މާލޭގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، ސްޓޭޓް ބޭންކް އޮފް އިންޑިޔާ (އެސްބީއައި) ގެ ހިދުމަތްތަކަށް ބުރޫއަރާފައި ވާތީ، އެ ބޭންކުގެ ހުރިހާ ހިދުމަތްތަކެއް ހުޅުމާލެއަށް ބަދަލު ކޮށްފި އެވެ.
އެސްބީއައިން މިރޭ ނެރުނު ބަޔާނެއްގައި ބުނީ އަލިފާނުގެ ހާދިސާއާ ގުޅިގެން ހިދުމަތް ދޭނީ ހަމައެކަނި އެ ބޭންކު ހުޅުމާލެ ބްރާންޗުން ކަމަށެވެ. އެސްބީއައިގެ ހުޅުމާލެ ބްރާންޗް ހުންނަނީ އަމީން އެވެނިއު ބިލްޑިންގުގެ ތިރީގަ އެވެ.
އެ ބޭންކުން ބުނި ގޮތުގައި ރޭ އަލިފާނުގެ ހާދިސާގައި ބޮޑު ގެއްލުމެއް ލިބުނު، ގަދަގޭ މުހައްމަދު ފުޅު ބިންޑިންގައި އެ ބޭންކުން ހިދުމަތް ދެމުން އައި ފަސް ފްލޯ އަކަށް ގެއްލުންވެފައިވާ ކަމަށެވެ. އެ ހާދިސާއާ ގުޅިގެން އެސްބީއައި އިން ވަނީ ހުޅުމާލެ އަށް ހިދުމަތް ހޯދަން ދާން ބޭނުންވާ ކަސްޓަމަރުންނަށް ދިއުމުގެ އިންތިޒާމު ވެސް ހަމަޖައްސައިދޭން ނިންމާފަ އެވެ.
އެ ބޭންކުން ބުނި ގޮތުގައި ހެނދުނު 8:00 އިން ހަވީރު 6:00 އަށް އެ ބޭންކަށް ގުޅައިގެނާއި އީމެއިލް ކޮށްގެން އެޕޮއިންޓްމަންޓް ހެއްދޭނެ އެވެ.
އެ ބޭންކުން ވަނީ ހުޅުމާލޭގެ އިތުރުން ޗައިނާ ގާޑަން ކުރިން ހުރި އިމާރާތާ އިން ވެގެން ހުރި އިމާރާތުގައި ވެސް ބައެއް ހިދުމަތް ތައް ދޭން ނިންމާފަ އެވެ. އެ ބިލްޑިންގުން ލިބޭ ހިދުމަތްތަކުގެ ތެރޭގައި ޗެކް ޓްރާންސްފާ ކުރުމާއި އާރްޓީޖީއެސް އަށް އެދުމާއި ޓީޓީ އާއި ރެމިޓެންސް ރިކުއެސްޓް ހެދުން ހިމެނެ އެވެ.