އިއްޔެ އަކީ އިޒްރޭލު ފުލުހުންނާއި ފަލަސްތީނުގެ އާންމުންނާއި ދެމެދު އަގްސާ މިސްކިތުގައި ހަމަނުޖެހުން ހިނގަމުންދާތާ ދެވަނަ ދުވަހެވެ. މިހާތަނަށް އެތައް ބަޔަކަށް އެކިވަރުގެ އަނިޔާ ވެފައި ވާއިރު، އިޒްރޭލު މީހަކު ވަނީ މަރުވެފަ އެވެ.
އުރުދުންގެ ރަސްގެފާނު ވިދާޅުވީ ދެން ހަމަ ނުޖެހުން ނުހިންގާނެ ކަމަށް މި ފަހަރު ވެސް އިޒްރޭލުން ބުނެފައިވާ ކަމަށެވެ. އެކަމަކު، ކުރިން ވެސް އިޒްރޭލުން މިހެން ބުނުމަށްފަހު އެ ސަރަހައްދުގެ ސުލްހަ ނަގާލާފައިވާ ކަމަށެވެ. އެކަމަކު ދެން އިޒްރޭލުން މިކަން ތަކުރާރު ކޮށްފި ނަމަ، އިޒްރޭލާއި އުރުދުންގެ ގުޅުމަށް ބުރޫ އަރާނެ ކަމަށާއި އިޒްރޭލާއި ދެކޮޅަށް ފިޔަވަޅު އަޅާނެ ކަމަށް ރަސްގެފާނު ވިދާޅުވިއެވެ.
އަގްސާ މިސްކިތުގައި މުސްލިމުންގެ އަޅުކަމުގެ ކަންކަން ބަލަހައްޓަނީ އުރުދުން އިންނެވެ. އުރުދުން އަކީ އިޒްރޭލާއެކު ސުލްހައިގެ އެއްބަސްވުމެއް ހަދާފައިވާ ގައުމެކެވެ.
ފަލަސްތީނުގެ އެތައް ބަޔަކު އާދީއްތަ ދުވަހުގެ ރޭ ތިބީ އަގްސާ މިސްކިތުގައި އެތަނުގެ ހިމާޔަތުގަ އެވެ. އިއްޔެ ހެނދުނު އިޒްރޭލު ފުލުހުން އައިސް އެތަނަށް ކަރުނަ ގޭސް ޖަހައި އެތައް ބަޔަކު ހައްޔަރު ކުރިއެވެ.
މުގައްދަސް އެ ބިމަކީ އިޒްރޭލާއި ފަލަސްތީނާއި ދެމެދު މައްސަލަ ހޫނުވާ މައިގަނޑު އެއް ސަބަބެވެ. މިއީ މުސްލިމުންގެ ފުރަތަމަ ގިބްލަ ކަމައްވާއިރު، ޔަހޫދީން ގަބޫލު ކުރަނީ މިއީ އެމީހުންގެ މުގައްދަސް ތަނެއް ކަމަށެވެ.