އިނާމުތަކެއް ހިމެނޭ ގޮތަށް ބާއްވާ އިންޓަނޭޝަނަލް ވާޗުއަލް ދުވުން، "ރަން ފޯ މޯލްޑިވްސް" ގައި ދުވުން ފަށައިފި އެވެ.
ރާއްޖޭގައި ބާއްވާ އިންޓަނޭޝަނަލް ފުރަތަމަ ދުވުމުގެ ގޮތުން އިންތިޒާމު ކުރި މި ވާޗުއަލް ރަން، ފެށިއިރު އެކި ކެޓަގަރީތަކުގައި ބައިވެރިވި ފަރާތްތަކުން ވަނީ ދުވެފަ އެވެ. ދުވުން ފެށި ނަމަވެސް އޮކްޓޫބަރު 15 ގެ ނިޔަލަށް ދުވުމުގައި ބައިވެރިވުމުގެ ފުރުސަތު އޮންނާނެ އެވެ. އަދި މި ދުވުން ނޮވެމްބަރު މަހުގެ 11 ވަނަ ދުވަހުގެ ނިޔަލަށް ދެމިގެން ދާނެ އެވެ.
މި ދުވުމަކީ ޓޫރިޒަމް މިނިސްޓްރީ އާއެކު ބޮޑު ބަޖެޓަކާއެކު ޓޫރިޒަމް ޕްރޮމޯޓް ކުރަން މާ ބޮޑު މަސައްކަތެއް ނުކުރާ އެމްއެމްޕީއާރުސީން އެންޑޯޒްކޮށްފައިވާ އިވެންޓެކެވެ. މި އިވެންޓުގައި ރާއްޖޭގައި ހިންގާ މަޝްހޫރު ގިނަ ރިސޯޓުތަކާއި ގެސްޓްހައުސް ތަކުން ބައިވެރިވެފައި ވެއެވެ. އިވެންޓުން ހޮވޭ 20 ފަރާތަކަށް ރިސޯޓުގައި ޗުއްޓީ ހޭދަ ކުރުމުގެ ފުރުސަތު ލިބޭނެ އެވެ. މި ލަކީޑްރޯގައި ދެ ލައްކަ ޑޮލަރުގެ އިންޝުއަރެންސް ކަވަރޭޖެއް ދޭނެ އެވެ.
މި ދުވުމުގެ ހަތަރު ގިންތި އަށް ވެސް ނަން ދީފައި ވަނީ ރާއްޖެއާ ގުޅުވައިގެންނެވެ. ދުވުމުގެ 5.5 ކިލޯ މީޓަރަށް ކިޔަނީ "ސިޓީ ލިންކް" އެވެ. އަދި 16 ކިލޯ މީޓަރަކީ "އައްޑޫ ލިންކް" އެވެ. އަދި 21 ކިލޯ މީޓަރަކީ "ލާމު ލިންކް" އެވެ. މީގެ އިތުރުން އިތުރުން 870 ކިލޯ މީޓަރަށް ދީފައިވާ ނަމަކީ "ރާއްޖެ ލިންކް" އެވެ. މި ދުވުމުގައި ބައިވެރިވާ ކޮންމެ ފަރާތަކަށް ވެސް މެޑަލް ގެއަށް ފޮނުވައިދޭނެ އެވެ. ރަން ފޯ މޯލްޑިވްސްގެ ރޭސް ޑިރެކްޓަރަކީ ރާއްޖޭގެ މަޝްހޫރު ދިގު ދުވުންތެރިއެއް ކަމަށްވާ އަހުމަދު ޝަރަފު އެވެ.