އިދިކޮޅު ޕާޓީ، ޕީޕީއެމްގެ ހާއްސަ މަގާމެއް ކުރީގެ ރައީސް ޑރ. މުހައްމަދު ވަހީދު ހަސަން މަނިކަށް އަރުވަން އެ ޕާޓީގެ ކައުންސިލް ބައްދަލުވުމެއް ބާއްވަން ނިންމައިފި އެވެ.
ދެ އަހަރު ރާއްޖޭގައި ވެރިކަން ކުރެއްވި ވަހީދުގެ ވެރިކަން ނިމި، ރައީސް އަބްދުﷲ ޔާމީންގެ ވެރިކަމުގައި އެމަނިކުފާނު ވަނީ އަމިއްލަ ޕާޓީ ދޫކޮށްލައްވައި ޕީޕީއެމްއަށް ސޮއި ކުރައްވާފަ އެވެ. ނަމަވެސް އޭގެ ފަހުން ސިޔާސީ މައިދާނުން ދުރަށްވަޑައިގެންނެވި އެވެ.
ވަހީދު މިހާރު އަނެއްކާ ވެސް ވަނީ ސިޔާސީ މައިދާނަށް އެނބުރި ވަޑައިގަންނަވާފަ އެވެ. އަދި ސަރުކާރަށް ވެސް ފާޑުވިދާޅުވެފައިވެ އެވެ.
ޕީޕީއެމްއިން މިރޭ ބާއްވާ ކައުންސިލް ބައްދަލުވުމުގައި ވަހީދަށް އަރުވާނެ މަގާމަކާ ގުޅޭ ގޮތުން ގޮތެއް ނިންމާނެ ކަމަށް ވަނީ އެނގިފަ އެވެ. އެނގިފައިވާ ގޮތުގައި ދޭން މަޝްވަރާ ކުރާ މަގާމަކީ ޕާޓީގެ އެޑްވައިސަރެއްގެ މަގާމެވެ.
ކައުންސިލްގެ ބައްދަލުވުމަށްފަހު ނޫސްވެރިންގެ ބައްދަލުވުމެއް ބާއްވައި މިކަން އިއުލާން ކުރުމަށް ވެސް ޕީޕީއެމްއިން ވަނީ ނިންމާފަ އެވެ. މިރޭ 9:00 އަށް ނޫސްވެރިންގެ ބައްދަލުވުން ވަނީ ތާވަލުކޮށްފަ އެވެ.
މި ނޫސްވެރިންގެ ބައްދަލުވުމަށްފަހު ވަހީދު، ޕީޕީއެމްގެ ހަރަކާތްތަކުގައި ވަރަށް ބޮޑަށް ބައިވެރިވެވަޑައިގަންނަވާނެ ކަމަށް އެ ޕާޓީގެ އޮފިޝަލަކު ބުންޏެވެ.
ޕީޕީއެމްގެ ރައީސް، ރައީސް ޔާމީން މިހާރު ހުންނެވީ ޖަލުގަ އެވެ. އެމަނިކުފާނު ޖަލުގައި ހުންނެވުމުން ޕާޓީގެ ލީޑަޝިޕްގައި އެހާ ވަރުގަދަ ބޭފުޅެއް ނެތް ކަމުގެ ޝަކުވާ އެ ޕާޓީގެ އާންމު މެންބަރުން ކުރެ އެވެ. ނަމަވެސް ޖަލަށް ވަޑައިގެންނެވުމުގެ ކުރިން ރައީސް ޔާމީން ވަނީ ޕާޓީއަށް މިނިކާ ބާޒުތައް އަރައިގަތުމަށް ޖާގަ ނުދިނުމަށް އެދިވަޑައިގެންފަ އެވެ.