އިންޑިއާގެ ކްރިކެޓް ލީގް، އިންޑިއަން ޕްރިމިއާ ލީގްގެ ޗެމްޕިއަންކަން ދިއްލީ ކެޕިޓަލްސް ބަލިކޮށް މުމްބާއީ އިންޑިއަންސް މުބާރާތުގެ ޗެމްޕިއަންކަން ހޯދައިފި އެވެ.
އައިޕީއެލްގެ އެންމެ ކާމިޔާބު ޓީމު، މުންބާއީ އިންޑިއަންސްއިން މުބާރާތް ކާމިޔާބު ކުރީ ފަސް ވަނަ ފަހަރަށެވެ. މީގެ ކުރިން އެ ޓީމުން ވަނީ 2013، 2015، 2017 އަދި މިދިޔަ އަހަރު ޗެމްޕިއަންކަން ހޯދާފަ އެވެ. މެޗުގައި މޮޅު ކުޅުމެއް ދެއްކި މުމްބާއީ އިންޑިއަންސް ގެ ކެޕްޓަން ރޯހިތު ޝަރުމާ މުބާރާތް ކާމިޔާބު ކުރީ ހަ ވަނަ ފަހަރަށެވެ. އޭނާ ވަނީ 2009 ވަނަ އަހަރު ޑޭކަން ޗާޖަސްގައި މުބާރާތުގެ ޗެމްޕިއަންކަން ހޯދާފަ އެވެ.
އަރަބި އެމިރޭޓްސްގެ ދުބާއީގައި ކުރިއަށް ގެންދިޔަ މިއަހަރުގެ މުބާރާތުގެ ފައިނަލުގައި ރޭ ކުޅުނު މެޗުގައި ދިއްލީ ކެޕިޓަލްސްއިން ވަނީ 20 އޯވަރުގެ ތެރޭގައި ހަތް ކުޅުންތެރިން ނުބައި ވެގެން 156 ލަނޑު ހަދާފަ އެވެ. އެ ޓީމުން އެންމެ ގިނަ ލަނޑު ހެދީ 65 ލަނޑު ހެދި އިއްޔެރު އެވެ. މުންބާއީ އިންޑިއަންސްއިން ވަނީ 18.4 އޯވަރުގެ ތެރޭގައި ފަސް ކުޅުންތެރިން ނުބައިވެގެން 157 ލަނޑު ހަދާފަ އެވެ. އެންމެ ގިނަ ލަނޑު ހެދީ 68 ލަނޑު ހެދި ރޯހިތު އެވެ.