ސްޕެއިން އާއި މާލީގެ ގައުމީ ޓީމުގައި، ވޯލްވާހެމްޓަން ވޮންޑާސްގެ ފޯވަޑް، އެޑަމާ ޓްރައޯރޭ ހިމަނައިފި އެވެ.
ސްޕެއިންގެ ބާސެލޯނާ ސިޓީއަށް އުފަންވި ޓްރައޯރޭގެ މައިންބަފައިންނަކީ މާލީގެ ދެމެފިރިންނެވެ. ދެ ގައުމުގެ ގައުމީ ޓީމަށް ކުޅުމުގެ ފުރުސަތުވެސް އޭނާ އަށް އެބައޮތެވެ. ސީނިއާ ލެވަލްގައި މިހާތަނަށް ގައުމީ ޓީމަށް ކުޅެފައެއް ނުވެ އެވެ. މީގެ ހަތަރު ދުވަސް ކުރިން މާލީގެ ގައުމީ ޓީމުގެ ސްކޮޑްގައި، ޓްރައޯރޭ ހިމެނިފަހުން އިއްޔަ އިއުލާން ކުރި ސްޕެއންގެ ސްކޮޑުގައިވެސް ޓްރައޯރޭ ވަނީ ހިމަނާފަ އެވެ. މިއީ ސްޕެއިންގެ ގައުމީ ޓީމުގައި އޭނާ ހިމެނި ތިން ވަނަ ފަހަރެވެ.
ކުރިން ސްޕެއިންގެ ގައުމީ ޓީމުން އޭނާ އަށް ފުރުސަތު ލިބުނު ދެފަހަރުވެސް އޭނާ އަށް ކުޅެވޭގޮތެއް ނުވި އެވެ. އޯގަސްޓް މަހު ދިން ފުރުސަތުގެ ބޭނުން އޭނާ އަށް ނުހިފުނީ ކޮވިޑް-19 އަށް ޕޮޒިޓިވް ވުމުންނެވެ. އެފްސީ ބާސެލޯނާގެ ޔޫތު އެކެޑެމީގެ ތެރެއިން ތަމްރީންވެގެން އައި ޓްރައޯރޭ އުމުރުފުރާތަކުގެ ގައުމީ ޓީމުގައި ކުޅެފައި ވަނީ ސްޕެއިންއަށެވެ.
ސްޕެއިންގެ ކޯޗް ލުއިސް އެންރީކޭ، ބުނީ ޓްރައޯރޭ ކުޅެން ބޭނުން ވަނީ ސްޕެއިންގެ ގައުމީ ޓީމަށް ކަމަށެވެ. "އެހެންނަމަވެސް އޭނާ ފަހުގެ ނިންމުން ނިންމާނީ، އަހަރެން އޭނާއާ ވާހަކަ ދެއްކިން އޭނާ ބުނެފައި ވަނީ ސްޕެއިންގެ ފުރުސަތު ބޭނުން ކުރާނެ ކަމަށް."
ފީފާގެ ގަވާއިދު ކުރިން އޮންނަނީ ސީނިއާ ލެވަލްގައި އިންޓަނޭޝަނަލް އޮފިޝަލް އެންމެ މެޗެއް ކުޅުނުނަމަވެސް ދެން އިތުރު ގައުމެއްގެ ގައުމީ ޓީމަކަށް ނުކުޅެވޭނެ އެވެ. ސްޕެއިންގެ ގައުމީ ޓީމަށް ކުޅުނު ސެވިއްޔާގެ މުނީރު އަލް ހައްދާދީއަށް މޮރޮކޯގެ ގައުމީ ޓީމަށް ނުކުޅެވުނީ އެކަމާ ހުރެ އެވެ. ނަމަވެސް ފީފާފައިން ވަނީ މިހާރު ގަވާއިދު ބަދަލު ކޮށްފަ އެވެ. މޮރޮކޯގެ ފެޑްރޭޝަނުން ހުށަހެޅި ޕްރަޕޯސްލަ އާ ގުޅިގެން ފީފާއިން ވަނީ ގަވާއިދު ރިވިއު ކުރުމަށް ފަހު ބަދަލު ގެނެސްފަ އެވެ.
މިހާރު ގެނެސްފައިވާ ބަދަލުގައި ވަނީ، ތިން މެޗަށް ވުރެ ގިނައިން ނުކުޅޭނަމަ ގައުމީ ޓީމު ބަދަލު ކުރެވިދާނެ ކަމަށެވެ. އޭގެ ތެރޭގައި ވޯލްޑް ކަޕް އަދި ކޮންޓިނެންޓަލް މުބާރާތެއްގެ މެޗެއް ހިމެނިގެން ނުވާނެ އެވެ. އަދި އެ މެޗުތައް ކުޅުނުއިރު ކުޅުންތެރިޔާގެ އުމުރުން 21 ފުރިފައި ނުވުން ޝަރުތުގެ ގޮތުގައި ފީފާއިން ވަނީ ހިމަނާފަ އެވެ. ސްޕެއިންއަށް އުފަން މުނީރުގެ ބައްޕައަކީ މޮރޮކޯގެ ރައްޔިތެކެވެ. އޭނާ ވަނީ 2016 ގެ ޔޫރޯ ކޮލިފައިންގައި އުތުރު މެސަޑޯނިއާ އާ ދެކޮޅަށް ސްޕެއިން ކުޅުނު މެޗުގައި 16 މިނެޓް ކުޅެފަ އެވެ. އެ މެޗު ކުޅުނު އިރު އޭނާގެ އުމުރަކީ 20 އަހަރެވެ. ސްޕެއިންގެ އޭރުގެ ކޯޗް ވިންސެންޓޭ ޑެލްބޮސްކޭ، މުނީރުއަށް ފުރުސަތު ދިން ފަހުން އޭނާއަށް ފުރުސަތު ލިބިފައެއް ނުވެއެވެ.
ފީފާގެ ގަވާއިދަށް ބަދަލު ގެނައުމުން މޮރަކޯގެ ގައުމީ ޓީމުގެ ކޯޗް، ބޮސްނިއާގެ ވާހިދު ހަލިހޮޒްވިޗް ހުރީ މުނީރު މޮރޮކޯގެ ޓީމަށް ނަގަން ނިންމައިގެންނެވެ.