ބުޅަލަށް މަރްޔަމް-އަލްބަލޫޝީގެ ހިތުގައި އޮތް ލޯތްބަކީ އެއްވެސް މީހަކަށް ފަނޑުކޮށްލެވޭނެ ލޯތްބެއް ނޫނެވެ. އަވަށްޓެރިންގެ ރުޅި އާއި ލިބޭ ހުރިހާ ފައިސާ ބުޅާތަކަށް ކާން ދިނުމުގައި ޚަރަދު ކުރަން ޖެހުމާއެކު ވެސް މަރްޔަމް އަށް ބުޅާތައް ދޫނުކޮށް ލެވިގެން އުޅޭ ސަބަބަކީ ހަމަ އެސޮރުމެންނަށް އޭނާގެ ހިތުގައި އުފެދިފައިވާ ފުން ލޯތްބެވެ.
އޯމާންގެ ވެރިރަށް މަސްކަޓްގައި ދިރިއުޅޭ މަރްޔަމް ގެންގުޅޭ ބުޅާތަކުގެ އަދަދު މިހާރު 480 އަށް ވަނީ އަރާފަ އެވެ. ބުޅާތަކުގެ އިތުރުން 12 ކުއްތާ ވެސް އޭނާ ގެންގުޅެ އެވެ. މަރްޔަމް ބުނަނީ މި ބުޅާތަކާއި ކުއްތާ ތަކަކީ އޭނާގެ މޫޑު ރަނގަޅުކޮށްދޭ ބައިވެރިންތަކެއް ކަމަށެވެ. އަދި ބުޅާތަކަކީ އިންސާނުންނަށް ވުރެ މާ ރަނގަޅު ބައިވެރިން ކަމަށް މަރްޔަމް ބުނެ އެވެ.
"އަހަރެންނަށް ކުރެވުނު ތަޖުރިބާތަކުގެ އަލީގައި ބުނެވޭނީ މި ޖަނަވާރުތައް ޚާއްސަކޮށް ބުޅަލާއި ކުއްތާ އިންސާނުންނަށް ވުރެ މާ ވަފާތެރިއޭ،" މަރްޔަމް ބުންޏެވެ.
އޭނާ މިހެން ބުނިއިރުވެސް އޭނާގެ ވަށައިގެން ބުޅާތައް ފުންމަ ފުންމާފައި ކުޅެންއުޅެ އެވެ.
މަރްޔަމްގެ މައިންބަފައިން މަރުވެ ޔަތީމުވީއިރު އޭނާ ވަރަށް ކުޑަ އެވެ. އެހެންވެ އޭނާގެ ހަޔާތުގެ އެންމެ މުހިއްމު ބައިވެރިންގެ ގޮތުގައި އޭނާ ދެކެނީ އޭނާގެ ބުޅާތަކެވެ. އެތައް އަހަރަކުއްސުރެ އޭނާ ބަލަހައްޓަމުންދާ މި ބުޅާތަކަކީ މަގުމަތީގައި ވަރަށް ހާލުގައި އުޅެނިކޮށް އޭނާއަށް ފެނިގެން ގެނެސް ރައްކާތެރިކަމާއެކު ހިމާޔަތް ދީގެން ކާން ބޯން ދީގެން ފެންވަރުވާ ރީތި ކޮށްގެން ގެންގުޅޭ ބުޅާ ތަކެކެވެ.
