ކުރީގެ ނާއިބް ރައީސް ޑރ. މުހައްމަދު ޖަމީލް އަހުމަދު، އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާ ގުޅިވަޑައިގަތުމަށް ނިންމައިފި އެވެ.
ޑރ. ޖަމީލް، ޕީޕީއެމާއި ގުޅިވަޑައިގަތުމަށް މިރޭ ހާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މި ރަސްމިއްޔާތުގައި ޖަމީލު، ޕީޕީއެމްގެ އެޑްވައިޒަރުކަށް ހަމަޖެއްްސުމަށްވެސް ވަނީ ހަމަޖެހިފައެވެ.
ޖަމީލް އެންމެ ފަހުން ހުންނެވީ ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގައެވެ. ނަމަވެސް ރައީސް ޔާމީނާއެކު ކައުންސިލް އިންތިހާބުގެ ކެންޕެއިނަށް އަތޮޅުތަކަށްވެސް ޖަމީލް ވަޑައިގެންނެވިއެވެ. އަދި ރައީސް ޔާމީންގެ ގާނޫނީ ޓީމްވެސް ލީޑް ކުރައްވަނީ ޖަމީލްއެވެ.
ރައީސް މައުމޫނާއި ރައީސް ނަޝީދާއި ރައީސް ވަހީދުގެ ސަރުކާރުގައިވެސް ޖަމީލް ވަނީ މިނިސްޓަރުކަން ކުރައްވާފައެވެ. އަދި ރައީސް ޔާމީންގެ ނާއިބަކީވެސް އެމަނިކުފާނެވެ. އޭގެ ފަހުން ރައީސް ޔާމީންގެ ސަރުކާރާ ދެކޮޅަށް އޭރުގެ އިދިކޮޅުން އުފެއްދެވި އިއްތިހާދުގެ ލީޑަރަކީވެސް ޖަމީލެވެ.
މީގެ ދެތިން ރޭ ކުރިން ޕީޕީއެމްގެ އެޑްވައިޒަރަކަށް ކުރީގެ ރައީސް މުހައްމަދު ވަހީދު ހަސަން މަނިކުވެސް ހަމަޖައްސަވާފައިވެއެވެ.