ކޮރަޕްޝަނުގެ މައްސަލައެއް އޮތްނަމަ އެކަން ބަލަން އެފްއޭއެމުގެ އިންތިހާބު ލަސްކުރަން ޔޫތު މިނިސްޓްރީން އެންގުމަކީ ފީފާއިން ރާއްޖެ ސަސްޕެންޑްކުރާނެ ކަމެއްނޫން ކަމަށް އެފްއޭއެމުގެ ކުރީގެ ރައީސް އަލީ އާޒިމް ވިދާޅުވެއްޖެ އެވެ.
އޭނާގެ ރަސްމީ ޓުވިޓާ އެކައުންޓްގައި އާޒިމް ވިދާޅުވެފައިވަނީ ހުރިހާ ކަމެއް ފީފާގެ ރާއްޖެ ސަސްޕެންޑްކޮށްފާނެކަމަށްބުނެ އެކަމާ މަތިނުކުރުމަށެވެ.
"ފީފާއިން ރާއްޖެ ސަސްޕެންޑު ކުރާ ވާހަކައަކީ ހުރިހާ ކަމެއްގެ ބަހަނާއަކަށް ނުހަދާ. ކޮރަޕްޝަނާ ޑީލް ކުރުމަކީ ފީފާއިން އެންމެ އިސްކަންދޭ ކަންތައް،" އާޒިމް ޓުވީޓް ކުރައްވާފައިވެ އެވެ.
އެފްއޭއެމާ ދެކޮޅަށް އެއިދާރާގެ ކުރީގެ އެގްޒެކެޓިވް އޮފިސަރު ހުސައިން ރަޝީދު ހުށަހަޅާފައިވަނީ އެތަނަށް ލިބޭ ފައިސާ އެފްއޭއެމުގެ އިންތިހާބަށް ނުފޫޒު ފޯރުވަން ބޭނުންކުރާ ކަމަށް ބުނެ އެވެ. މި މައްސަލާގައި އޭސީސީން ވެސް ވަނީ އެފްއޭއެމަށް ވަދެ އެތަނުގެ ލިޔެކިއުންތައް ބަލައިފަ އެވެ. އަދި އެކަމާ ބެހޭ ރިޕޯޓެއް ވެސް އޭސީސީން އެކުލަވާލާނެ ކަމަށް އެފްއޭއެމުން ބުނެ އެވެ.
އެފްއޭއެމްގެ އިންތިހާބު ބާއްވަން ނިންމާފައިވަނީ އަންނަ ބުރާސްފަތި ދުވަހު އެވެ. އަދި ފީފާގެ ހިންގާ ކޮމިޓީން ވަނީ މި މަހުގެ ނިޔަލަށް އެފްއޭއެމަށް އާވެރިއަކު އިންތިހާބުކޮށް ނިންމަން އެންމެ ފަހު ފުރުސަތުދީފަ އެވެ.
ރާއްޖެ ކުޅިވަރު
ކޮރަޕްޝަނުގެ މައްސަލަ ބަލައިގެން ފީފާއިން ރާއްޖެ ސަސްޕެންޑްނުކުރާނެ: އާޒިމް
މި އަހަރު ކުރީކޮޅު ބޭއްވި އޭއެފްސީ ކޮންގްރެސްގައި އެފްއޭއެމުގެ މިހާރުގެ އިސްވެރިންނާއެކު އާޒިމް (ފަހަތުގައި) ފޮޓޯއަކަށް ހުއްޓިވަޑައިގެން: އޭނާ ވަނީ އެފްއޭއެމަށް ފާޑުވިދާޅުވެފައި. ފޮޓޯ އާޒިމް އެފްބީ ޕޭޖް