އޮމާން މީހުން އޮޅުކޮށްގެން ގެންގުޅޭ ބުޅާ، ކުއްތާ ފަދަ ތަކެތި ތަފާތުބަލިތައް ޖެހުމުންނާއި މުސްކުޅި ވުމުން މަގުމައްޗަށް އެއްލާލާ މައްސަލަ މިހާރު އެ ގައުމަށް ވަނީ ވަރަށް ބޮޑު ކަމަކަށް ވެފަ އެވެ. މިގޮތަށް އޮޅުކޮށްގެން ގެންގުޅޭ ޖަނަވާރު މަގުމައްޗަށް އެއްލާލާ މީހުން އެކަން ކުރަނިކޮށް އަތުލައިގަނެވިއްޖެނަމަ 25 ޑޮލަރުން ޖޫރިމަނާ ވެސް ކުރެ އެވެ. އަދި މަގުމަތީގައި އުޅޭ ޖަނަވާރުތައް މަދުކުރުމުގެ ޚާއްސަ ޕްރޮގްރާމެއް ވެސް އެ ގައުމުން ހިންގަ އެވެ. ނަމަވެސް މި ހުރިހާ ކަމަކާ އެކު ވެސް އެ ގައުމުގެ މަގުތަކުން ޖަނަވާރު މަދެއް ނުވެ އެވެ.
މި ބުޅާތަކާއި ކުއްތާތަކަށް މަހެއްގެ މައްޗަށް 7،800 ޑޮލަރު މަރްޔަމް ޚަރަދު ކުރެ އެވެ. މީގެ ތެރެއިން 17 ބުޅަލުގެ ލޯ އަނދިރި އެވެ.
ހުރިހާ އެއްޗިއްސަށް ކާންދީ ފެންވަރުވާ ހެދުމަކީ އެ ސޮރުމެން ދެކެ ވަރަށް ލޯބިވާ މީހަކަށް ނޫނީ ކުރެވޭ ވަރަށް ވުރެ މާ ބުރަ ކަމެކެވެ. އަދި ބަލި ޖަނަވާރުތައް ގޮވައިގެން ޖަނަވާރުންގެ ޑޮކްޓަރު ކައިރިއަށް ގޮސް ޑޮކްޓަރު ލިޔެދޭ ބޭސްތައް ވެސް އެ ތަކެއްޗަށް ދެނީ ވެސް މަރްޔަމް އެވެ.
ހުރިހާ ޖަނަވާރުތައް ދޫކޮށްލާފައި ބެހެއްޓެންނެތުމުން މަރްޔަމްގެ ގޭގައި އެ ތަކެއްޗަށް އުޅެވޭނެ ގޮތަށް ކޮށިތައް ވަނީ ތައްޔާރުކޮށްފަ އެވެ. ގޭގެ ބޮޑުބައެއް ވަނީ ކޮށިތަކުން ފުރިފަ އެވެ. ކޮންމެ ދުވަހަކުވެސް ވަކި ގަޑިއެއްގައި ކޮށީގައި ތިބޭ ޖަނަވާރުތައް ވެސް ބޭރަށް ނުކުމެ ކުޅެލާ ކަސްރަތުކޮށްލާ ހެދުމުގެ ފުރުސަތު މަރްޔަމް ދެ އެވެ. ބުޅާގެންގުޅުން މިހާރު މަރިޔަމް ދެކެނީ އެއީ އޭނާގެ "ދިރިހުރުން" ކަމަށެވެ.
މިކަމަށް ފެށުނު ގޮތް ކިޔައިދެމުން މަރްޔަމް ބުނީ އެންމެ ފުރަތަމަ 2008 ގައި އެ ގެޔަށް ބުޅަލެއް ގެނައީ އޭނާގެ ފިރިހެން ދަރިއެކެވެ.
"އެ ދުވަހު އޭނާ ގެނައީ ވަރަށް ކުޑަ ބުޅަލެއް. އެހެން މީހުން ފަދައިން އަހަރެން ވެސް އެ ދުވަހު ވަރަށް ރުޅި އައި ދަރިފުޅު ބުޅާ ގެނައިމަ. އޭރު އަހަރެން އެއްގޮތަކަށް ވެސް ބުޅާ ދެކެ ލޯތްބެއް ނުވޭ. އަދި އެ ސޮރު ގޭގައި އޮތްއިރުވެސް އެއަކަށް މާ ބޮޑަކަށް އަޅައެއް ނުލަން،" މަރްޔަމް، 51، ބުންޏެވެ.
