ވިޔަފާރި

ތަކެއްޗާއި ހިދުމަތުގެ އަގުތައް މަތިވެއްޖެ: އެމްއެމްއޭ

Oct 23, 2020
1
ބާޒާރުގައި މީހަކު ފިޔާތަކެއް ސާފު ކުރަނީ: މުދަލުގެ އަގުތައް ވަނީ މަތިވެފައި -- ފޮޓޯ: އަހުމަދު އަޝްހާދު އަބްދުﷲ (ޖެރީ) | އަވަސް
100%
0%
0%

ކޮވިޑް-19 ގެ ސަބަބުން ކުރިމަތިވެފައިވާ އިގްތިސޯދީ ހީނަރުކަމާއެކު، ތަކެއްޗާއި ހިދުމަތުގެ އަގުތައް މަތިވެފައިވާ ކަމަށް، މަރުކަޒީ ބޭންކް (އެމްއެމްއޭ) އިން ހެދި ސާވޭ އިން ދައްކައިފި އެވެ.

އެމްއެމްއޭ އިން މި އަހަރުގެ ތިން ވަނަ ކުއާޓަރުގެ މައްޗަށް ބަލައި ހަދާފައިވާ "ކުއާޓަރީ ބިޒްނަސް ސާވޭ" ދައްކާ ގޮތުން މި އަހަރުގެ ތިން ވަނަ ކުއާޓަރުގައި ޓޫރިޒަމް ސިނާއަތާއި އިމާރާތްކުރުމުގެ ދާއިރާ އަދި ހޯލްސޭލް އާއި ރީޓެއިލްގެ ސިނާއަތްތަކުގައި ހިމެނޭ ވިޔަފާރި ތަކުން ވިއްކާ ތަކެއްޗާއި ހިދުމަތުގެ އަގުތަކާއި އަދި ވިޔަފާރި ހިންގުމަށް ގަންނަ ތަކެތީގެ އަގުތައް ވަނީ މަތިވެފަ އެވެ.

މި ސާވޭ ދައްކާ ގޮތުގައި ދަތުރުފަތުރާއި މުއާސަލާތީ ހިދުމަތްތައް ފޯރުކޮށްދޭ ވިޔަފާރިތަކަށް ބަލާއިރު، އެ ސިނާއަތުގައި ހިމެނޭ ވިޔަފާރިތަކުން ވިއްކާ ތަކެއްޗާއި ހިދުމަތުގެ އަގުތައް ދަށްވެފައި ވީނަމަވެސް، ވިޔަފާރި ހިންގުމަށް ގަންނަ ތަކެތީގެ އަގުތައް ވަނީ މަތިވެފަ އެވެ. މި އަހަރުގެ ހަތަރުވަނަ ކުއާޓަރުގައި އިމާރާތްކުރުމުގެ ސިނާއަތުގެ އަގުތައް ފިޔަވައި އެހެން ސިނާއަތްތަކުގެ އަގުތައް މަތި ވެގެން ދާނެ ކަމަށް އަންދާޒާ ކޮށްފައިވެ އެވެ.

އެމްއެމްއޭއިން ބުނި ގޮތުގައި ތިންވަނަ ކުއާޓަރުގައި ހޯލްސޭލް އަދި ރީޓެއިލް ވިޔަފާރިތައް ފިޔަވައި، އެހެން ސިނާއަތްތަކުގައި ހިމެނޭ ވިޔަފާރިތަކުގެ މާލީ ހާލަތު، އަހަރުގެ ދެވަނަ ކުއާޓަރަށްވުރެ ގޯސްވެފައިވާ ކަމަށެވެ. އެގޮތުން، އިމާރާތްކުރުމުގެ ސިނާއަތުގައި ހިމެނޭ ވިޔަފާރިތަކުގެ މާލީ ހާލާތު މި ކުއާޓަރުގައި ވަރަށް ބޮޑަށް ދަށްވެ، ޓޫރިޒަމް ސިނާއަތުގެ ވިޔަފާރިތަކުގެ މާލީ ހާލަތު ގޯސްވެފައިވާ މިންވަރު، އަހަރުގެ ދެވަނަ ކުއާޓަރާ އަޅާބަލާއިރު މަޑުޖެހިފައިވާ ކަމަށެވެ. އެހެންނަމަވެސް، ކުރިއަށް އޮތް ކުއާޓަރުގައި ޓޫރިޒަމް ސިނާއަތާއި ހޯލްސޭލް އަދި ރީޓެއިލް ސިނާއަތުގެ ވިޔަފާރިތަކުގެ މާލީ ހާލަތު ފާހަގަކޮށްލެވޭ މިންވަރަކަށް ވަނީ ރަނގަޅުވެފަ އެވެ.

1 comment
މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!

ޙައްޤު ތެދެއް

އެހެންވީމައި ޚަރަދު ކުރުމުގައި ބަލައިގެން އުޅެންވީ އެވެ. މިކޮވިޑްގެ ލޮކްޑައުން އެންމެ ހަރުކަށިވި 3 މަސްދުވަހު، ﷲގެ އިރާދަފުޅާއިއެކު، އަހަރެންނަށް -/8000 ރުފިޔާ ބާކީ ކުރެވުނެވެ. އޭގެ ކުރިން މަސް ނިމޭއިރު ދެކޮޅުޖެއްސެނީ ކިރިޔާ އެވެ. އަހަރެން ހެދި ގޮތަކީ، ދަރިންނަށް ވެސް ޙާލަތު ވިސްނައިދިނީ އެވެ. ކުރިން ގަންނަމުން އައި ޕިއްޒާ ފަދަ ތަކެތި، ގޭގައި ފިހާ ރޮށްޓަށް ބަދަލު ކޮށްލީ އެވެ. އަދި ބަތުގެ ތަފާތު ވައްތަރުތައް ހެދީއެވެ. ހެދިކާ ވެސް، ނުގަނެ ގޭގައި ތައްޔާރު ކުރީއެވެ. ހަމަ ވަރަށް މީރުކޮށް ހުރިހައި އިރަކު ކައިގެން ފައިސާ ބާކީ ކުރުމުގެ ތަޖުރިބާ ލިބިއްޖެ އެވެ. އަލްޙަމްދުލިﷲ!

April
SunMonTueWedThuFriSat
303112345678910111213141516171819202122232425262728293012345678910