ދެއްކި ވާހަކަތަކެއްގައި ނަސްލީ އިމްތިޔާޒު ހާމަކޮށްދޭ ލަފުޒެއް ބޭނުން ކުރުމުން ހޫނު ފެނަށް ވެއްޓުނު އިނގިރޭސި އެފްއޭ ޗެއާމަން ގްރެގް ކްލާކް މަގާމުން އިސްތިއުފާ ދީފި އެވެ.
އިނގިރޭސި ޕާލިމެންޓްގެ ޑިޖިޓަލް ކަލްޗާ މީީޑއާ އަދި ސްޕޯޓްސް ކޮމިޓީގައި މެންބަރު ކުރި ސުވާލުތަކަށް ޖަވާބު ދެއްމުން ކްލާކް ބޭނުން ކޮށްފައިވާ އިބާރަތުގެ މާނައިން ދޭހަ ވަނީ ހަމުގެ ކުލައިގެ ތަފާތު ކުޅުންތެރިންނަށް ނިސްބަތްކޮށް ބުނި ބުނުމެއްގެ ގޮތުގަ އެވެ.
"ހައި ޕްރޮފައިލް އަންހެން ކުޅުންތެރިންނަށް ކުރިމަތި ގޮތް ބަލާފައި އަދި ހައި ޕްރޮފައިލް 'ކާލާޑް' ކުޅުންތެރިންނަށް ވީގޮތް ބަލައިފިއްޔާ އަދި ސޯޝަލް މީީޑއާއިން އެމީހުންނަށް ކުރިމަތިވާ ފުރައްސާއަށް ބަލައިފިއްޔާ އެމީހުންނަށް ކުރިމަތިވޭ ވަރަށް އުނދަގޫވާ ޒާތުގެ ފުރައްސާރަ އާއި މަލާމާތް."
މިހާރު ދިމާވެފައިވާ ހާލަތުގެ ސަބަބުން ފުޓްބޯޅައިގެ ގަވަނަންސް އަދި ފަންޑިންއަށް ކުރިމަތި ވެފައިވާ ގޮންޖެހުންތަކާ ބެހޭގޮތުން ބޭއްވި ކޮމިޓީގައި އިންނެވި މެންބަރަކު ވަނީ ކްލާކް ދެއްކި ވާހަކަތަކާ މެދު މާފަށް އެދުމަށް އަންގާފަ އެވެ. ކްލާކް ވަނީ އެހެން ބުނެވުނީތީ ހިތުގެ އެންމެ ފުނުން އެކަމަށް މާފަށް އެދޭ ކަމަށް ބުނެފަ އެވެ.
ކްލާކް މާފަށް އެދުމަކުން މައްސަލައަށް ފިނި ކަމަށް ނައެވެ. އެފްއޭގެ ޗެއާމަން ކަމާ 2016 ވަނަ އަހަރު ހަވާލުވި ކްލާކްއަށް ކުރިމަތިވި ޕްރެޝަރާއެކު އޭނާ ވަނީ އެފްއޭގެ ޗެއާމަން ކަމުންނާއި އިނގިރޭސި ވިލާތުން ފީފާގައި ތަމްސީލު ކުރާ ނައިބު ރައީސްގެ މަގާމުންވެސް އިސްތިއުފާ ދިފަ އެވެ.
ފަހުން އޭނާގެ ފަރާޔުން ނެރުނު ބަޔާނުގައި ބުނެފައި ވަނީ، ޕާލިމެންޓްގައި އޭނާ ދެއްކި ވާހަކަ އަކީ ފުޓްބޯޅައިގައި ޝާމިލުވާ އެންމެންނަށް ބޭއިހްތިރާމް ލިބޭ ވާހަކައެއްކަމަށް ގަބޫލު ކުރާ ކަމަށެވެ.