ހޮލެންޑްގެ ގައުމީ ޓީމުގެ ކޯޗަކަށް، ލުއިސް ވެންހާލް ގެންނަން ނުބުނާނެ ކަމަށް، އެ ޓީމުގެ ކެޕްޓަން ވާޖިލް ވެންޑައިކް ބުނެފި އެވެ.
ބާސެލޯނާ އަށް ބަދަލުވި، ހޮލެންޑްގެ ގައުމީ ޓީމު ކުރީގެ ކޯޗް ރޮނަލްޑް ކޫމަން، ހޮލެންޑްގެ ޓީމުން ވަކިވި ފަހުން ގައުމީ ޓީމުގެ ކޯޗްގެ މަގާމަށް ދާއިމީ ކޯޗަކު އަދި ހަމަޖައްސާފަ އެއް ނުވެ އެވެ. ވަގުތީ ކޯޗެއްގެ ގޮތުގައި ހަމަޖައްސާފައި ވަނީ، ކޫމަންގެ ކުރީގެ އެސިސްޓެންޓް ކޯޗް ޑްވިއިޓް ލޯޑެވޭޖެސް އެވެ. އޭނާގެ ކޯޗް ކަމުގެ ދަށުން ހޮލެންޑްގެ ޓީމު މިހާރު ތައްޔާރު ވަމުން ދަނީ، ޔޫއެފާ ނޭޝަން ލީގްގައި ހުކުރު ދުވަހު ޕޮލެންޑާ ދެކޮޅަށް ކުޅޭ މެޗަށާއި އަންނަ ހޯމަ ދުވަހު އިޓަލީ އާ ދެކޮޅަށް ކުޅޭ މެޗަށެވެ.
ވެންޑައިކް ވަނީ ދާއިމީ ކޯޗެއް އަވަހަށް ހަމަޖެއްސުމަށް ޑަޗް އެފްއޭއަށް ގޮވާލާފަ އެވެ. އޭނާ ބުނީ ކުޅުންތެރިންގެ އެޑްވައިޒަރީ ބޮޑީން ކުޅުންތެރިން ބޭނުންވާ ގޮތް އެފްއޭއަށް އަންގާފައި ވާނެ ކަމަށެވެ. އެފްއޭއިން ކުޅުންތެރިންގެ ވާހަކަ އަޑު އަހާތީ އޭނާ ވަނީ އެކަން އުފަލާއެކު ފާހަގަ ކޮށްފަ އެވެ.
ބްރެޒިލްގައި 2014 ވަނަ އަހަރު ބޭއްވި ވޯލްޑް ކަޕްގެ ސެމީ ފައިނަލަށް ހޮލެންޑް ގެންގޮސްދިން ލުއިސް ވެންހާލް ވަނީ ގައުމީ ޓީމުގައި އަލުން މަސައްކަތް ކުރަން ޝައުގުވެރިވާކަން ފާޅު ކޮށްފަ އެވެ. ވެންހާލް ގައުމީ ޓީމަށް ގެނައުމާ މެދު ދެކެނީ ކިހިނެއްތޯ ސުވާލު ކުރުމުން ވެންޑައިކް ބުނީ، އޭނާ މީގެ ކުރިން ވެންހާލް އާއެކު މަސައްކަތް ނުކުރާތީ އެކަމާމެދު އެއްޗެކޭ ބުނެވެން ނެތް ކަމަށެވެ.
"އަހަރެން އޭނާ [ވެންހާލް] އާއެކު މަސައްކަތެއް ނުކުރަން އެހެންވީމަ އަހަންނަކަށް އެކަމާ މާބޮޑަށް ވާހަކައެއް ނުދެއްކޭނެ،" އިއްޔެ ބޭއްވި ޕްރެސްގައި ވެންޑައިކް ބުންޏެވެ. "އަހަރެން އަމިއްލައަށް އޭނާގެ ނަމެއް ނުބުނަނާން، ނަމަވެސް އޭނާ އަކީ ހޮލެންޑް ފުޓްބޯޅައަށް ގިނަ ކަންތައްތަކެއް ކޮށްދީފައިވާ މީހެއް، އެހެންވީމަ އޭނާގެ ނަން މިޑީއާއިން ގެންނާނެ، އަހަރެން އުންމީދު ކުރަން އެސޯސިއޭޝަނުން ރަނގަޅު ނިންމުމެއް ނިންމާނެ ކަމަށް."
ޔޫރަޕްގެ މޮޅު ކުޅުންތެރިޔާގެ އެވޯޑް މިދިޔަ އަހަރު ހޯދި ވެންޑައިކް ބުނީ، ކޫމަން ވަކި ވުމުން ކުޅުންތެރިން މާޔޫސްވި ކަމަށެވެ. އެހެން ނަމަވެސް ބާސާގެ ހުށަހެޅުން ކޫމަން ގަބޫލު ކުރުމުން ހައިރާން ނުވާ ކަމަށާއި ދެރަ ވަނީ އެހާ މޮޅު ކޯޗަކު ހޮލެންޑްގެ ގައުމީ ޓީމު ދޫކޮށްލުމުން ކަމަށެވެ.
"އެއީ [ބާސާ އަށް ކޯޗް ކޮށްދިނުމަކީ] އޭނާގެ ހުވަފެނެއް، އެހެންވެ އަހަރެމެން (ގެ އެފްއޭ އިން) އެ ފުރުސަތު އޭނާ އަށް ދިނިން،" ވެންޑައިކް އިއްޔަ ބުންޏެވެ. "އެކަމަކު އެއީ އަހަރެމެންނަށް ލިބުނު ދެރައެއް، އެހެން ނަމަވެސް އޭނާގެ ނިންމުން އަހަރެމެން ގަބޫލު ކުރަން."
ކޫމަން ފާހަގަ ކުރެވިފައި ވަނީ، ހޮލެންޑްގެ މިޖީލުގެ ކުޅުންތެރިންގެ މެދުގައި މަގުބޫލު ކޯޗެއްގެ ގޮތުގަ އެވެ. ފްރާންސްގައި 2016 ވަނަ އަހަރު ބޭއްވި ޔޫރޯ އާއި 2018 ވަނަ އަހަރުގެ ވޯލްޑް ކަޕަށް ހޮލެންޑް ކޮލިފައި ނުވެ، ފުޓްބޯޅަ ބޮޑު އަޑިގަނޑަކަށް ވެއްޓުނެވެ. އެހާލަތުން ހޮލެންޑް ނެގުމަށް އެ ޓީމުގެ ކޯޗްކަން 2018 ގައި ހަވާލު ކުރީ ކޫމަން އާ އެވެ. އޭނާ ވަނީ ގައުމީ ޓީމުގެ ނަތީޖާތައް ރަނގަޅު ކޮށްފަ އެވެ. މިދިޔަ އަހަރު ޔޫއެފާ ނޭޝަން ލީގްގެ ފައިނަލަށް އެ ޓީމު ގެންގޮސް ދިނެވެ. އަންނަ އަހަރަށް ފަސް ކޮށްފައިވާ ޔޫރޯ ފުޓްބޯޅަ މުބާރާތަށްވެސް ހޮލެންޑް ކޮލިފައި ކޮށްދިނެވެ.