ދ. ކުޑަހުވަދޫ މެޖިސްޓްރޭޓު ކޯޓުން ބަލައި ނިމިފައިވާ މައްސަލައެއް އަލުން ބަލަން ފެށުމުން ސުޕްރީމް ކޯޓުން އެކަން ހުއްޓުވައިފި އެވެ.
އެ މައްސަލަ ހުއްޓުވައި ސުޕްރީމް ކޯޓުން ނެރުނު އަމުރުގައި ބުނަނީ ކުޑަހުވަދޫގައި ގެއެއް އަޅަން އޮތް ބިމެއްގައި ހުރި އެ ރަށު މީހެއްގެ ރއްގަސްތަކާއި ގަސްތައް ނަގަން ކައުންސިލުން ރަށު ކޯޓަށް ހުށަހެޅި މައްސަލަ ބަލައި ހުކުމް އިއްވާފައިވާ ކަމަށެވެ. އަދި އެ ހުކުމް ހައިކޯޓުގައި އިސްތިއުނާފުކުރުމުން ވެސް ހުކުމް އިއްވާފައިވާ އިރު އެއީ ނިޔާގެ ބާރު ލިބިފައިވާ ހުކުމެއް ކަމަށެވެ.
އެހެންކަމުން އެ މައްސަލަ ސުޕްރީމް ކޯޓުގައި އިސްތިއުނާފު ނުކޮށް، ހަމަ އެ މައްސަލަ ކުޑަހުވަދޫ ކޯޓަށް ހުށަހަޅައިގެން ކުރީގެ މައްސަލައަށް އަސަރު ފޯރާނެ ފަދަ އެއްވެސް މައްސަލައެއް ބެލުމަކީ ގާނޫނު އަސާސީން ގާއިމްކޮށްފައިވާ ޝަރުއީ ނިޒާމް ބިނާވެފައިވާ އަސާސީ އުސޫލުތަކާއި އަދި އަދުލުއިންސާފުގެ ހަމަތަކާ ތައާރަޒުވާ ކަމެއް ކަމަށެވެ.
