ކޮވިޑް-19 އާ ގުޅިގެން މާލެ ސަރަހައްދު ލޮކްޑައުންކުރި މުއްދަތުގައި، މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުވައްޒަފުންތަކެއް ހިންގާފައިވާ ހިޔާނާތުގެ މައްސަލައެއް ބަލަން ފަށައިފި އެވެ.
އެމްޕީއެލުން މިއަދު ނެރުނު ބަޔާނެއްގައި ބުނީ، ލޮކްޑައުންގައި އެ ކުންފުންނީގެ އޮޕަރޭޝަންތައް ހިންގި މުއްދަތުގެ ތެރޭގައި، ކުންފުނިން ކޮށްފައިވާ ބައެއް މުއާމަލާތްތަކުގައި ކޮރަޕްޝަންގެ އަމަލުތަކެއް ހިންގާފައިވާކަން ފާހަގަވެފައިވާ ކަމަށެވެ.
އެކަމާ ގުޅިގެން، ކުންފުނީގެ އިންޓާނަލް އޮޑިޓަރުން ރިޕޯޓެއް އެކުލަވާލާފައިވާއިރު، އެ ރިޕޯޓުން އިތުރު ކަންތައްތަކެއް ފާހަގަވެ، އިތުރު ތަހުގީގެއް މިހާރު ހިންގަމުންދާކަމަށް އެ ބަޔާނުގައި ބުނެފައިވެ އެވެ.
އަދި ބުނީ އެ ތަހުގީގުން ހާމަވެފައިވާ މައުލޫމާތުތަކަށް ބިނާކޮށް، އެ ހިޔާނާތުގައި ޝާމިލުވާކަމަށް ޝައްކުކުރެވޭ މުވައްޒަފުން މިހާރު ސަސްޕެންޑްކުރެވިފައިވާ ކަމަށެވެ.
ބަޔާނުގައި އިތުރަށް ބުނީ ކުންފުނިން ހިންގި ތަހުގީގުތަކުން ހާމަވެފައިވާ މައުލޫމާތުތަކުގެ އަލީގައި އެ ހިޔާނާތް އިތުރަށް ތަހުގީގުކުރުމަށް ފުލުހުންނާއި، އޮޑިޓާ ޖެނެރަލް އޮފީހުގެ އިތުރުން، އެންޓި ކޮރަޕްޝަން ކޮމިޝަން (އޭސީސީ)އަށް މިހާރު ހުށަހަޅާފައިވާ ކަމަށެވެ.
"ކޮރަޕްޝަންގެ މައްސަލަތަކަކީ މި ކުންފުނިން ވަރަށް ސީރިއަސްކޮށް ބަލާނެ މައްސަލަތަކެވެ،" އެ ފަދަ އަމަލު ހިންގާ މުވައްޒަފުންނާ މެދު ހަރުކަށި ފިޔަވަޅުއަޅާނެ ކަމުގެ އިންޒާރާއާއެކު އެ ބަޔާނުގައި ބުންޏެވެ.
އަދި އެފަދަ ތަކުރާރުނުވާނެކަން ކަށަވަރުކުރުމަށް މިހާރު މިހާރަށް އަޅަންޖެހޭ ފިޔަވަޅުތައް އަޅަމުންދާނެކަމުގެ ޔަގީންކަންވެސް އެމްޕީއެލުން ވަނީ ދީފައި އެވެ.
އެމްޕީއެލްގެ އެ ބަޔާނުގައި އެ ހިޔާނާތުގެ ތަފްސީލެއް ހާމަކޮށްފައި ނުވި ނަމަވެސް، އެ ކުންފުނީގެ ޗެއާމަން މުހައްމަދު ޒަކީ (ނަޒާކީ ޒަކީ) ވަނީ އެ މައްސަލާއާ ގުޅިގެން ޓްވީޓެއް ކުރައްވައިފަ އެވެ.
ޒަކީ ވިދާޅުވެފައިވާ ގޮތުގައި، ފެންމަތިވެގެން އުޅެނީ ތެލުން ވައްކަން ކުރި މައްސަލައެކެވެ. އަދި އެ މުވައްޒަފުން އަށް މިލިއަނެއްހާ ރުފިޔާ އެމްޕީއެލުން ވައްކަންކޮށްފައިވާކަމަށް ޒަކީ ވަނީ ހާމަކުރައްވައިފަ އެވެ.