ނަމަވެސް އޭގެ ފަހުން ދެ އަހަރު ވީއިރު މަރްޔަމް ވެސް ހުރީ ބުޅާ ދެކެ އިންތިހާއަށް ލޯބި ވެފަ އެވެ. ޖަނަވާރަށް އޭނާ ދެކެ އޮތް ރުޅިވެރިކަން ލޯތްބަށް ބަދަލުވެ އެ އެއްޗެތި ގެންގުޅެ ކާންދީ ފެންވަރުވާ ގެންގުޅުމުގެ ޒިންމާ އާ މަރްޔަމް ހަވާލުވި އެވެ. އަދި އޭނާގެ ގިނަ ވަގުތު ބުޅާތަކާ އެކު ހޭދަކުރަން ފެށީ އެހިސާބުންނެވެ.
ބުޅާތަކަށް މަރްޔަމްގެ ހިތުގައި އޮތް ލޯތްބާއި އެ ތަކެތި ބަލަހައްޓާ ވާހަކަ މުޅި މަސްކަޓް އަށް މަޝްހޫރު ވާހަކައަކަށް ވިއެވެ. އަދި ރަށުން ފުރައިގެން ދާ މީހުންނާއި ބުޅާ ގެންގުޅެވޭނެ ގޮތެއް ނެތިގެން ދޫކޮށްލާ މީހުން އެމީހުންގެ ބުޅާތައް މަރްޔަމް އާ ހަވާލުކުރަން ފެށި އެވެ.
މަރްޔަމް ބުޅާ ގެންގުޅޭތީ އަވަށްޓެރިންނަށް އުނދަގޫވެ ޝަކުވާ ކުރަން ފެށި އެވެ. ނަމަވެސް 2014ގައި އާ ގެއެއް ގަނެ އެ ގެޔަށް ބަދަލުވުމަށްފަހު ގޭތެރޭގައި ބުޅާތައް ގެންގުޅެވޭނެ ގޮތް މަރްޔަމް އަށް ވިއެވެ. އެހެންވެ އިތުރު ބުޅާތައް ވެސް އޭނާ ގެއަށް ގެންނަން ފެށި އެވެ. ގޭގައި އުކާލަން ހުންނަ ހުރިހާ ކާއެއްޗިއްސެއް ވެސް މިހާރު މަރްޔަމް ކާން ދެނީ ބުޅާ ތަކަށެވެ. އެއީ އޭނާގެ އަވަށްޓެރިއެއްގެ ގޮތުގައި ކުރިން އުޅުނު މީހެއްގެ ފަރާތުން މަރްޔަމް އަށް ދަސްވީ ކަމެކެވެ.
މަރްޔަމް ބުނަނީ އޭނާއަކީ ޑިޕްރެޝަންގެ މައްސަލަތައް ވަރަށް ބޮޑަށް ހުރި މީހެއް ކަމަށެވެ. ނަމަވެސް ބުޅާތަކާއި ކުއްތާތަކުގެ ސަބަބުން ޑިޕްރެޝަންގެ މައްސަލަތައް ވެސް މުޅިން ފިލައިގެން ހިނގައްޖެ ކަމަށެވެ.
އަދި އިންސްޓަގްރާމްގައި މި ބުޅާތަކާއި ކުއްތާތަކާއެކު މަރްޔަމް ނަގާފައިވާ ފޮޓޯތައް ޖަހަން ފެށުމުން އޭނާ ފޮލޯކުރާ މީހުން އިތުރުވެ ގިނަ ބައެއްގެ ތާއީދު މަރްޔަމް އަށް ދަނީ ލިބެމުންނެވެ.
"އަހަރެންގެ ދިރިއުޅުން ކުރި އޮތީ ވަރަށް އަނދިރިކަމުގެ ތެރޭގައި. އާ ހަޔާތެއް ލިބި އެ އަނދިރިކަމުން އަހަންނަށް ސަލާމަތްވެވުނީ މި ބުޅާތަކާއި ކުއްތާތަކުގެ ސަބަބުން،" މަރްޔަމް ބުންޏެވެ.