އިންޑިޔާގެ މަޝްހޫރު ލަވަކިޔުންތެރިޔާ ސޯނޫ ނިގަމް ދާދިފަހުން ބުނެފައިވާ ގޮތުގައި އޭނާގެ ހުރި ހަމައެކަނި ފިރިހެން ދަރިފުޅު ނީވާން ނިގަމް ލަވަކިޔުންތެރިއަކަށް ވާކަށް އޭނާ ބޭނުމެއް ނޫނެވެ. އެހެން ގައުމެއްގައި އޭނާ ލަވަކިޔަސް ސޯނޫގެ މާ ބޮޑު މައްސަލައެއް ނެތެވެ. ނަމަވެސް އިންޑިޔާގެ ލަވަކިޔުންތެރިޔަކަށް ދަރިފުޅު ވާކަށް އެއްގޮތަކަށް ވެސް ސޯނޫ އެއް ނޭދެ އެވެ.
ސޯނޫ ބުނި ގޮތުގައި އޭނާގެ ދަރިފުޅު އެއްގޮތަކަށް ވެސް އިންޑިޔާގައި ދިރިއުޅޭ ހިތެއް ނުވެ އެވެ. އެހެންވެ އެމީހުން ދަރިފުޅު ގޮވައިގެން މިހާރު ދިރިއުޅެނީ ޔޫއޭއީގަ އެވެ.
ޓައިމްސް ނައު އަށް ދީފައިވާ އިންޓަވިއު އެއްގައި ސޯނޫ ބުނީ ދަރިފުޅު އިންޑިޔާގެ ލަވަކިޔުންތެރިއަކަށް ވާން ބޭނުން ނޫނީ އިންޑިޔާގެ މިއުޒިކް އިންޑަސްޓްރީ ދެކެ އޭނާ ފޫހިވެފައި ވާތީ އެވެ.
"ތެދަށް ބުނާނަމަ ބުނެވޭނީ އަހަރެން ބޭނުމެއް ނުވެޔޭ ދަރިފުޅު ލަވަ ކިޔާކަށް. އަދި އެ ވެސް އިންޑިޔާގައި. ދަރިފުޅު މިހާރު ދިރިއުޅެނީ ޑުބާއީގައި. އަހަރެން އޭނާ މިހާ އަވަހަށް އިންޑިޔާއިން ނެރެގެން ގެންގޮއްސިން،" ސޯނޫ ބުންޏެވެ.
ސޯނޫ ބުނި ގޮތުގައި އޭނާގެ ދަރިފުޅަކީ އުފަންވުމުގައި ވެސް ލަވަ ކިޔުންތެރިއެކެވެ. ނަމަވެސް މިހާރު ދަރިފުޅުގެ ޝައުގުހުރި ގޭމް ކުޅުމަށް ކަމަށާއި ޑުބާއީގައި އެންމެ މަޝްހޫރު ފޯޓްނައިޓް ގޭމަށް ދަރިފުޅު ވަރަށް މޮޅު ކަމަށާއި އެ ގޭމް ކުޅެން ވަރަށް ޝައުގުވެރިވާ ކަމަށް ސޯނޫ ބުންޏެވެ.
"އޭނާއަކީ ވަރަށް ވިސްނުންތޫނު ހުނަރުވެރި ވަރަށް ރަނގަޅު ސިފަތަކެއް ލިބިފައިވާ ކުއްޖެއް. އެހެންވީމަ އަހަރެން އޭނާއަށް ކުރާނެ ކަންތައްތައް ކިޔައިދޭކަށް ބޭނުމެއް ނޫން. އޭނާ ބޮޑުވެގެން ނިންމާނީ އޭނާ ކުރާނީ ކޮން ކަމެއްތޯ،" ދަރިފުޅާ ގުޅޭ ގޮތުން ސޯނޫ ބުންޏެވެ.
އިންޑިޔާގެ މިއުޒިކް އިންޑަސްޓްރީގެ އެންމެ ކުރީގައި އުޅޭ ކުންފުނި ޓީ-ސީރީޒް އާއި ސޯނޫ އާ ދެމެދު މިހާރު ވަނީ ވަރަށް ބޮޑަށް މައްސަލަ ޖެހިފަ އެވެ. މީގެ ދުވަސްކޮޅެއް ކުރިން ސޯނޫ އިންސްޓަގްރާމްގައި ޝެއާކުރި ވީޑިއޯ އެއްގައި ބުނެފައިވަނީ ޓީ-ސީރީޒް އަކީ މިއުޒިކް އިންޑަސްޓްރީގައިވާ މާފިއާ ގްރޫޕެއް ކަމަށް ބުނެ އެ ކުންފުންޏަށް ވަރަށް ބޮޑަށް ފާޑު ކިޔާފައި ވެއެވެ.
"ތި މީހުން ތި ޖައްސާލީ ވަރަށް ގޯސް މީހަކާ. އެނގިއްޖެ،" ވީޑިއޯގައި ޓީ ސީރީޒް އާ މުޚާތަބުކޮށް ސޯނޫ ބުނެފައި ވެއެވެ.
ސޯނޫ ތުހުމަތުކުރި ގޮތުގައި ޓި-ސީރީޒްގެ ހެޑް ބޫޝަން ކުމާރު ނޫސްތަކުގައި އޭނާއާ ދެކޮޅަށް ތަފާތު އާޓިކަލްތައް ޝާއިއު ކުރުވާފައި ވެއެވެ. އަދި އޭނާއާ ދެކޮޅު އިންޓަވިއުތައް ދޭން މިއުޒީޝަނުން ކައިރީ އެދި އެއްބަސް ކުރުވާފައި ވެއެވެ.