ޑްރީސް މާޓެންސް ލަނޑު ކާމިޔާބުކޮށް، ނަޕޯލީގެ ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް ހަދައި، އިންޓަ މިލަން ފަހަތަށް ޖައްސާލުމަށް ފަހު ނަޕޯލީން އިޓާލިއަން ކަޕްގެ ފައިނަލަށް ދަތުރު ކޮށްފި އެވެ.
ރޭ ނަޕޯލީގެ ދަނޑުގައި ކުޅުނު މެޗު، ނިމުނީ 1-1 ން އެއްވަރު ވެގެންނެވެ. އިންޓަގެ ކްރިސްޓިއަން އެރިކްސަން މެޗު ފެށިގެން ދެ ވަނަ މިނެޓްގައި ކާމިޔާބު ކުރި ލަނޑުން އިންޓައަށް ލީޑް ނަގައިދިން ނަމަވެސް 41 ވަނަ މިނެޓްގައި މާޓެންސް ލަނޑު ކާމިޔާބުކޮށް ނަޕޯލީއަށް މެޗުގެ ނަތީޖާ ހަމަހަމަ ކޮށްދިނެވެ. އެ ނަތީޖާއިން ނަޕޯލީ ފައިނަލަށް ދަތުރު ކުރީ ފެބްރުއަރީ މަހު އިންޓަގެ ދަނޑުގައި ކުޅުނު ފުރަތަމަ ލެގް މެޗު 1-0 ން ކާމިޔާބު ކޮށްފައި ވުމުން 2-1 ގެ އެގްރިގޭޓް ނަތީޖައިންނެވެ.
އުމުރުން 33 އަހަރުގެ ބެލްޖިއަމް ފޯވަޑް މާޓެންސް ރޭ ކާމިޔާބު ކުރި ލަނޑާއެކު އޭނާ ވެފައި ވަނީ ނަޕޯލީއަށް 122 ލަނޑު ކާމިޔާބު ކޮށްދީފަ އެވެ. އެ ރެކޯޑާއެކު އޭނާ ވަނީ ކުރިން ނަޕޯލީއަށް ކުޅުނު މަރެކް ހަމްސިކްގެ ރެކޯޑް މުގުރާލާފަ އެވެ. ޗައިނީޒް ސުޕަލީގްގައި ޑަލިއަން އެފްސީއަށް މިދިޔަ އަހަރު ބަދަލުވި ސޮލޮވާކިއާގެ ފޯވަޑް ވަނީ ނަޕޯލީއަށް 121 ލަނޑު ކާމިޔާބު ކޮށްދީފަ އެވެ.
ނަޕޯލީއަށް އެންމެ ގިނަ ލަނޑު ޖެހި ތިން ވަނަ ކުޅުންތެރިޔަކީ އެ ޓީމުގެ ލެޖެންޑް މަޝްހޫރު ޑިއޭގޯ މެރަޑޯނާ އެވެ. އޭނާ ވަނީ ނަޕޯލީއަށް 115 ލަނޑު ކާމިޔާބު ކޮށްދީފަ އެވެ.
ނަޕޯލީގެ މޮޅު އެ ޓީމުގެ ކޯޗް ޖެނާރޯ ގަޓޫސޯ ހާއްސަ ކުރީ ދާދި ފަހުން މަރުވި އޭނާގެ އަންހެން ކޮއްކޮ ފްރެންޗެސްކާ އަށެވެ. ގަޓޫސޯގެ ކުރީގެ ކުލަބު އޭސީ މިލާންގެ ސެކެޓްރީއެއްގެ ގޮތުގައި މަސައްކަތް ކުރި ފްރެންޗެސްކާ މަރުވީ ބައްޔަަކަށް ފަރުވާ ހޯދަމުން ދަނިކޮށް މި މަހުގެ ކުރީ ކޮޅު އެވެ. ފެބްރުއަރީ މަހުން ފެށިގެން އިންޓެންސިވް ކެއާގައި އޭނާ އަށް ދިޔައީ ފަރުވާ ދެމުންނެވެ.
މިއަންނަ ބުދަ ދުވަހުގެ ރޭ ކުޅޭ ކަޕްގެ ފައިނަލުގައި ނަޕޯލީ ނުކުންނާނީ ޔުވެންޓަސް އާ ދެކޮޅަށެވެ.