ފުޓްބޯޅަ ސީޒަން ހުޅުވުމުގެ ގޮތުން ކުޅޭ ޗެރީޓީ ޝީލްޑް މެޗުގެ ޕާޓްނަރުންގެ ގޮތުގައި އާކް އާއި ސްޕެޝަލް އޮލިމްޕިކް އަދި މޯލްޑިވިއަން ބްލަޑް ޑޯނާސް ހަމަޖައްސައިފި އެވެ.
ޗެރިޓީ ޝީލްޑް މެޗަށް ކަނޑައަޅާފައިވާ ފައިސާގެ އެހީތެރިކަން ލިބިގެންދާނީ، ކުޑަ ކުދިންގެ ހައްގުތަކަށް މަސައްކަތް ކުރާ ޖަމްއިއްޔާ އާކް އަށާއި މޯލްޑިވިއަން ބްލަޑް ޑޯނާސް އާއި ނަފުސާނީ ނުކުޅަދުންތެރިކަން ހުންނަ ފަރާތްތައް ކުޅިވަރުގައި ޝާމިލު ކުރުވުމަށް އުފައްދާފައިވާ ސްޕެޝަލް އޮލިމްޕިކްސް މޯލްޑިވްސް އެވެ. އެ ޖަމްއިއްޔާތަކަށް ލިބޭ އެހީގެ މިންވަރު އެނގިގެންދާނި އަންނަ ހަފުތާގައި އެއްބަސްވުންތަކުގައި ސޮއި ކުރެވުމުން ކަމަށް އާކްގެ ފަރާތުން ވާހަކަ ދެއްކެވި މުރުތޮލޯ މޫސާ ވިދާޅުވި އެވެ.
މުރުތޮލޯ ވިދާޅުވީ އޭނާ ތަމްސީލް ކުރާ އާކުން، ކުޑަ ކުދިންގެ ހައްގުތަކަށް މަސައްކަތް ކުރުމުގެ އިތުރަށް އަންހެން ކުދިން ބާރު ވެރި ކުރުމަށްވެސް މަސައްކަތް ކުރާ ކަމަށެވެ. އޭނާ ވިދާޅުވީ ޗެރިޓީ ޝީލްޑްގައި އާކްގެ އެންމެ ބޮޑު މަގްސަދަކީ ކުޑަ ކުދިންނަށް ކުރާ އަނިޔާ އާއި ކުޑަ ކުދިން ރައްކާތެރި ކުރުމަށް ހޭލުންތެރިކަން އުފެެްދުން ކަމަށެވެ.
ސްޕެޝަލް އޮލިމްޕިކްސްއަކީ ނަފުސާނީ ނުކުޅަދުންތެރިކަން ހުންނަ ފަރާތްތައް ކުޅިވަރުގެ ތެރޭގައި ހަރަކާތްތެރި ކުރުވުމަށް އުފައްދާފައިވާ އެސޯސިއޭޝަނެކެވެ. އެ ޖަމްިއްޔާގެ ފަރާތުން ވާހަކަ ދެއްކި، އިބްރާހިމް ރަމީޒު ވިދާޅުވީ އެތުލެޓިކްސް އާއި ބެޑްމިންޓަން އަދި ފުޓްބޯޅައިގައ ޝާމިލުވާ ނުކުޅަދުންތެރިކަން ހުންނަ ކުދިން އެ ޖަމްއިއްޔާގެ ބެލުމުގެ ދަށުން ޑޮމެސްޓިކް އަދި އިންޓަނޭޝަނަލް މުބާރާތްތަކުގައި ވާދަ ކުރާ ކަމަށެވެ. މިދިޔަ އަހަރު އިންޑިއާގައި ބޭއްވި ސްޕެޝަލް އޮލިމްޕިކްސް ފުޓްބޯޅަ މުބާރާތުގައި ބައިވެރިވުމުގައި އެފްއޭއެމްގެ ފަރާތުން ބޮޑު އެހީތެރިކަމެއް ލިބިފައވާ ކަން އޭނާ ފާހަގަ ކުރެއްވި އެވެ.
