ނޫސްވެރިޔާ އަހުމަދު ރިލްވާންގެ މަރުގެ މައްސަލައާ ގުޅިގެން ކުރީގެ ހައި ކޯޓުގެ ފަނޑިޔާރު ހަސަން އަލީ ފުރުން މަނާކޮށް، ޕާސްޕޯޓް ހިފަހައްޓައިފި އެވެ.
ރިލްވާންގެ މަައްސަލަ ތަހުގީގު ކުރުމުގެ ތެރޭ 2014 ވަނަ އަހަރު ކޮންޓްރޯލާ އޮފް އިމިގްރޭޝަންގެ މަގާމުގައި އޭރު ހުންނެވި، ހަސަން އަލީ، ފުލުހުންގެ އިންޓެލްގެ ދެ މީހަކާ ގުޅިގެން ރިލްވާން ރާއްޖެއިން ބޭރަށް ގޮސް މަރުވެފައި ވާކަން ދެއްކުމަށްޓަކައި، ޓްރެވަލް ޑޮކިއުމަންޓްތަކެއް ތައްޔާރު ކޮށްފައިވާ ކަމަށް އެފަދަ މަރުތައް ބަލަން ރައީސް އިބްރާހިމް މުހައްމަދު ސޯލިހު އުފެއްދެވި ރިޔާސީ ކޮމިޝަނުން ވަނީ ތުހުމަތުކޮށްފަ އެވެ.
އެނގިފައިވާ ގޮތުގައި ރިލްވާންގެ މައްސަލާގައި ހަސަންގެ ޕާސްޕޯޓު ހިފަހައްޓާފައިވަނީ މަރު ކޮމިޝަނުންނެވެ.
އެ މައްސަލައާ ގުޅިގެން މިދިއަ އަހަރުގެ ސެޕްޓެމްބަރު މަހު ޖުޑީޝަލް ސާވިސް ކޮމިޝަން (ޖޭއެސްސީ) އިން ފަނޑިޔާރުކަމުން ހަސަން ސަސްޕެންޑްކޮށްފައިވަނިކޮށް، އޭނާ ވަނީ މިދިއަ ޖުލައި މަހު އިސްތިއުފާ ދެއްވައިފަ އެވެ.