އޭސީ މިލާންގައި އަންނަ ސީޒަންގައި ވެސް މަޑު ކުރަން ނިންމައި، އެ ކުލަބުގެ އާ ކޮންޓްރެކްޓްގައި ޒްލަޓާން އިބްރޮހިމްވިޗް ސޮއި ކޮށްފި އެވެ.
އެމެރިކާގެ އެލްއޭ ގެލެކްސީއަށް ދެ އަހަރު ކުޅުމަށް ފަހު، ހިލޭ ޓްރާންސްފާގައި އިބްރޮހިމޮވިޗް މިލާން އާ ގުޅުނީ މިދިޔަ ޖަނަވަރީގަ އެވެ. އޭރު މިލާން އާއެކު އޭނާ ސޮއި ކުރީ ސީޒަން ނިމެންދެންނެވެ. މިލާން އާއެކު އޭރު އޮތް އިބްރާ 38، ގެ ކޮންޓްރެކްޓް ވަނީ ހަމަވެފަ އެވެ. އެހެން ނަމަވެސް އޭނާ ވަނީ މިލާންގެ ކޮންޓްރެކްޓްގައި ބައިވެރިވެފަ އެވެ.
އޭނާ ޓީމާ ގުޅި، 20 މެޗުގައި 11 ލަނޑު ޖަހައިދީ، ޔޫރޮޕާ ލީގްގެ ކޮލިފިކޭޝަނާ ހަމައަށް މިލާން ގެންގޮސް ދިނެވެ. މިލާން އިން ބުނީ އެ ކުލަބުގެ ކޮންޓްރެކްޓްގައި އޭނާ ސޮއި ކުރުމަކީ އެ ކުލަބަށް ލިބިގެންދާ ބޮޑު ހިތްހަމަޖެހުމެއް ކަމަށެވެ.
ކުރިން ބެލިވިފައި އޮތީ، އަންނަ ސީޒަންގައި އިބްރޮހިމްވިޗް ބޭނުން ކުރާނީ ޖޯޒީ ނަންބަރު ނުވައެއް ކަމަށެވެ. އެހެން ނަމަވެސް އޭނާ ބޭނުން ކުރަން ނިންމީ ނަންބަރު 11 ގަ އެވެ. އޭނާ ބުނީ 11 ވަނަ ނަންބަރު އޭނާ އިހްތިޔާރު ކުރީ ސަޕޯޓަރުންގެ އެދުމުގެ މަތިން ކަމަށެވެ. މިދިޔަ ސީޒަންގައި އޭނާ ބޭނުން ކުރީ 21 ވަނަ ނަންބަރެވެ.
"އަހަރެން އިހްތިޔާރު ކުރީ 11 ނަންބަރު ޖޯޒީ، ސަބަބަކީ މިލާންގެ ސަޕޯޓަރުންނަށް އަހަރެން އެނގޭނީ އެ ނަންބަރުން،" އިބްރަހިމޮވިޗް ބުންޏެވެ. "21 ވަނަ ނަންބަރުގައި އަހަންނަކަށް އިހްސާސެއް ނުކުރެވޭ އަހަންނަކީ މިލާންގެ އިބްރިހިމޮވިޗް ކަމެއް، އެހެންވެ މިނަންބަރު އަހަރެން އެދުނީ ކުރިން މިލާންގައި ކުރި އިހްސާސް ކުރަން."
ކޮންޓްރެކްޓްގައި ސޮއި ކުރުމަށް ފަހު ޒްލާޓާން ބުނީ އަންނަ ސީޒަންގައި ލީގަށް ވާދަ ކުރާ ޓީމަކަށް މިލާން ވާން ޖެހޭނެ ކަމަށެވެ.