ކޮވިޑް-19 އާ ގުޅިގެން އިގްތިސާދަށް ލިބޭ ގެއްލުން ތަކަށް އެހީވާން، ސަރުކާރުން ނެރުނު "ރިލީފް ޕެކޭޖަ" ން މާ ބޮޑު ފައިދާއެއް ސިނާއަތަށް ނުކުރާ ކަމަށް ބުނެ، ޓޫރިޒަމްގެ ބާނިން ހިމެނޭ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ސަރުކާރަށް ފަޑު ކިޔައިފި އެވެ.
ސަރުކާރުން ނެރެފައިވާ 2.5 ބިލިއަން ރުފިޔާގެ އިގްތިސާދީ އެހީގެ ޕެކޭޖާ ބެހޭ ގޮތުން، މަޓީ އިން ނެރެފައިވާ ނޫސް ބަޔާނެއްގައި ބުނީ އެހީގެ ޕެކޭޖް ހަދާފައިވަނީ، އެ ޖަމިއްޔާގެ ހިޔާލެއް ހޯދުމެއް ނެތި ކަމަށާ، އެ ޕެކޭޖްގެ ފައިދާ ޓޫރިޒަމް ސިނާއަތުގެ ގިނަ ފަރާތް ތަކަށް ނުލިބޭ ކަމަށެވެ.
ރާއްޖޭގެ އިކޮނޮމީގެ އެންމެ 70 ޕަސެންޓް ހިއްސާކުރާ ޓޫރިޒަމްގެ އެންމެ ގިނަ މަހުޖަނުން ހިމެނޭ ޖަމިއްޔާ ކަމަށްވާ މަޓީގެ ބަޔާނުގައި ބުނެފައިވާ ގޮތުން، މިހާރުގެ ހާލަތުގެ ސަބަބުން ވިޔަފާރިތަކަށް ގެއްލުންވެ، ބަނގުރޫޓު ވަމުން ދާއިރު، ވަޒީފާތައް ސަލާމަތް ކުރަން ފިޔަވަޅު އަޅަން ޖެހުނު ނަމަވެސް ކަމަށް ފިޔަވަޅު ނޭޅޭ ކަމަށެވެ. އަދި މި ކަމަށް އެދި އެކި ފަހަރު މަތިން ސަރުކާރުގައި އެދިފައިވާނެ ކަމަށް އެ ޖަމިއްޔާ އިން ބުނެފައިވެ އެވެ.
އެ ޖަމިއްޔާ އިން އިތުރަށް ބުނެފައިވާ ގޮތުގައި އެހީގެ ޕެކޭޖުގެ ޝަރުތުތަކުގެ ސަބަބުން ޓޫރިޒަމް ސިނާއަތުގެ ގިނަ ބަޔަކަށް އެހީގެ ޕެކޭޖު ލިބެން ނެތް ކަމަށެވެ. އެހެންކަމުން މި މައްސަލާގައި ހުރިހާ ފަރާތްތަކަކުން މަޝްވަރާ ކުރުމަށްފަހު، ވިޔަފާރިތައް ހިމާޔަތް ކުރަން ފިޔަވަޅު އަޅައި ދޭން އެ ޖަމިއްޔާ އިން ވަނީ ސަރުކާރުގައި އެދިފަ އެވެ.
މަޓީން ސަރުކާރަށް ފާޑު ކިޔާފައިވާއިރު، ކޮވިޑުގެ އެހީގެ ޕެކޭޖުތައް ނެރުމުގައި އެ ޖަމިއްޔާގައި ހިމެނޭ ޓޫރިޒަމް ސިނާއަތުގެ އިސް ފަރާތްތަކުން ވަނީ މަސައްކަތް ކޮށްފަ އެވެ. މަޓީން ވަނީ ބޭންކް އޮފް މޯލްޑިވްސްއާ ގުޅިގެން ޓޫރިޒަމް ސިނާއަތަށް ހާއްސަކޮށް ދެ މިލިއަން ޑޮލަރުގެ ފައިނޭންސިން ޕެކޭޖެއް ވެސް ނެރެފަ އެވެ.