ޔޫރޮޕާ ލީގްގެ ސެމީ ފައިނަލުގެ އެންމެ ފަހު ދެ ޖާގަ ސެވިއްޔާ އާއި ޔޫކްރޭންގެ ޝަކްޓެ ޑޮނެސްކް ހޯދައިފި އެވެ. ސެމީގައި ސެވިއްޔާ ނުކުންނާނީ މެންޗެސްޓާ ޔުނައިޓެޑާ ދެކޮޅަށެވެ. އިންޓަ ވާދަކުރާނީ ޝަކްޓާ އާއެވެ.
ސެވިއްޔާ ސެމީގެ ޖާގަ ކަށަވަރު ކުރީ ކްއާޓާ ފައިނަލުގައި ވޯލްވާހެމްޓަން ވޮންޑާސް 1-0 ން ބަލި ކުރުމަށް ފަހު އެވެ. މެޗުގެ ނިމުމަކާ ގާތަށް ދިޔައިރު ވެސް ދެ ޓީމަށް ލަނޑެއް ޖެހިފައި ނުވުމުން ބެލެވުނީ އެކްސްޓްރާ ޓައިމްއަށް ދާނެ ކަމަށެވެ. އެހެން ނަމަވެސް މެޗުގެ 90 މިނެޓް ހަމާވާ ދެ މިނެޓަށް ވެފައި ވަނިކޮށް ލޫކަސް އޮކޮމްޕޯސް ވަނީ ސެވިއްޔާ މޮޅުވި ލަނޑު ކާމިޔާބު ކޮށްފަ އެވެ.
މެޗުގައި ލަނޑު ޖާހާނެ އެންމެ ރަނގަޅު ފުރުސަތު ލިބުނީ ވޯލްވްސްއަށެވެ. މެޗުގެ 11 ވަނަ މިނެޓްގައި ސެވިއްޔާގެ ޕެނަލްޓީ އޭރިއާ ތެރެއިން ވޯލްވްސްގެ އެޑާމަ ޓްރައޯރޭ އަށް ސެވިއްޔާގެ ޑިފެންޑަރު ޑިއޭގޯ ކާލޯސް ފައުލު ކުރުމުން ދިން ޕެނަލްޓީ ވޯލްވްސްގެ ރައުލް ހިމެނޭޒް ފޮނުވާލުމުން ސެވިއްޔާގެ ކީޕަރު ޔާސީން ބޯނޫ ދިފާއު ކުރި އެވެ.
ސެވިއްޔާގެ ލަނޑު، އޮކޮމްޕޯސް ކާމިޔާބު ކުރީ، އެވާ ބަނޭގާ ނަގައިދިން ހިލޭ ޖހުން ބޮލުން ގޯލްގެ ތެރެއަށް ވައްދާލައިގެންނެވެ.
ސްވިޒަލޭންޑްގެ އެފްސީ ބަޒެލް އާ ދެކޮޅަށް ކުޅުނު މެޗު، ޝެކްޓާ ޑޮނެސް ކާމިޔާބު ކުރީ 4-1 ންނެވެ. މެޗު ފެށިގެން ދެ ވަނަ މިނެޓްގައި ޝެކްޓާއިން ޅީޑް ނެގި އެވެ. އެ ޓީމުގެ ލަނޑު ކާމިޔާބު ކުރީ ޖުނިއާ މޮރައިސް އެވެ. ދެ ވަނަ ލަނޑު 22 ވަނަ މިނެޓްގައި ކާމިޔާބު ކުރީ ޓައިސަން އެވެ. ޝެކްޓާގެ ތިން ވަނަ ލަނޑު ލިބުނު ޕެނަލްޓީ އަކުން ކާމިޔާބު ކުރީ އެލަން ޕެޓްރިކް އެވެ. މެޗުގެ 88 ވަނަ މިނެޓްގައި ޑޯޑޯ ވަނީ އެ ޓީމުގެ ހަތަރު ވަނަ ލަނޑު ކާމިޔާބު ކޮށްފަ އެވެ. ބަޒެލްގެ ލަނޑު ރިކީ ވަން ވޮލްފްސްވިންކެލް ކާމިޔާބު ކުރީ ދެ ވަނަ ހާފުގެ އިތުރު ވަގުތުގެ ދެ ވަނަ މިނެޓްގަ އެވެ.
ފުރަތަމަ ސެމީ ފައިނަލުގައި ސެވިއްޔާ އާއި ޔުނައިޓެޑް ކުޅޭ މެޗު އޮންނާނީ އަންނަ އާދިއްތަ ދުވަހުގެ ރޭ ގަ އެވެ. އިންޓަ އާއި ޝަކްޓާ ޑޮނެސްކް މެޗު އޮންނާނީ ހޯމަ ދުވަހުގެ ރޭ ގަ އެވެ.