ޒްލާޓާން އިބްރޮހިމޮވިޗްގެ ދެ ލަނޑުން، ނޭޕްލްސްގައި 10 އަހަރު ފަހުން ނަޕޯލީއާ ދެކޮޅަށް އޭސީ މިލާން މޮޅުވެއްޖެ އެވެ.
މިލާން މެޗުން މޮޅުވެ އެއްވަނަ މަގާމު އެ ޓީމުން ވަނީ ދަމަހައްޓާފަ އެވެ. އެއް ވަނައިގައި މިލާން އޮތީ ދެ ޕޮއިންޓްގެ ލީޑަކާ އެކު އެވެ. ދެ ވަނައިގައި އޮތީ ސަސުއޯލޯ އެވެ.
ނޭޕްލަސްގައި މިލާން މީގެ ކުރިން މޮޅުވީ އޮކްޓޯބަރު 2010 ގަ އެވެ. އެ ސީޒަންގައި ލޯން އެއްބަސްވުމުގެ ދަށުން މިލާނަށް ކުޅުނު އިބްރޮހިމޮވިޗް، އެ މެޗުގައި ވެސް ދެ ލަނޑު ޖެހި އެވެ.
ރޭ ގެ މެޗުގައި މިލާންގެ ފުރަތަމަ ލަނޑު އިބްރޮހިމޮވިޗް ކާމިޔާބު ކުރީ މެޗުގެ 20 ވަނަ މިނެޓްގައި ތިއޯ ހެނާންޑޭޒް ތަނަވަސް ކޮށްދިން ފުރުސަތަކުންނެވެ. ދެ ވަނަ ހާފުގައި މިލާންގެ ދެ ވަނަ ލަނޑު އޭނާ ކާމިޔާބު ކުރީ އެންޓޭ ރެބިޗް ތަނަވަސް ކޯށްދިން ފުރުސަތަކުންނެވެ.
އޭގެ 10 ވަރަކަށް މިނެޓް ފަހުން ޑްރައިސް މާޓެންސް ވަނީ ނަޕޯލީގެ ފުރަތަމަ ލަނޑު ކާމިޔާބު ކޮށްފަ އެވެ. މިލާންގެ ތިން ވަނަ ލަނޑު ދެ ވަނަ ހާފގެ އިތުރު ވަގުތުގެ ފަސް ވަނަ މިނެޓްގައި ކާމިޔާބު ކުރީ ޖޭންސް ޕޭޓާ ހޯގް އެވެ.