ށ. ނަރުދޫއިން ހަ މީހަކު ކޮވިޑް-19 އަށް ޕޮޒިޓިވްވެއްޖެ އެވެ.
ނަރުދޫއިން ހަ މީހަކު ކޮވިޑަށް ޕޮޒިޓިވްވެފައިމިވަނީ އެ ރަށުގަައި ދުއްވާ އަމާޒު ބޯޓްގެ ކެޕްޓަން ޕޮޒިޓިވް ވެފައިވަނިކޮށެވެ.
އެހެން ކަމުން ނަރުދޫއިން މި ބައްޔަަށް ޕޮޒިޓިވްވީ މީހުންގެ އަދަދު ވަނީ ހަތަކަަށް އަރާފައެވެ. މިއަދު ޕޮޒިޓިވްވި ނަރުދޫ މީހުން އައިސޮލޭޝަން ފެސިލިޓީތަކަަށް ގެންދިއުމުގެ މަސައްކަތް މިހާރު ދަނީ ކުރަމުންނެވެ.
އަމާޒު ބޯޓު މާލެއިން ފުރީ މިމަހުގެ 15 ވަނަ ދުވަހު އެވެ. އެ ބޯޓް 16 ވަނަ ދުވަހު ގިނަ ރަށްތަކަކަށް ދަތުރު ކޮށްފައިވެއެވެ. އެގޮތުން ޖުމްލަ 13 ރަށަކަށް ބޯޓް ދަތުރުކޮށްފައި ވެއެވެ.
އޭގެ ތެރޭގައި ނ. މާފަރާއި އެ އަތޮޅު ހެނބަދޫ އާއި މިލަދޫ އާއި ކެނދިކުޅުދޫ އާއި ވެލިދޫ އާއި ހޮޅުދޫ އަށް ދަތުރު ކޮށްފައި ވެއެވެ. މީގެ އިތުރުން ށ. އަތޮޅުން ނަރުދޫ އާއި ފުނަދޫ އާއި މިލަންދޫ އާއި ފީވަކާއި މާއުނގޫދޫ އަށް ވެސް އަމާޒު ދިޔަ އެވެ. މީގެ އިތުރުން ހއ. ދިއްދޫ އާއި އުތީމަށްވެސް އަމާޒު ބޯޓު ވަނެވެ.
ކޮވިޑަށް ޕޮޒިޓިވްވީ "އަމާޒް" ބޯޓްގެ ކެޕްޓަނަކީ އުމުރުން 49 އަހަރުގެ ދިވެއްސެކެވެ.
މި ކޭސްއަކީ ރާއްޖޭގެ ކޮވިޑްގެ ހާލަތު އެހެން ލެވެލްއަކަށް ހިނގައިދާނެ ކޭސްއެއް ކަމަށް އެޗްޕީއޭއިން ވަނީ ލަފާކޮށްފައެވެ. އެހެން ކަމުން އެކަމާއި ގުޅިގެން ބަލަންޖެހޭ ކަންކަން ވަރަށް ގާތުން ބަލަމުންދާ ކަމަށް އެޗްޕީއޭއިން މީގެ ކުރިން ވަނީ ބުނެފައެވެ.
ރޭގެ ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވީ އެ ކޭހާ ގުޅިގެން މިހާތަނަށް 101 މީހަކު ފާހަގަ ކުރެވިފައިވާ ކަމަށާ އޭގެ ތެރޭގައި ބޯޓްގެ ކުރޫންގެ ގޮތު އުޅުނު އަށް މީހަކުވެސް ހިމެނޭ ކަމަށެވެ.
އަދި ފަސް މީހެއްގެ ކިބައިން އަލާމާތްތައް ފެންނާތީ އެމީހުންގެ ސާމްޕަލް ނެގުމުގެ މަސައްކަތް ވެސް ކުރަމުންދާ ކަމަށެވެ.
އަފްޒަލް ވަނީ އަމާޒުން ދަތުރުކުރި އިތުުރު ބަޔަކު ތިބިނަމަ ލަސް ނުކޮށް އެ މައުލޫމާތު އެޗްޕީއޭއާ ހިއްސާ ކުރުމަށް އެދި ވަޑައިގެންފަ އެވެ.