ކޮވިޑް-19އަށް މާލެއިން ޕޮޒިޓިވްވި މީހާއާ ސީދާ ބައްދަލުވި، 50 އަށް ވުރެ ގިނަ މީހުން މިހާރުވެސް އެކަހެރިކުރެވިފައިވާ ކަމަށް، ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފި އެވެ.
ނެޝަނަލް ޓާސްކު ފޯހުގެ ފަރާތުން މިހާރު ކުރިއަށްދާ ނޫސްވެރިންގެ ބައްދަލުވުމުގައި، އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ މާލެއިން ޕޮޒިޓިވްވި މީހާ، ފާއިތުވި ދުވަސްތަކުގައި ގޮސްފައިވާ ތަންތަނާއި ބައްދަލުވި މީހުން ވަރަށް ތަފްސީލުކޮށް ބަލަމުން އަންނަ ކަމަށެވެ.
އެގޮތުން، ބައްޔަށް ޕޮޒިޓިވްވި މީހާއާ ސީދާ ކޮންޓެކްޓުވި 54 މީހަކު މިހާރުވެސް އެކަހެރިކުރެވިފައިވާ ކަމަށް ޑރ. ނަޒްލާ ވިދާޅުވި އެވެ. އަދި އެހެނިހެން ގޮތް ގޮތުން، އޭނާއާ ބައްދަލުވި އިތުރު 50 އަށް ވުރެ ގިނަ މީހުން، މިވަގުތަށް ގޭގައި މަޑުކުރަން އަންގާފައިވާ ކަމަށާއި، އެ މީހުން ވެސް އެކަހެރިކުރަންޖެހިއްޖެ ހާލަތެއްގައި އެކަން ކުރާނެ ކަމަށް އޭނާ ވިދާޅުވި އެވެ.
"ކޮންޓެކްޓް ޓްރޭސިން ހަދާއިރު ވަރަށް ތަފްސީލް ޓައިމްލައިނެއް އެކުލަވާލާނެ، ކޮންމެ ތަނަކަށް ކޮންމެ ގަޑިޔަކު ކޮންމެ ދުވަހު ދިޔަތޯ ބަލައި ކޮންޓެކްޓްވި އެންމެން ހޯދާނެ،" ޑރ. ނަޒްލާ ވިދާޅުވި އެވެ.
އެގޮތުން، މާލޭގެ ހަތަރު ގެއަކާއި، ކާށިދޫ، އައްޑޫ އަދި ވާދޫގައިވެސް އެ ބައްޔަށް ޕޮޒިޓިވްވި މީހާއާ ގުޅުން އޮތް ބައަކު އެސެސްކުރަމުންދާކަމަށް އޭނާ ވިދާޅުވި އެވެ.
ކޮވިޑް-19އަށް މާލެއިން ޕޮޒިޓިވްވި މީހާއަކީ މިފަހުން ރާއްޖޭން ބޭރަށް ދަތުރުކޮށްފައިނުވާ މީހެއް ކަމަށާއި، އެ ބައްޔަށް ޕޮޒިޓިވްވި އެހެން މީހަކާ ސީދާ ބައްދަލުވި މީހެއް ނޫންކަމުން، މިއީ ރާއްޖޭގައި ކޮމިޔުނިޓީ ޓްރާންސްމިޝަނެއްކަމަށް މިހާތަނަށް ލިބިފައިވާ މައުލޫމާތަކުން ބެލެވޭކަމަށް ނެޝަނަލް ޓާސްކު ފޯހުން މިއަދު ވަނީ ބުނެފަ އެވެ.
އެ ނޫސްވެރިންގެ ބައްދަލުވުމުގައި ޑރ. އަލީ ލަތީފް ވިދާޅުވީ، މާލެއިން ޕޮޒިޓިވްވި މީހާއަށް އެ ބަލި ޖެހުނު ގޮތެއް އަދި ދެނެގަނެވިފައިނުވާ ކަމަށެވެ.
"އޭނާ މިފަހުން ރާއްޖޭން ބޭރަށް ދަތުރުކޮށްފައެއް ނުވޭ. އަދި އެބައްޔަށް ޕޮޒިޓިވްވި އެހެން މީހަކާ ސީދާ ގުޅުމެއް އޮތް ކަމަށް މިހާތަނަށް ބެލި ބެލުމުން އެނގޭކަށްނެތް،" ޑރ. ލަތީފް ވިދާޅުވި އެވެ.
ޑރ. ލަތީފް ވިދާޅުވި ގޮތުގައި، މިހާރު ހޯދިފައިވާ މައުލޫމާތުތަކަށްބަލާއިރު، އެ މީހާއަށް ބަލިޖެހިފައިވުމުގެ ފުރުސަތު ބޮޑި، އެ ބައްޔަށް ޕޮޒިޓިވްވެ، އެކަމަކު ބަލީގެ އެއްވެސް އަލާމާތެއް ނުފެންނަ މީހެއްގެ ފަރާތުން ކަމަށެވެ.
ބައްޔަށް ޕޮޒިޓިވްވި މީހަކު ފެނުމާ ގުޅިގެން، މުޅި މާލެ ސަރަހައްދު ކުރިއަށްއޮތް 24 ގަޑިއިރަށް ލޮކްޑައުންކުރުމާ ގުޅިގެން، ސިއްހީ އިދާރާތަކުގެ އެންގުތަކަށް ކުރިއަށްވުރެ ބޮޑަށް ތަބާވުމަށް ޑރ. އަލީ ރަފީގު މިއަދުވެސް ވަނީ އިލްތިމާސްކުރައްވައިފަ އެވެ.
ބަލިޖެހިފައިވާ މީހަކާ ސީދާ ގުޅުމެއްނެތް މީހަކު ބައްޔަށް ޕޮޒިޓިވްވުމާއެކު، މުޖުތަމައުގެ ތެރޭގައި ބަލި ފެތުރިގެން ދިޔުމުގެ ފުރުސަތު ކުޑަކުރުމަށްޓަކައި، ރައްޔިތުން ގޭގައި މަޑުކުރުމަށާއި، ގައިދުރުކުރުމުގެ އެންގުތަކަށްވެސް އަމަލުކުރުން ކުރިއަށްވުރެ ބޮޑުކަމަށް އޭނާ ވިދާޅުވި އެވެ.