާއްޖޭގައި ދެ ފަހަރަށް ކަރަންޓީން ކުރަން ޖެހުމުން ޓީސީގެ ޓީމުގެ އޮފިޝަލުން ވަނީ އެކަމާ ކަންބޮޑުވުން ފާޅު ކޮށްފަ އެވެ. ޓީސީ ލަންކާގައި ކަރަންޓީން ކުރަން ނިންމީ، ބަންގުލަދޭޝްއިން އަންނަ ފަރާތްތައް ކަރަންޓީންގައި ތިބެން ޖެހޭނެ ކަމަށް ސަރުކާރުން ނިންމުމުންނެވެ. އެހެންނަމަވެސް ޓީސީ ޓީމާއެކު ބަނގުލަދޭޝްއަށް ދިޔަ އެ ޓީމުގެ މިޑްފީލްޑަރު އަހްމަދު ރިލްވާން (ބެން) ލަންކާއިން މާލެ އައެވެ.
ބަންގުލަދޭޝްއިން ދިޔަ ބައެއް އެހެން މީހުންނަށްވެސް، ކަރަންޓީން މަރުހަލާއަކާ ނުލައި ހޯމް އައިސޮލޭޝަންއަށް މާލެ އާދެވުނު އިރު، ޓީސީގެ ބައެއް އޮފިޝަލުން ވަނީ އެ ވާހަކަތައް ސޯޝަލް މީޑިއާގައި އާންމު ކޮށްފަ އެވެ. އަދި ދެ ވަނަ ފަހަރަށް ކަރަންޓީނަށް ލުމުން ޓީސީގެ ބައެއް އޮފިޝަލުން ވަނީ އެކަމާ ވަރަށް ބޮޑަށް ހިތްހަމެނުޖހުން ފާޅު ކޮށްފަ އެވެ.
އެކަމާ ބެހޭގޮތުން ޓީސީން ބުނީ، ސޯޝަލް މޑީިއާގައި ވަކި ފަރުދުން އާންމު ކުރާ ވާހަކަތަކަކީ ޓީސީގެ ބަސް ނޫން ކަމަށެވެ. އަދި ޓީސީގެ ކުޅުންތެރިން އުފުލަމުންދާ ތަކްލީފަކީ، އެއިން ކަމެއް ތަޖުރިބާކޮށްފައި ނުވާ ބަޔަކަށް އިހްސާސް ކުރެވޭނެ ކަމެއް ނޫންކަމަށްވެސް ބަޔާނުގައި ބުނެފައި ވެއެވެ.
"ނަމަވެސް އާއިލާއާ ދުރުގައި ދުނިޔެ މިއޮތް ހާލަތުގައި، ޓީސީ ފުޓްބޯޅަ ޓީމުގެ ބައެއް މެންބަރުންގެ ވިސްނުން ހުންނަ ގޮތް މިފަދަ ތަކްލީފެއް އުފުލާފައި ނުވާ މީހުންގެ ވިސްނުމާ މާބޮޑަށްވެސް ތަފާތު ވާނެ އެވެ."