ފުލުހުންނަށް ހުށަހެޅޭ ހައްސާސީ މައްސަލަތަކުގެ ތެދު މައުލޫމާތު ވީއެންމެ އަވަހަކަށް ރައްޔިތުންނާ ހިއްސާ ކުރުމަށް ރައީސް އިބްރާހިމް މުހައްމަދު ސޯލިހު ފުލުހުންގެ ކިބައިން މިއަދު އެދިވަޑައިގެންފި އެވެ.
އިސްކަންދަރު ކޮށީގައި މިއަދު ފުލުހުންނާ ބައްދަލުކުރައްވައި ރައީސް ވިދާޅުވީ މި ސަރުކާރުގައި ނޫސްވެރިކަމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަމަށް މިހާރު އެއްވެސް ހުރަހެއް ނެތް ނަމަވެސް، ބައެއް މީޑިއާތަކުން ބައެއް ފަހަރު މައުލޫމާތު އާންމު ކުރާ ގޮތުން ރައްޔިތުންނަށް ކަމުގެ ހަގީގަތް ވަރަށް ބޮޑަށް އޮޅިގެންދާ ކަމަށެވެ.
ނަމަވެސް، މިކަން މިގޮތަށް މެދުވެރިވާ އެންމެ ބޮޑު ސަބަބަކީ އެފަދަ މައްސަލަތަކުގެ ތެދު މައުލޫމާތު ރައްޔިތުންނަށް އެނގެން ބޭނުންވާ ވަގުތުގައި ހާމަ ނުކުރުން ކަމަށް އެމަނިކުފާނު ފާހަގަކުރެއްވި އެވެ.
އެގޮތުން، ރައީސް ސޯލިހު ވިދާޅުވީ ފުލުހުންނަށް ހުށަހެޅޭ ހައްސާސީ މައްސަލަތަކުގެ ތެދު މައުލޫމާތު އޭގެ ވަގުތުގައި ރައްޔިތުންނާ ހިއްސާ ކުރުން ވަރަށް މުހިންމު ކަމަށެވެ.
"އެހެންވީމަ މިކަމުގައި އެންމެ މަސްލަހަތު ހުރި ގޮތަކީ މި ދެންނެވި ހައްސާސް މައްސަލަތަކުގެ ހަގީގަތް ވީހާ ވެސް އަވަހަށް ރައްޔިތުންނަށް ހާމަ ކުރުން. އެކަން އެގޮތަށް ނުކުރާނަމަ އޭގެ ބަދުނާމު އެޅިގެން މިދަނީ ދިވެހި ފުލުހުންނާއި ސަރުކާރުގެ ބޮލުގައި،" ރައީސް ވިދާޅުވި އެވެ.
ރައީސް އިތުރަށް ވިދާޅުވި ގޮތުގައި ދިވެހި ފުލުހުންނަށް ފާޑުކިޔާ މީހަކަށް ވުމަށްވުރެ ނަޒާހާތްތެރި މުއައްސަސާއަކަށް ފުލުހުންގެ މުއައްސަސާ ހެދުމަށް ކުރަންޖެހޭ މަސައްކަތް ކުރުމުގައި ދެމިހުންނަވާނެ ކަމަށެވެ.
އެގޮތުން، ދިވެހި ފުލުހުންނަކީ ރައްޔިިތުން މިހާރަށްވުރެވެސް ބޮޑަށް އިތުބާރުކުރާ، ފަހުރުވެރިވާ، ނަޒާހާތްތެރި ޕްރޮފެޝަނަލް މުއައްސަސާއަކަށް ހެދުމަށް މަސައްކަތް ކުރުމުގައި ދެމި ހުންނަވާނެކަމުގެ ޔަގީންކަން ރައީސް މިއަދު ވަނީ ފުލުހުންނަށް ދެއްވައިފަ އެވެ.
ނަމަވެސް، އެކަން ކާމިޔާބުކުރުމަށްޓަކައި ގާނޫނުތަކަށް ގެންނަންޖެހޭ ބަދަލުތަކެއް ހުރި ކަމަށާއި، ފުލުހުންނަށާއި ތަންފީޒީ އިދާރާތަކަށް ބޭނުންވާ ވަސީލަތްތަކާއި ތައުލީމާއި ތަމްރީން ވެސް އިތުރަށް ހޯދައިދޭންޖެހިފައިވާ ކަމަށް ރައީސް ވިދާޅުވި އެވެ.