މިފްކޯގެ ޕްރޮޑަކްޓް ޕޯޓްފޯލިއޯ އިތުރު ފުޅާކޮށް، އާ ދެ އުފެއްދުމެއް ބާޒާރަށް ނެރެން ތައްޔާރު ވެއްޖެ އެވެ.
ޕީއެސްއެމްގައި ވާހަކަ ދައްވަމުން މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވި ގޮތުގައި އަލަށް ބާޒާރަށް ނެރެން މަސައްކަތް ކުރަމުން ދަނީ ޕްރޮސެސްކޮށްފައި ހުންނަ ވަޅޯ މަސް ދަޅާއި ބޮނބި ކުނޑިކަމަށެވެ. ބޮނބިކުނޑި އަންނަ ހަފްތާތެރޭގައި މާކެޓަށް ނެރެވޭނެ ކަމަށާ، މިއީ ދަނޑުވެރިކަމަށް ހާއްސަ ޕްރޮޑަކްޓެއް ކަމަށް އޭނާ ވިދާޅުވި އެވެ.
"މި [ބޮނބި ކުނޑި] އަކީ އެއްވެސް ކެމިކަލްއެއް ނުހިމެނޭ އޯގެނިކް އުފެއްދުމެއް. ވަޅޯމަސް ދަޅު ކުރިއަށްއޮތް 2 މަހެއްގެ ތެރޭގައި ބާޒާރަށް ނެރެވޭނެ،" އިސްމާއިލް ވިދާޅުވި އެވެ.
މިފްކޯ އިން ދާދިފަހުން ވަނީ "ހޮޓް ޕެކް" ސީރީޒްގެ އުފެއްދުން ތަކެއް ވެސް ނެރެފަ އެވެ. މަސް ދަޅުގެ މި ސީރީޒްގައި ހިމެނެނީ ހިކި މިރުސް މަސް ދަޅާއި އަސޭ މިރުސް ދަޅު އަދި ގިތެޔޮ މިރުސް ދަޅެވެ.