މޯލްޑްވިއަން ބްލަޑް ޑޯނާސްއަކީ، ކުރިން ފޭސްބުކް ގުރޫޕެއްގެ ގޮތުގައި ހަރަކާތްތެރިވި މޫވްމެންޓެކެވެ. މިހާރު ޖަމްއިއްޔާއެއްގެ ގޮތުގައި ހަރަކާތްތެރިވާ ބްލަޑް ޑޯނާސްއަކީ ހިލޭ ސާބަހަށް ލޭ ހަދިޔާ ކުރުމަށް ބާރު އެޅުމުގެ ގޮތުން ބްލަޑް ޑޯނާސްގެ ނެޓްވޯކް ތަމްސީލް ކުރާ ޖަމްއިއްޔާ އެކެވެ. މިހާރު އެ ޖަމްއިއްޔާއިން ވަނީ އިންޓަނޭޝަނަލް އޯގަނައިޒޭޝަން އޮފް ބްލަޑް ޑޯނާސްގެ މެންބަރުކަން ލިބިފަ އެވެ ތެލްސީމިއާ ކުދިންނަށާއި ވިހެއުމުގެ ތެރޭގައި ލޭ ބޭނުންވާ މާބަނޑު އަންހެނުންނަށާއި ސިއްހީ ގޮތުން ކުއްލި ހާލަތެއް ދިމާވެ ލޭ ބޭނުންވާ ފާރާްތްތަކަށް އެ ޖަމްއިއްޔާ މެދުވެރިގެން ލޭ ހަދިޔާ ކުރުމުގެ އިންތިޒާމް ހަމަޖައްސަ އެވެ.
ބްލަޑް ޑޯނާގެ ފަރާތުން ވާހަކަ ދެއްކެވި އިބްރާހިމް ރަޝީދު ވިދާޅުވީ، ލޭ ހަދިޔާ ކުރުމުގެ ޕްރޮގްރާމް އެފްއޭއެމް އާއެކު ގުޅިގެން މީގެ ކުރިން ކުރިއަށް ގެންގިސްފައިވާ ކަމަށެވެ. ޗެރިޓީ ޝީލްޑް މެޗުގެ ތެރެއިން ލޭ ހަދިޔާ ކުރުމަށް އިތުރު ޑޯނާަސްތަކެއް އުފެދިގެން ދާނެ ކަމަށް އުންމީދު އެބައޮތް ކަމަށް އޭނާ ވިދާޅުވި އެވެ.
ކުރިން ސީޒަން ހުޅުވުމުގެ ގޮތުން ކުޅެނީ 100،000 ރުފިޔާގެ ފައިސާގެ އިނާމު ލިބިގެންދާ ކަޕް ވިނާސް ކަޕެވެ. އެ މުބާރާތް 2005 ވަނަ އަހަރު ބޭއްވުމަށް ފަހު، މުބާރާތް އުވާލި އެވެ. އެ މުބާރާތް އުވާލުމަށް ފަހު ޖެހިގެން އައި 2006 ވަނަ އަހަރުން ފެށިގެން ޗެރިޓީ ޝީލްޑް ތައާރަފްކޮށް، ފައިސާގެ އިނާމު ޗެރިޓީ ޝީލްޑް މެޗަށް ކަނޑައެޅި އެވެ.
އަންނަ މަހު އަށް ވަނަ ދުވަހު ކުޅޭ ޗެރިޓީ ޝީލްޑް މެޗުގައި ވާދަ ކުރާނީ ކުލަބު، އެންމެ ފަހުގެ ދިވެހި ޕްރިމިއާ ލީގްގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ލީގްގެ ރަނަރަފް ކުލަބު އީގަލްސް އެވެ.