އިނގިރޭސި ސްކޮޑުގައި ހިމެނި ނަމަވެސް، މެންޗެސްޓާ ޔުނައިޓެޑްގެ ކެޕްޓަން ހެރީ މެގުއާ ސްކޮޑުން ވަކި ކޮށްފި އެވެ.
އިންގްލެންޑްގެ ކޯޗް ގެރެތު ސައުތުގޭޓް އިއްޔެ އިއުލާން ކުރި ސްކޮޑްގައި މެގްއާގެ ނަން ވެސް ހިމެނި އެވެ. އެހެން ނަމަވެސް މެގުއާ ސްކޮޑުން ވަކި ކުރީ، ގްރީސްގައި ޗުއްޓި ހޭދަ ކުރަމުން ދިޔައިރު، ބަނގުރާ ބޯ ތަނެއްގެ ބޭރުން ފުލުހަކާ ދިމާލަށް އަޑުގަދަ ކޮށް ހަޅޭއްލެވިކަން ސާބިތު ވެގެނެވެ. އެކަމާ ގުޅިގެން ގްރީސްގެ ފުލުހުން މެގުއާ ހައްޔަރު ވެސް ކުރި އެވެ.
އެމައްސަލަ އާ ގުޅިގެން، މެގުއާގެ މައްޗަށް ކުށް ސާބިތުވާ ކަމަށް ގްރީސްގެ ކަމާބެހޭ ފަރާތްތަކުން އިއުލާން ކުރީ އިއްޔެ އެވެ. އޭގެ ކުރިން އިނގިރޭސި ސްކޮޑު އިއުލާން ކުރި އެވެ.
އޭގެ ފަހުން، ސައުތުގޭޓް ހަވާލާދީ އިނގިރޭސި އެފްއޭއިން ބުނީ މެގްއާގެ މައްސަލައާ މެދު އިތުރަށް ހާމަވެގެން ދިޔަ ކަންތަކުން، ޑެންމާކާއި އައިސްލެންޑާ ދެކޮޅަށް ކުޅެން ހަމަޖެހިފައިވާ މެޗުތަކަށް ނެގި ސްކޮޑުން މެގްއާ ވަކި ކޮށްފައިވާ ކަމަށެވެ.
ސައުތުގޭޓްގެ ސްކޮޑުން ޔުނައިޓެޑްގެ ޒުވާން ކީޕަރު ޑީން ހެންޑަސަން އާއި މޭސަން ގްރީން ވުޑް، މެންޗެސްޓާ ސިޓީގެ ފިލް ފޯޑެން އަދި ލީޑްސް ޔުނައިޓެޑްގެ ކަލްވިން ފިލިޕްސް އަށް ވަނީ ފުރުސަތު ދީފަ އެވެ.